O mércores, cuarta feira, 13 de abril, ás 19:00 horas, na Cafetaría Airas Nunes (Rúa do Vilar, 17) de Santiago, terá lugar un recital, organizado pola Agrupación Cultural O Galo, en colaboración co Colectivo Gai de Compostela e a asociación BOGA – Lésbicas de Galiza, que conmemora o 950 aniversario da institucionalización máis antiga dunha unión homosexual conservada en Galiza. No acto participarán Alicia Fernández, Andrea Nunes Brións, Antía Otero, Antón Fortes, Asunción Arias, Carlos Callón, Carlos Lixó, Fran Cortegoso, Gonzalo Hermo, Gonzalo Vázquez, Lois Diéguez, Luís González Tosar, María Rosendo, Marica Campo e Rosa Enríquez. O lema da convocatoria é unha expresión latina que se encontra no documento de unión entre Pedro Díaz e Muño Vandilaz: “in totos dies et noctes, in omne tempus vel tempora”; isto é: “en todos os días e todas as noites, para sempre”.
Arquivo da categoría: Aniversarios e efemérides
Xabier P. DoCampo: “A Real Academia Galega non me necesita”
Entrevista 
a Xabier P. DoCampo no Xornal de Galicia:
“O meu respecto pola Real Academia Galega é tanto que teño clarísimo que non me necesita. (…) Cando teñan unha vacante, se queren, que me pregunten a miña opinión; poden estar seguros de que nunca direi o meu nome. Pensei máis veces en ser santo, se cadra porque hai máis prazas, que en ser académico. Iso é unha teima de Jaureguizar e algún máis. Están tan empeñados en propoñernos a min e a Agustín Fernández Paz que fixemos un acordo: que nos dean unha cadeira para os dous, pero que nola dean canto antes, que estamos engordando” (…)
Os primeiros lectores de DoCampo foron o avogado Rafael Bárez e o profesor Francisco Silvosa, os seus compañeiros no seminario de Lugo. Cada noite, recorda, o cativo que foi escribía un conto e facía dúas copias con papel carbón. Unha para cada un. “Non deixei de escribir dende entón, pero até 1986 non publiquei. Cando rematei O misterio das badaladas xa tiña outra novela a medio facer e un libro de contos. Por moito que me quixese proletarizar, por moito que pensase que publicar era un vicio burgués, ao que me conducía aquilo era á frustración máis absoluta”. Para aforrar, resumiu o argumento do libro e mandóullelo a catro editoriais cunha carta na que lles explicaba a única condición da poxa: o primeiro en amosar interese quedaba co orixinal. Adiantouse Vía Láctea, onde chegara a súa oferta rebotada dende Ediciós do Castro. “Aínda teño pola casa as cartas de Xela Arias, de Xerais; Carlos Casares, de Galaxia; e alguén de Sotelo Blanco que xa non recordo pedíndome a novela. Xa chegaban tarde”.”
A Coruña: charla musicada A poesía de Álvaro Cunqueiro, con César Morán
O martes 
5 de abril, ás 20:00 h., no Kiosko Alfonso (Xardíns de Méndez Núñez) da Coruña, con entrada libre até completar capacidade, prosegue o ciclo Cinco días con Cunqueiro, organizado pola Concellaría de Cultura en homenaxe ao autor mindoniense, do que este ano se cumpre o centenario do seu nacemento, coa charla musicada: A poesía de Álvaro Cunqueiro, a cargo de César Morán.
A Coruña: Notas ao documental da AS-PG: ‘Don Álvaro Cunqueiro ou o camiño da memória’, conferencia de Miguel Mato
O luns 
4 de abril, a partir das 20:00 h., no Kiosko Alfonso (Xardíns de Méndez Núñez) da Coruña, con entrada libre até completar capacidade, comeza o ciclo Cinco días con Cunqueiro, organizado pola Concellaría de Cultura en homenaxe ao autor mindoniense, do que este ano se cumpre o centenario do seu nacemento, coa conferencia de Miguel Mato: Notas ao documental da AS-PG: ‘Don Álvaro Cunqueiro ou o camiño da memória’.
Achegarte: O misterio das badaladas, de Xabier P. Docampo, edición 25º aniversario
3C3 Editores cumpre 10 anos
“Nesta 
segunda semana do mes de marzo de 2011 fará dez anos da fundación en Santa Comba de Xallas do selo editorial tresCtres Editores, 3C3. Respondendo a unha iniciativa dos empresarios das artes gráficas, irmáns Pichel López –imprenta Eurográficas–, dous profesores do IES Terra de Xallas –X. Amancio Liñares Giraut (Xeografía e Historia) e Antonio Puentes Chao (Lingua e Literatura Galegas)– poñían a andar este proxecto, asumindo colexiadamente a súa dirección editorial. Cando se está a cumprir este 10º aniversario de 3C3 son xa un cento os títulos editados ó longo desta década, 2001-2011, cunha xeitosa nómina de autores. Tendo en conta as súas tiraxes medias, pódese afirmar que dende aquela uns cen mil exemplares no seu conxunto pasaron a enriquecer o mundo editorial, continuando no século XXI a facer realidade aquilo que se lle dicía ós medios na xuntanza fundacional: queremos seguir facendo posible hoxe aquí o milagre de Johannes Gutenberg. 3C3 continúa arestora cos seus proxectos de coleccións e edicións. Proximamente ten proxectada a renovación da páxina web tresctres.com, enchéndoa de novos deseños, recursos e contidos. Séguese na idea de editar ó redor dunha ducia de novos títulos cada ano, seleccionando ben os orixinais e coidando a calidade, interese e variedade das súas edicións.”
Santiago: exposición conmemorativa da primeira década da Asociación Cultural O Galo
Do
martes 15 de marzo ao martes 19 de abril, con horario de 18:30 a 21:00 h., no local da Asociación Cultural O Galo (Praza de San Miguel dos Agros 5, baixo) de Santiago de Compostela, terá lugar unha mostra conmemorativa dos 10 primeiros anos de vida desta Asociación, con motivo dos 50 anos da súa existencia. Organizada pola Fundación 10 de marzo en colaboración co Galo e a Concellaría de Cultura, inaugúrase o martes 15 de marzo ás 20:00 h. Deixamos aquí este díptico coa información: Exposición conmemorativa O Galo 2011.
Actos de homenaxe a Álvaro Cunqueiro
Laiovento: “Se aguantamos 20 anos, seguiremos”
Longa 
reportaxe sobre Laiovento en Galicia Hoxe:
“(…) O director de Laiovento [Francisco Pillado] insiste, por outra banda, en desbotar o tópico do mundo editorial galego como un sector subvencionado por cartos públicos. “O que fai a Xunta é mercar libros para dotar o sistema de bibliotecas galego. Vendémoslles libros, cun desconto importante. Niso consiste a axuda, non hai subvencións”, remarca.
Respecto disto, Suso Couceiro opina que o papel da Xunta debería ser, máis ben, “crear as condicións para que as empresas puidesen funcionar sen axudas. Favorecer, por exemplo, a comercialización dos libros, promocionar os libros. Se as editoras venden directamente nas bibliotecas e nos centros de ensino, nin os profesores nin os alumnos van ás librarías. Hai 20 anos era moito máis limitado o campo das editoras. E eu creo que as editoras aínda deben aumentar moito: ten que haber máis, e máis grandes, e teñen que publicar máis. Eu hai moito que digo que me gustaría que houbese tantas librarías como tabernas, en vez de ir pechando editoras e librarías”, comentou.
Para Pillado, a promoción do libro é tamén unha das eivas que aínda se manteñen. “Tería que haber festas da cultura galega que chegasen a todos os recantos do país. Festas que levasen o libro, a música, o teatro, a todos lados. E non só un Día das Letras Galegas. Moitos libreiros non contrubúen, tampouco, a visibilizar o libro galego, pois non poñen os libros galegos nos escaparates. Non é o caso de Suso, claro, unha das persoas que máis saben de libro galego, e que nos presta o seu almacén para os nosos libros, o seu local para o que precisemos…”, subliñou. (…)”
