Reportaxe
en Cultura Galega:
“A Editorial Galaxia acaba de tirar á luz Labrego con algo de poeta, a biografía sobre o autor homenaxeado no Día das Letras este ano. No libro, Mercedes Queixas desenvolveu un traballo complexo co que tenta dar conta dunha obra inxente e dunha vida intensa. O feito de se enfrontar a un persoeiro aínda vivo na memoria e na sociedade galega supuxo, segundo, recoñece a autora un factor de complexidade engadido a este labor. “A verdade é que me resultou moito máis cómodo, doado, accesible e tranquilizador abordar biografías como a que no seu día elaborei sobre Sarmiento. Nese caso púidenme centrar en analizar o personaxe a partir da súa obra, de estudos e de investigacións varias. No caso de Manuel María había bastantes retos. Cando me propuxeron desde Galaxia enfrontar unha biografía breve e divulgativa parecíanme palabras moi atinadas pero que tamén facían moi difícil abranguer un fenómeno como é Manuel María“. (…)
A estreita relación entre o traballo e o percurso biográfico no autor preséntase como unha das ideas focais da análise que realizou Queixas. “Temos que ratificar esta idea. Manuel María era un comunicador nato. Tiña a necesidade de transmitir e de contar o que observaba e o que valoraba, e a escrita foi sempre o seu espazo natural de comunicación. Canto máis o leo máis me ratifico na idea de que o seu é un binomio perfecto entre escritor e home. Ler a súa obra é ler a súa vida, hai unha simbiose perfecta. Era moi transparente e os seus principios están claramente definidos na execución da palabra”. Isto facilita que “cando falo del apóiome na súa obra para explicar en que momento da súa vida estamos. Por iso participo da idea de que hai que o ler, máis do que falar sobre el”. Esta perspectiva emparenta en boa medida a Manuel María con formas narrativas propias de Internet como os diarios en liña ou os blogs. “Penso que foi un pioneiro nesta vinculación, neste entender a vida e a obra, a paixón pola palabra, como unha relación íntima de vasos comunicantes. A min mesmo acontécenme cousas no día a día e véñenme á cabeza fragmentos das súas obras. Semella que o seu traballo, esa visión súa de alguén que camiña día a día a pensar na vida e na escrita, quedou aí para o traer á nosa realidade”. (…)
Como resumo sobre o homenaxeado, Queixas salienta que se trata “dun traballador incansable da palabra é resulta imposible botar conta das horas que Manuel María nos dedicou da súa vida. É un autor que hai que ler, a grande descuberta deste ano, o grande reto é que nos fican abertas as portas a unha obra e todos imos entrar. Cómpre insistir na importancia do traballo que está a facer a Fundación Manuel María e a Casa Museo, que van conseguir que Manuel María non desapareza definitivamente como acontece ás veces coa celebración do Día das Letras, que semella o certificado de defunción definitivo do autor”.”
Arquivos da etiqueta: Fundación Manuel María
I Gala do Libro Galego, o sábado 14 de maio en Compostela
Organizan AELG, Asociación Galega de Editores e Federación de Librarías de Galicia. Co apoio do Concello de Santiago, Consellaría de Cultura, Deputación da Coruña, Centro Español de Derechos Reprográficos (CEDRO) e Fundación Luís Seoane.
Desde hai anos viñan convocándose os premios literarios da AELG coa súa Gala das Letras, a Noite da edición en Galicia da Asociación Galega de Editores e mais os Premios Irmandade do Libro da Federación de Librarías de Galicia. A partir de agora todos estes galardóns desaparecen para transformarse nuns únicos premios literarios co libro galego como protagonista principal, convocados de forma conxunta polas tres organizacións. O nome escollido, é Gala do Libro Galego.
Estes galardóns nacen co obxecto de recoñecer a excelencia do traballo literario realizado no ámbito editorial ao longo do ano 2015 en Galicia; as obras gañadoras faranse públicas no transcurso da Gala do Libro Galego 2016, presentada por Camilo Franco, que se celebrará no Teatro Principal de Santiago de Compostela o sábado 14 de maio, segundo o seguinte horario:
– 18:30 h. Sesión de fotografías (fotocall) de lectoras-es e autores-as e sinatura de libros á entrada do Teatro.
– 19:30 h. Comezo da Gala (entrada libre até completar aforo).
– A partir das 21:30 h. Nova sesión de fotografías (fotocall) e sinatura de libros.
No fotocall as persoas asistentes á Gala poderán facer fotos cos/as seus/súas autores/as favoritos/as e mesmo levar libros para seren asinados.
Na Gala entregaranse as distincións nas seguintes categorías:
- Obra de ensaio
- Obra de narrativa
- Obra infantil e xuvenil
- Libro ilustrado
- Iniciativa bibliográfica
- Obra traducida
- Libro de poesía
- Libro de teatro
- Iniciativa cultural ou fomento da lectura
- Proxecto literario na rede
- Xornalismo cultural
- Escritor galego universal
- Premio honorífico á libraría
- Premio honorífico á editora
As directivas das organizacións convocantes, previa votación dos seus asociados e asociadas, fixeron chegar a listaxe de finalistas nas once primeiras modalidades a un xurado externo, que nomeado de común acordo polas Xuntas Directivas da AELG, AGE e Federación de Librarías, formado por sete persoas, quen se encargarán de fallar estes galardóns sen dotación económica.
O premio ao Escritor Galego Universal será concedido pola directiva da AELG, que xa decidiu outorgarllo a Pere Gimferrer (pode consultarse aquí a súa axenda de actividades para os días 13 e 14), o Honorífico á libraría será concedido pola directiva da Federación de Librarías e o Honorífico á editora corresponderá á directiva da AGE.
Obras finalistas do Premios Gala do Libro Galego 2016 Sigue lendo
Vigo: mesa redonda-coloquio Manuel María. Fanegas de corazón, alma de poeta
A obra de Manuel María escóitase en todo o país
Desde Sermos Galiza:
“Na Galiza conmemoramos este 23 de abril, Día do Libro, empapándonos da obra de Manuel María, con lecturas públicas que tiveron lugar en medio cento de concellos de toda a xeografía do país. “É difícil saber o número de persoas que participaron nas actividades. No acto da Coruña, que durou dúas horas e media, nunca houbo menos de 150 persoas no local”, explica en declaracións a Sermos Galiza o secretario da Fundación Manuel María, Alberte Ansede, que calcula que só na cidade herculina participarían unhas 300 persoas.
A lectura non só foi tal. Tamén se cantou Manuel María con música, recuperouse con maxia e até con representacións teatrais das súas pezas dramáticas. A celebración deste Día do Libro con Manuel María xurdiu da man da fundación que leva o seu nome, que abriu unha convocatoria pública para que quen quixer sumarse collese o testemuño para organizar lecturas abertas.
“Que mellor forma que celebrar unha obra literaria ou un escritor que lendo a súa obra?”, salienta Ansede, que agradece a resposta de concellos, asociacións culturais e veciñais, bibliotecas e mesmo de comisións creadas a tal efecto á hora de facer súa a actividade arredor da obra do autor ao que este ano se lle dedica o Día das Letras.
“Gústanos moito que se fale de Manuel María, pero gústanos moitísimo máis que se deixe falar o propio Manuel María, coa súa obra rica e abondosa”, expón o secretario da fundación, que explica que os actos que teñen lugar este sábado “tratan de fuxir das declaracións de amor ao escritor, case sempre esaxeradas e baleiras e buscan compartir colectivamente a riqueza e vixencia dun escritor como Manuel María”. Así, apela a “escapar da celebración puramente cerimonial que oculta a propia obra e deixar que a obra sexa a que fale”. (…)”
Lecturas públicas de Manuel María por todo o país no Día do Libro
Actos con horarios confirmados:
A
Bandeira (Silleda), día 23, na Casiña dos contos da Bandeira, ás 12 hrs
Barbadás, día 23, xunto á rotonda da Familia, de 11 a 13 hrs
Betanzos, día 23, na Libraría Biblos, ás 12 hrs
Brión, día 23, na Biblioteca Pública Municipal de Brión, ás 12 hrs
Bueu, día 23, na Biblioteca Municipal, ás 12 hrs
Cambre, día 23, na Sala de exposicións da Biblioteca Central de Cambre, ás 12 hrs
Cedeira
A Coruña, día 23, no Museo de Belas Artes (rúa Zalaeta, 2), ás 12 hrs
Carral, día 23, no Monumento aos Mártires, ás 20 hrs
Carballo, día 22, auditorio da Biblioteca Rego da Balsa, ás 11.30 hrs
Entrimo, día 23
Guitiriz, día 23, na Casa Habanera, ás 12 hrs
Ferrol, día 23, no Antigo Hospicio en Amboaxe, ás 12 hrs
Lalín
A Laracha, día 23, na Biblioteca Municipal, ás 12 hrs
Lousame, día 23, na Casa da Cultura, ás 12 hrs.
Lugo, día 23, na praza Maior, ás 18 hrs
Monforte, día 23, na praza Manuel María (se chove na Casa da Cultura), ás 12 hrs
Oleiros, día 23, ás 11.30 e ás 17 hrs na Casa-Museo Manuel María (Outeiro de Rei)
Ortigueira, día 22, na Biblioteca Municipal Juan Fernández Latorre, ás 11 hrs
Outeiro de Rei, día 23, na Casa-Museo Manuel María, ás 11.30 e ás 17 hrs
A Pobra do Caramiñal, día 23, no Cine Elma, ás 12.30 hrs
Pontevedra, día 23, diante da praza de abastos (rúa Serra), ás 12.30 hrs
Redondela, día 22, na radio municipal, durante todo o día
Rodeiro, día 22, na Biblioteca Pública José Carballo Suárez
Ribeira, día 23, na Biblioteca Municipal
Santa Comba, día 23, Auditorio Edificio Multiusos, ás 19 hrs
Santiago de Compostela, día 22, na praza Cervantes, ás 19.30 hrs
San Sadurniño, día 22
Taboada, día 23, no marco do Roteiro das Artes a partir das 19.30. Nenas e nenos do CEIP de Agolada recitarán poemas do libro Os soños na gaiola.
Vigo, día 23, na Casa Galega da Cultura (praza da Princesa, 2). 11 hrs
Vilalba, día 23, na Casa da Cultura, ás 12 hrs
Vilagarcía de Arousa, día 23, na Cafetaría Ravella (na praza Ravella), ás 12 hrs
Xermade, día 23, na Biblioteca Municipal, ás 12 hrs
Xinzo de Limia, día 23, na Biblioteca Municipal, ás 11 hrs
Compostela: lectura pública de textos de Manuel María
Arteixo: Manuel María na túa voz, o sábado 23 de maio
Obras finalistas dos Premios Gala do Libro Galego 2016
A
Asociación de Escritores e Escritoras en Lingua Galega (AELG), Asociación Galega de Editoras (AGE) e Federación de Librarías de Galicia convocan os Premios Gala do Libro Galego 2016, a celebrar o sábado 14 de maio de 2016 no Teatro Principal de Santiago de Compostela, na que se darán a coñecer as obras gañadoras.
(A Coruña, 15 de abril de 2016) Con esta convocatoria preténdese recoñecer a excelencia do traballo literario realizado no ámbito editorial ao longo do ano 2015 en Galicia. As obras gañadoras, sen dotación económica, serán determinadas por un xurado externo sobre unha listaxe de obras finalistas conformada polas bases asociativas das tres entidades convocantes.
Obras finalistas do Premios Gala do Libro Galego 2016
Ensaio
- Carlos Maside. Correspondencia [1928-1958]. Cartas inéditas e dispersas, María Esther Rodríguez Losada (comp.) e Anxo Tarrío Varela (edic.). Alvarellos-Consorcio de Santiago.
- Historia da literatura infantil e xuvenil galega, Blanca-Ana Roig (coordinadora). Xerais.
- No tempo de Follas Novas: unha viaxe pola literatura universal, María Pilar García Negro (edit.). Alvarellos Editora.
- Poesía Hexágono. Ollada e experiencia. Proposta e resposta nas aulas, VV. AA. Apiario.
Narrativa
- Os elefantes de Sokúrov, de Antón Riveiro Coello. Galaxia.
- Cabalos e lobos, de Fran P. Lorenzo. Xerais.
- Izan o da saca, de Xabier Quiroga. Xerais.
- …E os domingos, un croissant, de Ursula Heinze. Alvarellos.
- O último día de Terranova, de Manuel Rivas. Xerais.
Literatura infantil e xuvenil
- O home que sabía voar, de Xabier López López (ilustracións de Jacobo Muñiz). Tambre.
- O meu pesadelo favorito, de María Solar (ilustracións de María Lires). Galaxia.
- Teño uns pés perfectos, de María Solar. Kalandraka.
- Todos os soños, de Xavier Estévez (ilustracións de Marcos Viso). Tambre.
Libro ilustrado
- Balea, de Federico Fernández e Germán González. Kalandraka.
- Cadros dunha exposición. Modest Mussorgsky, de Xosé Cobas (texto de José Antonio Abad Varela). Kalandraka.
- Lendo lendas, digo versos, de Xosé Cobas (texto de Antonio G. Teijeiro e A. Reigosa). Xerais.
- O home que sabía voar, de Jacobo Muñiz (texto de Xabier López López). Tambre.
Iniciativa bibliográfica
- Cociña II, de André Arzúa, (fotografía e deseño de Alberte Sánchez Regueiro). Servizos Hosteleiros Arzúa S.L.
- Lendo lendas, digo versos, de Antonio G. Teijeiro e Antonio Reigosa (ilustracións de Xosé Cobas). Xerais.
Tradución
- A utilidade do inútil, de Nuccio Ordine, tradución de Carlos Acevedo, Faktoría K.
- Astérix. O papiro do César, de René Goscinny, Albert Uderzo, Jean-Yves Ferri e Didier Conrad, (trad. de Xavier Senín e Isabel Soto), Xerais.
- Aventuras de Alicia no País das Marabillas (Lewis Carroll), en tradución de Xavier Queipo. El Patito Editorial.
- Mocidade (Joseph Conrad), en tradución de Alejandro Tobar. Hugin e Munin.
Poesía
- 6 poemas 6. Homenaxe a Federico García Lorca, Suso Díaz e Helena Villar Janeiro (coords.). Biblos Clube de Lectores.
- A boca da terra, de Manuel Rivas. Xerais.
- Abrindo fiestras en carne viva, de Carlos López. Alvarellos.
- Dez anos na porta. Antoloxía poética 2005-2015, VV. AA. (A Porta Verde do Sétimo Andar). A Porta Verde do Sétimo Andar.
- oso, mamá, si?, de María Lado. Xerais.
- Zonas de tránsito, de Ramón Neto. Sotelo Blanco.
Teatro
- Raclette, de Santiago Cortegoso. Xerais
- Ela, piedade dos suicidas, de Xavier Lama. Baía Edicións
- Xogando con gatos, de Antón Cortizas. Xerais
Iniciativa cultural ou de fomento da lectura
- Culturgal.
- Espazo Lectura (Gondomar).
- Fundación Manuel María de Estudos Galegos.
- Praza das Letras – Concello de Carballo.
Proxecto literario na rede
- Caderno da crítica, de Ramón Nicolás. https://cadernodacritica.wordpress.com/
- Criticalia, de Armando Requeixo. http://armandorequeixo.blogaliza.org/
- Poétic@, de Fran Alonso. http://poetica.gal/
Xornalismo Cultural
- Diario Cultural.
- Montse Dopico.
- Sermos Galiza.
A Gala do Libro Galego 2016 conta co apoio do Concello de Santiago, Consellaría de Cultura, Deputación da Coruña, Centro Español de Derechos Reprográficos (CEDRO) e AGADIC.
A Coruña: proposta Manuel María, na túa voz, o 23 de abril
“O 23 de abril celébrase o “Día Internacional do Libro”. Desde a Fundación Manuel María de Estudos Galegos están a traballar na realización de multitude de actos simultáneos en toda Galiza consistentes na lectura pública da obra de Manuel María.
O evento servirá de homenaxe literaria e popular ao escritor ao que se lle dedica este ano as Letras Galegas, Manuel María, e á súa obra creativa.
Manuel María tivo unha moi importante vinculación coa cidade da Coruña. Xa nos anos cincuenta participa en diversos recitais poéticos na nosa cidade e foi tamén aquí, no Teatro Rosalía de Castro, onde se lle tributou unha grande homenaxe con motivo da súa xubilación no ano 1995. Pouco despois, unha vez que tamén se xubilou Saleta, escollen a nosa cidade para nela vivir até o seu falecemento o oito de setembro de 2004. Neste tempo foi unha personalidade de referencia para toda A Coruña.
Desde a Asociación Cultural Alexandre Bóveda estamos a colaborar coa Fundación Manuel María na organización desta homenaxe na nosa cidade para o día 23 de abril e por iso nos diriximos a ti para pedirche que participes neste evento, ben achegándote a gozar coa obra de Manuel María ou se así o desexas lendo algún texto de Manuel.
O acto comezará ás 12 da mañá no Museo de Belas Artes.
No caso de que queiras ler pregámosche que no lo comuniques neste correo irmandadesdafala@gmail.com e se xa che é posible, que poema ou texto vas ler de cara a intentar que non haxa repeticións.”
XXV Xornadas de Lingua e Literatura: un punto seguido arredor de Manuel María
Desde
Sermos Galiza:
“A Casa Museo Manuel María acolleu na xornada do sábado dúas iniciativas que xiraron arredor do autor ao que este ano se lle dedica o Día das Letras Galegas. Dunha banda, as XXV Xornadas de Lingua e Literatura da CIG-Ensino e da AS-PG e, doutra banda, a xuntanza de traballo da iniciativa Cultura que Une, que perfila actividades sobre as obras de Manuel María e Miguel Torga.
As XXV Xornadas de Lingua e Literatura, nas que participan arestora máis de medio cento de docentes, comezaron pasadas as 10:30 h, cunha palestra do estudoso e antólogo de Manuel María Manuel López Foxo. Baixo o título “A poesía de Manuel María: O País é tamén unha viaxe cara a dentro”, Foxo recuperou, con especial sensibilidade, a obra existencialista de Manuel María, a parte menos divulgada dos seus poemas.
Após a visita guiada á Casa Museo, as xornadas continuaron coa presentación dos recursos didácticos sobre Manuel María deseñados para Primaria e Secundaria. Anxo Gómez (CPI Vicente Otero Valcárcel) expuxo a unidade na que se traballan a lingua e a literatura a partir da escrita do autor nado en Outeiro de Rei, unha unidade que abrangue desde a sociolingüística, até calquera xénero literario, pasando todas as temáticas e destinada a todas as idades. Tamén presentou a súa unidade didáctica o Seminario Galán, que inclúe materiais en formato papel, en rede e soporte Edilm, un conxunto de traballos a disposición de quen quixer na web seminariogalan.org.
Xa durante a tarde tivo lugar o roteiro guiado por Outeiro de Rei, que levou as persoas participantes a coñeceren de primeira man a vida de Manuel María a través dos espazos referenciais da obra do autor. Da man de Alberte Ansede, María Calvo e Mateo Docampo, os presentes puideron descubrir a importancia da carballeira de Santa Isabel –unha das paisaxes máis fotografadas na tarde deste sábado- nos seus poemas, así como da Lagoa de Cospeito, entre outros recunchos. O roteiro complementouse coa lectura de poemas do autor homenaxeado neste 2016.
A fin das xornadas terá lugar a partir das 20h, co espectáculo de maxia a cargo do ilusionista Martín Camiña. (…)
A Casa Museo Manuel María tamén abeirou este sábado unha xuntanza de traballo no seo da iniciativa Cultura que Une na que participaron a Fundación Vicente Risco, a Tertúlia Araújo Correia, a Livraría Traga-Mundos de Vila Real e Ponte nas Ondas, amais de profesores e profesoras a título individual.
En declaracións a Sermos Galiza, Luís Martínez Risco sinala que a xornada deste sábado foi “unha continuidade da que tivo lugar o 3 de marzo para concretarmos a metodoloxía que nos permita facer intercambios de alumnado, agrupamentos escolares e de profesorado entre colexios de Galiza e de Portugal arredor do eixo das obras de Manuel María e Miguel Torga”. Non se trata só dun intercambio de alumnado, tamén se traballará nos eidos do patrimonio histórico, no ecolóxico, no lingüístico…
O grupo de traballo estudará até xuño o programa de actuación co fin de que no inicio de curso os centros poidan implementar as medidas acordadas de maneira flexíbel, segundo nos conta Luís Risco, da Fundación Vicente Risco.
Manuel María tamén foi o protagonista do roteiro que se desenvolveu este sábado no Val de Quiroga, arredor dos sonetos que o autor lle dedicou a este lugar. Na iniciativa participaron máis de medio cento de persoas.”
