Arquivos mensuais: Febreiro 2012

Coñécense os finalistas dos Premios da Edición

Publicado o por

Desde a Asociación Galega de Editores:
“O pasado 10 de febreiro rematou o prazo de entrega das votacións dos editores para os Premios da Edición do ano 2011. Os libros, autores e iniciativas pasarán agora á fase do xurado, integrado por Xosé Manuel Eyré, crítico; Isabel Ares, libreira; Montse Dopico, xornalista; Juan Blanco Valdés; editor; e Mari Luz Corral, bibliotecaria. O día 9 de marzo no Hotel A quinta da auga, en Santiago, e no transcurso da gala da edición, serán feitos públicos os gañadores das distintas categorías, recibindo o tradicional galardón da AGE, consistente nunha peza de prata.

LIBROS FINALISTAS PREMIOS DA EDICIÓN FASE DO XURADO

PREMIO ÁNXEL CASAL AO LIBRO DE FICCIÓN
Non hai noite tan longa, de Agustín Fernández Paz, editado por Xerais.
Deus xogando aos dados, de Fernando Méndez, editado por Sotelo Blanco.
Extramunde, de Xavier Queipo, editado por Xerais.
Centauros do deserto, de Marcos Calveiro, editado por Rodeira Edebé.

PREMIO ÁNXEL CASAL AO LIBRO DE POESÍA
Poesía completa de Lois Pereiro, de Lois Pereiro, editado por Xerais.
Bretemada 1917-1922, de Gonzalo López Abente, editado por de Alvarellos Editora.
Un mundo de mulleres, de Carmen Blanco, editado por Biblos.
O mariñeiro con cabalos matutinos baixo o vestido, de Elías Knörr, editado por Edicións Barbantesa.

PREMIO ÁNXEL CASAL AO LIBRO DE NON FICCIÓN
Conde Corbal. Obra gráfica, de varios autores, editado por Nova Galicia Edicións.
Guía das libélulas de Galicia, de Miguel Ángel F. Martínez, editado por Baía Edicións.
Loita de clases e represión franquista no mar , de Dionísio Pereira, editado por Xerais.
A guerra civil en Galicia e en España, de Federico Cocho, editado por Xerais.
A novísima dereita, de Manuel M. Barreiro, editado por 2.0 Editora.
Como defenderes os teus dereitos lingüisticos, de Carlos Callón, editado por Xerais.
O escano baleiro. No Caurel con Uxío Novoneyra, de Xulio Valcárcel, editado por Biblos .
As mulleres na Galicia do século XX, de Jesús de Juana e outros, editado por Ir Indo.
Amigos e sodomitas, de Carlos Callón, editado por Sotelo Blanco Edicións.
Vigo a 80 revolucíóns por minuto, de Emilio Alonso Pimentel, editado por Xerais.

PREMIO LOIS TOBÍO AO LIBRO TRADUCIDO
1Q84 Libros 1, 2, 3, de Haruki Murakami, traducidos por Mona Imai e Gabriel Álvarez, editado por Galaxia.
Sonetos de Shakespeare, traducido por Ramón Gutiérrez Izquierdo, editado por Xerais.
1984, de George Orwel, traducido por Fernando Moreiras, editado por Faktoría K.

PREMIO ISAAC DÍAZ PARDO AO LIBRO ILUSTRADO
Un can e un gato, ilustrado por Chené Gómez, editado por OQO Editora.
Lois Pereiro. Breve Encontro, ilustrado por Jacobo Fernández Serrano, editado por Xerais.
Fantasmas de luz, ilustrado por Miguel Anxo Prado, editado por Xerais.
Contos por teléfono, ilustrado por Pablo Otero, editado por Kalandraka Editora.

PREMIO NEIRA VILAS AO LIBRO INFANTIL E XUVENIL
O apalpador e a castaña máxica, de Xoán G. Otero, editado por Biblos.
Xa me tardan eses magos, de Mamá Cabra, editado por Galaxia.
Canto de Nadal, de Charles Dickens, editado por Kalandraka Editora.
A caza do gazafello, de Abraham Carreiro e Maties Segura, editado por Sotelo Blanco.
Alba, a princesa das sete coroas, de Amalia Pérez Otero, editado por Ir Indo.
Maxia, de Charo Pita, editado por OQO Editora.
A chave da Atlántida, de Anxo Fariña, editado por Xerais.

PREMIO XOSEFA IGLESIAS VILARELLE AO LIBRO EDUCATIVO
Xeografía de Galicia, de María Xosé Piñeira Mantiñán e Manuel Santos Solla, editado por Xerais.
Isto é Nova York, de Miroslav Sasek, editado por El Patito Editorial.
As mulleres en Galicia no século XX, de Jesús de Juana e outros, editado por Ir Indo.
Diccionario de Xerais de Primaria, de Manuel Rodríguez Alonso e Xosé Feixó, editado por Xerais.
Un cadro de Velázquez, de Claire D’Harcourt, editado por Faktoría K.

PREMIO ROSALÍA CASTRO Á INICIATIVA EDITORIAL
Colección de cociña infantil e familiar, editada por Ouvirmos.
Creación do selo Pulp Books, editada por Rinoceronte Editora.
Transformación de álbums ilustrados en series de animación audiovisual Os contos do camiño e Caracois, realizados por OQO Editora.

PREMIO XOSÉ MARÍA ÁLVAREZ BLÁZQUEZ AO AUTOR-AUTORA
Xavier Queipo.
Agustín Fernández Paz.
Antón Riveiro Coello.

A Deputación da Coruña entrega os 7 premios culturais que convocou en 2011

Publicado o por

“A Deputación da Coruña entregou a noite do luns 13 de febreiro os sete premios culturais que convocou en 2011 durante a IV Gala da Cultura, celebrada no Pazo de Mariñán, no municipio de Bergondo, nun acto que estivo marcado polo recente falecemento do histórico galeguista Isaac Díaz Pardo. (…)
A escritora Esther Bendahan, en nome dos premiados, agradeceu á Deputación coruñesa a súa implicación por apoiar a cultura nun momento en que “os creadores parece que teñen que escusarse por decidir dedicar o seu tempo, a súa vida, á súa obra”. “É un alivio para todos nós que haxa unha vontade de resistencia, que existan premios como os que outorga hoxe esta Deputación para que os creadores manteñan a súa esperanza e continúen os seus proxectos en busca da luz”, explicou a gañadora do premio de narrativa Torrente Ballester. Ademais de Esther Bandahan recibiron os seus galardóns o grupo Pulsar, gañador do IV Concurso de Rock; Sonia Higuera, distinguida co IV Premio Internacional de Arte Gráfica Jesús Núñez, e Ignacio Vilariño e Iván Suárez, gañadores do VII Premio de Cómic Castelao. Javier Martínez Campos recibiu o IX Premio de Composición Musical Andrés Gaos, mentres que galardón do XII Certame de Artes Plásticas Isaac Díaz Pardo compartírono Fruela Alonso Branco, Berta Álvarez Cáccamo, Antonio Carbajo Villaverde, Víctor Hugo Costa Alonso, Xabier de Sousa Alonso, Vitoria Diehl López, Carlos Maciá Fernández, Yolanda Martínez Dorda e José Andrés Santiago Igrexas. Finalmente, o XV Premio de Teatro Rafael Dieste foi recibido por Manuel Guede Oliva.

A Coruña: obradoiro O ollo da arte, impartido por Antía Otero

Publicado o por

O ollo da arte é un obradoiro impartido por Antía Otero onde coñecer, descubrir e valorar o feito contemporáneo e a creación artística actual a través dunha mirada propia. Percorreranse (valéndonos de nocións teóricas e propostas prácticas) os novos comportamentos artísticos, motivando que os participantes propoñan e fagan visibles as súas propias ideas, así como o traballo e o debate en grupo.
Celebrarase todos os luns entre o 12 de marzo e o 2 de xullo, de 19:00 a 21:00 horas, na aula de obradoiros de Normal (Paseo de Ronda, 47) da Coruña. O prezo é de 35 euros para membros da comunidade universitaria (25 euros en segunda matrícula) e 55 euros público xeral (45 euros en segunda matrícula), con dous créditos de libre elección.
O prazo de matrícula comprende desde o día 25 de xaneiro até o día 6 de marzo.
Nos obradoiros non haberá preinscripción. O solicitante dun obradoiro deberá recoller a folla de pagamento nas oficinas da Área de Cultura da Universidade da Coruña (Casa do Lagar, campus de Elviña) ou en Normal, a cal se entregará por rigorosa orde de chegada a fin de formalizar a matrícula. Unha vez dispoña da folla de pagamento, o solicitante dispón até o día seguinte para formalizalo e entregar o xustificante de ter pagado o obradoiro. A Área de Cultura dará de baixa e considerará non inscritas ás persoas que non atendan este requisito.
Máis información aquí.

Convocado o VIII Premio Rosalía de Castro para experiencias pedagóxicas. Unidades didácticas curso escolar 2011-2012

Publicado o por

A Fundación Rosalía de Castro, para conmemorar os 25 anos do Premio Rosalía de Castro para mestres e pedagogos, creou o Premio Rosalía de Castro para experiencias pedagóxicas, que vai xa na súa oitava convocatoria.
O certame pretende potenciar o coñecemento de Rosalía e da súa obra, referencia imprescindible na formación integral dos escolares. Alén dos seus valores literarios e lingüísticos, os textos rosalianos teñen unha enorme potencialidade como motivadores de propostas de traballo nas aulas de ensino obrigatorio. Por iso consideramos que a obra de Rosalía de Castro resultará un bo material para traballar na innovación pedagóxica.
Un dos eidos máis interesantes deste traballo é a elaboración de unidades didácticas adaptadas aos diferentes niveis de ensino obrigatorio, específicas de área, interdisciplinares ou globalizadoras, segundo a etapa na que se apliquen. E cumpríndose no ano 2012 o 175 aniversario do nacemento de Rosalía, propónselle ao profesorado e á comunidade educativa en xeral a realización dunha unidade didáctica que conmemore nos centros educativos tan importante efeméride.
Esta Unidade didáctica conmemorativa do 175 aniversario do nacemento de Rosalía de Castro ha desenvolver contidos biográficos da escritora e tamén os valores nos que creu Rosalía, contemporánea dos seus, avanzada do seu tempo e previsora dos comportamentos que habían de promoverse no futuro: o drama épico da emigración que sufriu a Galicia máis pobre e viven hoxe moitos pobos da humanidade; a problemática das mulleres con relación á igualdade, á creación e ao pensamento libre; e a denuncia da inxustiza, así como a defensa dos valores medioambientais, xa que ela foi unha extraordinaria cantora da paisaxe e da súa conservación.

A Matanza, 15 de xullo de 2011

BASES

1.- Poderán concorrer ao VIII Premio Rosalía de Castro para experiencias pedagóxicas as unidades didácticas,  desenvoltas en lingua galega, nos niveis obrigatorios do ensino durante o curso escolar 2011-2012, que xiren arredor do 175 aniversario do nacemento de Rosalía de Castro, considerando tamén a súa obra.
2.- Os aspirantes presentarán:
2.1. Unha unidade didáctica que conste, cando menos, dos seguintes apartados:
– Descrición do centro ou centros nos que foi aplicada.
– Profesorado que participa na experiencia.
– Alumnado ao que foi destinada.
– Obxectivos que se perseguiron.
– Contidos educativos que se desenvolveron.
– Metodoloxía aplicada.
– Relación do material de apoio seleccionado.
– Actividades propostas.
– Criterios e procedementos de avaliación.
– Valoración global do resultado.
2.2. Mostra significativa das actividades realizadas polo alumnado.
2.3. Certificación da dirección do centro ou centros que acredite a experiencia.
3.- A Unidade, asinada polo autor/a ou coordinador/a, presentarase por quintuplicado.
4.- O xurado valorará os seguintes aspectos:
– Idoneidade da selección de obxectivos e contidos.
– Idoneidade da selección de textos rosalianos.
– Selección e variedade do material de apoio.
– Implicación da comunidade educativa.
– Carácter innovador.
– Emprego das novas tecnoloxías.
– Atención á diversidade.
5.- Os traballos enviaranse por correo certificado, antes do 31 de maio de 2012, ao seguinte enderezo:

VIII PREMIO ROSALÍA DE CASTRO PARA EXPERIENCIAS PEDAGÓXICAS INNOVADORAS
FUNDACIÓN ROSALÍA DE CASTRO.
Casa da Matanza.
15917 PADRÓN (A Coruña)

6.- Concederanse dous galardóns:
– Primeiro premio: 3.000 euros e un lote de libros para o centro, así como diplomas acreditativos para os autores e os centros.
– Segundo premio: 1.500 euros e un lote de libros para o centro, así como diplomas acreditativos para os autores e os centros.
7.- O xurado terá capacidade para interpretar estas bases e poderá outorgar as mencións que considere oportunas. O premio poderá ser declarado deserto se, a seu xuízo, os traballos non teñen calidade suficiente. O fallo do xurado será inapelable.
8.- Os traballos premiados quedarán a disposición da Fundación Rosalía de Castro, que se reserva o dereito de expoñelos na súa aula pedagóxica e de publicalos para a súa divulgación. Os que non obtivesen galardón poderán retirarse no prazo dun mes a partir do día do fallo.
9.- O premio fallarase durante a primeira quincena de xuño e a entrega terá lugar o día 15 de xullo de 2012 no transcurso do acto que a Fundación Rosalía de Castro celebra anualmente para conmemorar o pasamento da escritora.”

As bases pódense descargar tamén aquí: Bases VIII Premio Rosalía de Castro para experiencias pedagóxicas.

Santiago: Picaversos, con Estíbaliz Espinosa, Manuel Cortés e Manuel Outeiriño

Publicado o por

O martes 14 de febreiro, a partir das 21:00 horas, no Modus Vivendi (Praza de Feixoo) de Santiago de Compostela, chega outra edición do ciclo de lecturas poéticas Picaversos, baixo o título Míticos, onde participarán Estíbaliz Espinosa, Manuel Cortés e Manuel Outeiriño.

Ourense: recital poético de Celsa Barja

Publicado o por

O martes 14 de febreiro, ás 19:30 horas, no Centro Cívico A Ponte (Rúa Eulogio Gómez Franqueira) de Ourense, Celsa Barja dará un recital poético especialmente dedicado á Asociación de Familiares de Enfermos de Alzheimer de Ourense (AFAOR). No acto, en que estará acompañada pola música de Israel Elíaz, realizarase, xunto ao público asistente, un Poema humano.

Nomeamentos en Galaxia

Publicado o por

Editorial Galaxia S.A., Merlín Comunicación S.L. e algunhas das Fundacións relacionadas coa editora están a proceder a un proceso de restruturación e actualización dos seus consellos. Unha das primeiras medidas foi o nomeamento de Xaime Isla Couto como Presidente de Honra das devanditas empresas e da Fundación que leva os apelidos da súa familia. Blanca Jiménez Alonso, viúva de Fermín Penzol, asume asemade a Presidencia de Honra da Fundación Penzol.
Benxamín Casal, ata agora vicepresidente de Galaxia e de Merlín Comunicación, foi nomeado presidente de ambas as dúas empresas no último consello de administración das mesmas, e Alfonso Zulueta de Haz asume a presidencia executiva da Fundación Penzol, que dende o falecemento de Francisco Fernández del Riego dirixe Francisco Domínguez.
Ao mesmo tempo, Xavier Martínez Cobas, profesor de Economía Financeira e Contabilidade da Universidade de Vigo e vencellado dende hai anos a estas institucións, foi nomeado tamén novo Conselleiro Delegado de Editorial Galaxia e Merlín Comunicación, empresas que segue dirixindo Víctor Fdez. Freixanes.
O anterior Conselleiro Delegado, Manuel Meixide, foi nomado Vicepresidente Segundo destas empresas. O Vicepresidente Primeiro segue a ser Alfonso Zulueta de Haz, e o Secretario Xeral de todas elas, así como das Fundacións, Antón Vidal Andión.
Os actuais nomeamentos responden a un proceso de renovación e incorporación de novos conselleiros que se irá facendo pública segundo se vaian confirmando oficialmente. Tanto Xaime Isla Couto como Blanca Jiménez Alonso pasan a ser Presidentes de Honra por razóns de recoñecemento e saúde. A presidencia da Fundación Isla Couto asúmea Cristina Novoa, esposa de Xaime Isla Couto.

A Coruña: conferencia Brasil, o país do presente, por Vivian Torres de Mello Rangel

Publicado o por

A terza feira 14 de febreiro, ás 20:00 horas, na Real Academia Galega (Rúa Tabernas, 11) da Coruña, terá lugar unha conferencia de Vivian Torres de Mello Rangel sobre Brasil, o país do presente. Imagens do Brasil dentro da literatura contemporânea, no ciclo Língua, Literatura, e Naçom da A. C. O Facho.

24 de febreiro, Día de Rosalía de Castro

Publicado o por

A Asociación de Escritoras e Escritores en Lingua Galega (AELG) anima á cidadanía a agasallar un libro en galego e unha flor no día do nacemento de Rosalía de Castro, do que este ano se cumpre o 175 aniversario.
A AELG convida a centros de ensino e concellos a participar do Día De Rosalía de Castro organizando actividades de promoción da obra da nosa escritora para conmemorar o aniversario do seu nacemento.
O 24 de febreiro está recollido oficialmente como Día de Rosalía de Castro pola Consellería de Cultura e Educación no seu Calendario do Libro e da Lectura.
A AELG solicitou aos concellos que declaren ese día 24 de febreiro como Día de Rosalía de Castro e que o recollan nas súas programacións culturais. A AELG anima a toda a cidadanía a participar desas actividades.
Por outra banda, a AELG abriu este blog para reflectir todas as actividades e celebracións dese día, convidando a participar nel a toda a cidadanía.

A Asociación de Escritoras e Escritores en Lingua Galega, pola súa parte, está organizando nas principais cidades e vilas lecturas públicas da obra rosaliana, nas que se lerá un manifesto solicitando a difusión do coñecemento da obra de Rosalía de Castro, en especial entre as xeracións máis novas que colectivamente contribuímos a coeducar, pois a súa poesía ou prosa reflexiva son base indispensábel para fomentar o amor á nosa lingua e comprender a nosa identidade cultural.
Estes son os actos confirmados até o momento (esta información actualizarase diariamente):

– Santiago de Compostela, 18:00 h. Panteón de Galegos Ilustres (PDF, JPG). Ás 20:00 h., no Espazo de El Correo Gallego, con motivo da presentación de Follas Novas, agasallarase aos presentes cunha rosa con versos.
– A Coruña, 18:30 h. Kiosko Alfonso (PDF, JPG).
– Lugo, 10:30 h. Salón de actos do IES Lucus Augusti  (PDF, JPG).
– Ourense, 19:00 h. Liceo de Ourense (PDF, JPG).
– Ferrol, 19:00 h. Galería Sargadelos (PDF, JPG), cun recital poético de textos de Rosalía a cargo de Rosa Martínez Dios, Xosé Leira e Rosa Méndez. Ademais, até o día 24 de febreiro, agasallará cun libro e unha flor aos clientes que merquen libros.
– Vigo, 19:30 h. Museo de Arte Contemporánea (MARCO)  (PDF, JPG).
– A Rúa, 18:30 h. Biblioteca Pública Municipal, Casa da Cultura (PDF, JPG).
– Pontevedra, 18:00 h. Casa das Campás (PDF, JPG).
– A Estrada, 19:00 h. Sala de conferencias e exposicións Caixanova (PDF, JPG).
– Monforte, 21:00 h. Centro de Interpretación do Viño de Monforte de Lemos (PDF, JPG).
– Sabarís, Baiona, todo o día. No Mercado da Tía Ni agasallarase a todos os seus clientes cun libro en galego.
– Allariz. Libraría Aira das Letras. O 24, 25 e 26 de febreiro, regalarase unha flor por cada libro comprado.
– Redondela, entre as 11:00 e 13:00 h. Lectura pública de textos da autora en Radio Redondela (cada persoa que participe poderá levar un poema ou un fragmento en prosa).
– Outes. Cada persoa que visite a Casa da Cultura de Outes, será agasallada cun libro en galego e unha flor.
– Oleiros. Bibliotecas Municipais. Xunto ás exposicións bibliográficas de obras de e sobre Rosalía, repartiranse marcapáxinas con poemas seus, e as persoas que leven algún fondo bibliográfico en préstamo serán agasalladas cun libro en galego.
– Muxía. O Concello de Muxía agasalla aos centros educativos do muunicipio cunha rosa e o libro Átonos, de Rosalía Fernández Rial.
– O Carballiño. 18:00 h. Diante do Casino do Carballiño, entidade que organiza o acto. Tras a lectura do texto sobre Rosalía sortearase un libro entre os/as participantes.

En cada un destes actos o coordinador/a, socio ou socia da AELG, lerá unha Declaración da Asociación de Escritoras e Escritores en Lingua Galega no Día de Rosalía de Castro 175 anos despois do seu nacemento, do que adiantamos o primeiro parágrafo:

Hoxe Rosalía como berro que reclama e revive en presente atemporal a reivindicar a presenza de lingua e identidade en todos os recunchos do noso país.

Moitos centros de ensino confirmaron que celebrarán actividades relacionadas co Día de Rosalía.
Así mesmo, varios concellos do país aprobaron ou están en vías de oficializar este día a raíz da proposta de moción que a AELG enviou aos distintos grupos municipais. Confirmamos este trámite nos concellos de A Coruña, A Estrada, A Guarda, A Pontenova, Arteixo, Arteixo, Betanzos, Cangas, Ferrol, Laracha, Muros, Narón, O Rosal, Ponteareas, Porto do Son, Redondela, Rianxo, Santiago, Teo, Tui, Valdoviño, Viana do Bolo, listaxe que irá aumentando nos próximos días segundo se vaian celebrando os plenos.

Rosalía de Castro é a escritora máis representativa da lingua e da literatura galegas. A publicación do seu libro Cantares Gallegos, o primeiro escrito integramente no noso idioma, desde a vontade firme e inequívoca do seu significado, sinala o inicio da restauración do uso escrito do noso idioma e o final de séculos de silencio e esquecemento.
A súa obra é un retrato do pobo galego e goza dunha total actualidade. Desde o século XIX Rosalía de Castro foi homenaxeada polas galegas e os galegos como poeta nacional, pois reclamou a redención da patria galega e asumiu a voz do seu pobo, voz que guiou permanentemente a súa obra e o seu pensamento. Esta galeguidade intrínseca dos seus textos, esta comunicación e entendemento permanente co seu pobo, ao se dirixir a el no seu idioma propio, foi o que a fixo tamén poeta de todos os pobos, chegando a formar parte da nómina de escritoras máis destacadas da literatura universal de todos os tempos.

Escola de Escritores/as da AELG: Obradoiro de creación literaria a cargo de Xavier Seoane en Perillo, Oleiros

Publicado o por

O día 14 de febreiro, ás 18:30 horas, na Biblioteca Central Rialeda (Perillo, Oleiros), comezará un Obradoiro de creación literaria impartido polo escritor e profesor Xavier Seoane, dentro do programa de Escolas de escritores-as da Asociación de Escritoras e Escritores en Lingua Galega.
Está dirixido a mozas/os (a partir de 15 anos) e adultas/os, realizarase os martes e terá unha duración de dez sesións (até o 8 de maio).
Debido a que son prazas limitadas é imprescindible inscribirse na biblioteca chamando ao teléfono 981 639 511 ou a través do correo electrónico biblioteca.rialeda@oleiros.org
Esta actividade ten prezo público para as persoas non empadroadas en Oleiros.
É unha iniciativa da Concellería de Cultura de Oleiros e da Asociación de Escritores en Lingua Galega e con ela preténdese animar a escribir textos literarios mediante a manipulación de formas lingüísticas e a imitación de modelos expresivos da nosa tradición literaria, aos que podemos chegar mediante o xogo e a descuberta da nosa propia creatividade.

Máis información aquí: Escola de escritores-as Obradoiro de creación literaria Concello de Oleiros.