Arquivo da categoría: Asociación de Escritoras e Escritores en Lingua Galega

A Coruña: XXVII edición de Galeusca, do 29 de outubro ao 1 de novembro

Publicado o por

Organizados pola Asociación de Escritores en Lingua Galega, os encontros Galeusca chegan á súa XXVII edición, congregando na cidade da Coruña, entre os días 29, 30 e 31 de outubro e o 1 de novembro, a escritores e escritoras da AELG, da Euskal Idazleen Elkartea e da Associació d´Escriptors en Llengua Catalana.
As sesións da XXVII Congreso Galeusca celebraranse na Biblioteca de Estudos Locais (rúa Durán Loriga s/n.) da Coruña, baixo o epígrafe Literatura en galego, éuscaro e catalán: unha viaxe con futuro.
O XXVII Congreso Galeusca promoverá neste 2010 o debate ao redor da importancia das nosas literaturas en lingua propia como subministradoras de contidos para unha fértil industria cultural que a todos e todas sen excepción preocupa e interesa, pois na lingua e na literatura susténtase a identidade senlleira dun pobo, unha historia pensada e debuxada tamén polos seus escritores e escritoras, voces reveladoras dunha viaxe colectiva cara un país con futuro propio. Para falar destes aspectos e doutros puntos de vista que o tema suxira, distribúese o programa:

Venres, 29 de outubro:
Chegada das delegacións
22:00 Cea (Restaurante A Penela –Praza de María Pita, 12–).

Sábado 30 de outubro
10:00-11:30 Mesa redonda: A literatura como fornecedora de contidos da industria cultural: a literatura e o audiovisual, coordinada por Raúl Veiga:
• Héctor Carré
• Harkaitz Cano (elaboración do relatorio) | Ander Iturriotz (relator)
• Manel Bonany

11:30-12:00 Pausa café
12:00-13:30 Mesa redonda: As viaxes na literatura, coordinada por Xulio L. Valcárcel:
• Anxo Angueira
• Urtzi Urrutikoetxea
• Ignasi Riera
14:15 Xantar (Restaurante A Penela –Praza de María Pita, 12–).
17.00: Percorrido Rosaliano pola Coruña, por Diego Pardo Amado (con saída na Rúa do Príncipe,3 –Cidade Vella–).
18.30: Recepción na Casa do Concello da Coruña (Praza de María Pita, 1).
22.00 Cea (Restaurante A Penela –Praza de María Pita, 12–).

Domingo 31 de outubro
10:00-11:30 Asemblea da Federación Galeusca.
11:30-12:00 Pausa café.
12:00-13:30 Mesa redonda: A literatura como fornecedora de contidos da industria cultural: a literatura como modelo de convivencia de vellos e novos soportes, coordinada por Tati Mancebo:
• Marcos S. Calveiro
• Nikolas Zimarro
• Guillem-Jordi Graells
14.15 Xantar (Restaurante Ruído en la cocina –Praza de María Pita, 1B–).
19:00-20:00 Recitado/Lectura de textos + Música:
• Olalla Cociña e Dores Tembrás
• Nikolas Zimarro
• Miquel Bezares
• Xabier Díaz (música).
22.00 Cea (Restaurante Ruído en la cocina –Praza de María Pita, 1B–).

O luns 1 de novembro regresarán as delegacións invitadas.

Vigo: Narrativa galega recente, con Xosé Monteagudo e Begoña Caamaño, no V Ciclo Escritores/as na Universidade

Publicado o por

O V Ciclo de mesas redondas Escritores/as na Universidade continúa o xoves 21 de outubro a partir das 12:00 h. no Salón de Actos da Facultade Filoloxía e Tradución da Universidade de Vigo, coa participación de Xosé Monteagudo e Begoña Caamaño na mesa redonda Narrativa galega recente, onde os autores lerán fragmentos da súa prosa comentando os pormenores da súa actividade como creadores. O acto será presentado por Camiño Noia. Organizado pola AELG e a Facultade de Tradución de Vigo.

Santiago: II Xornada da Crítica, A crítica e a Literatura Infantil e Xuvenil

Publicado o por

O venres 22 de outubro desenvólvese a II Xornada da Crítica, que tratará sobre A crítica e a Literatura Infantil e Xuvenil, organizada pola Asociación de Escritores en Lingua Galega e o Consello da Cultura Galega. O programa é o seguinte:
10:30 h. Inauguración, a cargo de Ramón Villares, Presidente do Consello da Cultura Galega, Cesáreo Sánchez Iglesias, Presidente da AELG, e Blanca-Ana Roig, en representación da Sección de Crítica Literaria da AELG.
11:00 h. Conferencia: A crítica literaria académica da Literatura Infantil e Xuvenil galega, por Isabel Mociño González (Universidade de Santiago), presentada por Isabel Soto López (Universidade de Santiago).
12:30 h. Conferencia: A crítica do libro infantil e xuvenil na prensa, por Xosé Manuel Eyré (Comisión Executiva da sección de Crítica Literaria Galega), presentado por Eulalia Agrelo Costas (Universidade de Santiago).
16:45 h. Mesa redonda sobre A Literatura Infantil e Xuvenil na crítica literaria ibérica, con Caterina Valriu (Universidade das Illas Baleares), Mari Jose Olaziregui (Universidade do País Vasco), Mª Victoria Sotomayor (Universidade Autónoma de Madrid) e José António Gómes (Escola Superior de Educação do Instituto Politécnico do Porto), moderada por Blanca-Ana Roig Rechou (Universidade de Santiago).
18:15 h. Debate entre todos os asistentes: Presenza e ausencia da crítica literaria sobre a Literatura Infantil e Xuvenil, coa moderación de Mar Fernández Vázquez (Universidade de Santiago) e Ana Margarida Ramos (Universidade de Aveiro).

Ourense: VII Encontro de Escritores/as de Ourense

Publicado o por

O próximo venres 22 e o sábado 23 de outubro terán lugar, no Liceo Recreo Ourensán, o VII Encontro de Escritores/as de Ourense, continuación dos Encontros iniciados polo Clube Alexandre Bóveda e que continuaron da man de Marcos Valcárcel e da Sección de Literatura do Liceo, nunha nova xeira na que Liceo, Gremio LiterAuria de Escritores, Libreiros e Editores, e a AELG, dan continuidade e reformulación aos Encontros neste ano 2010, coa colaboración, nesta ocasión, do Círculo Poético Ourensán. Todos os escritores ourensáns de residencia, adopción ou afección están especialmente convidados a participar nas actividades previstas, que inclúen un coloquio inaugural, unha sesión musical, a librería do encontro (cunha ampla selección de temáticas e autores ourensáns), a serie de “presentacións express” de libros editados en Ourense ou de temática ourensá editados no 2010, un mercado de manuscritos, a escritura, edición e posta á venda dun libro en 24 horas (Relato Express) en complicidade co público, e un recital poético onde o protagonista será Víctor Campio. Todo o programa pode ser consultado neste arquivo: Programa do VII Encontro de escritores-as de Ourense 2010.

A Coruña: presentación de En defensa do poleiro

Publicado o por

O xoves 21 de outubro ás 20:00 h., na Fundación Caixa Galicia (Cantón Grande) da Coruña, preséntase En defensa do poleiro, publicado por Toxosoutos, libro colectivo, iniciativa da Plataforma en defensa do uso público e educativo do mosteiro de Celanova, que contou coa colaboración da Asociación de Escritores en Lingua Galega (AELG) e no que participaron máis de 60 escritores galegos. No acto estarán presentes os representantes da Plataforma, con Xoán Carlos Domínguez Alberte á cabeza,  o presidente e secretaria da AELG, Cesáreo Sánchez Iglesias e Mercedes Queixas, así como a totalidade dos autores do entorno coruñés que participan nesta iniciativa: Olga Patiño, Diana Varela, Xulio López Varcárcel, Lino Braxe, Paco Souto e Francisco X. Fernández Naval. Expoñeranse tamén as ilustracións da pintura Mané Boán que ilustran o libro e proxectarase o audiovisual: O Iesplicable.

Actividades do derradeiro trimestre do 2010 organizadas pola AELG

Publicado o por

A Asociación de Escritores en Lingua Galega remata estes días os derradeiros preparativos dun trimestre cheo de actividades, das que cómpre salientar:
– O V Ciclo de mesas redondas Escritoras/es na Universidade, a celebrar entre o 7 de outubro e o 4 de novembro no Salón de Actos da Facultade de Filoloxía e Tradución da Universidade de Vigo, con participación de Estíbaliz Espinosa, Dores Tembrás, Xosé Monteagudo, Begoña Caamaño, Lara Bacelo e María Lado.
– En colaboración co Consello da Cultura Galega organizase a II Xornada da Crítica baixo o epígrafe A crítica e a Literatura Infantil e Xuvenil, que acollerá a cidade de Compostela o 22 de outubro. Participarán nas ponencias e nas mesas redondas destacados especialistas no tema, como Isabel Mociño González, Xosé Manuel Eyré, Caterina Valriu, Mª Jose Olaziregui, Mª Victoria Sotomayor e José António Gomes.
– Co patrocinio de CEDRO, Deputación Provincial da Coruña e Concellaría de Cultura da Coruña, o V Encontro de Escritores/as novos/novas celebrará o 6 de novembro tres mesas redondas sobre o estado da poesía, a importancia dos premios literarios e a literatura galega hoxe ante o seu idioma, moderadas, respectivamente, por Antía Otero, Francisco Castro e Marta Dacosta.
– Lugo acollerá, o 5 e o 6 de novembro, co patrocinio da Área de Cultura da Deputación Provincial e a coordinación de Antonio Reigosa e Isidro Novo, as III Xornadas de Literatura de Tradición Oral, centradas na Mitoloxía da morte: agoiros, ánimas e fantasmas, con participación de Marcial Gondar, Joan Soler, Camiño Noia e Xoán Ramiro Cuba.
– Tocante as Polafías, coordinadas por Antonio Reigosa, o calendario das programadas é como sigue: Moaña, 30 de outubro; Chantada, 6 de novembro; Maceda, 13 de novembro, e A Fonsagrada, 20 de novembro.
– A XXVII edición do Galeusca, baixo título xenérico Literatura en galego, éuscaro e catalán: unha viaxe con futuro, ocupará a actividade cultural da cidade da Coruña entre o 29 de outubro e o 1 de novembro. Temas como as viaxes na Literatura, ou a Literatura como fornecedor de contidos da industria cultural centrarán as mesas redondas nas que participarán escritores e escritoras galegos, vascos e cataláns.

Por outra banda, en decembro de 2005 a AELG e a Consellaría de Innovación e Industria, a través da Dirección Xeral de Promoción Industrial e da Sociedade da Información (DXPISI), asinaron un protocolo de intencións cuxo principal interese era a creación dun novo espazo virtual de divulgación do sistema literario galego, aproveitando os fondos documentais da Aelg. Este marco de colaboración deu lugar a un convenio que permitiu a creación dentro da web da AELG, do Centro de Documentación da AELG, un lugar referencial na rede para coñecer os nosos escritores/as e a súa obra, e que arrancaba coa dixitalización de documentos e a creación do software necesario para a súa publicación na web. Da necesidade da súa creación dá conta o grande aumento de visitas que tivo o portal durante os últimos cinco anos, en que pasou das 200.000 iniciais a exactamente 5.124.815 visitas a día de hoxe, debido á aquela iniciativa, que posteriormente foi incorporando máis contidos en seccións desenvolvidas a medida, que reflicten a actividade da Asociación e a dos seus socios e socias e que permiten que o público coñeza máis de preto os escritores e escritoras aos que len.

A Coruña: rolda da prensa da AELG

Publicado o por

Hoxe, 15 de setembro, ás 17:00 h., a AELG (á que lle cabe na actualidade a presidencia da Federación Galeusca de asociacións de escritores/as en lingua galega, catalá e vasca), convoca unha rolda de prensa na Sala 3 do 8º andar do Edificio de Sindicatos da Coruña (Avenida de Alfonso Molina, s/n) co obxecto de explicar a Proposición non de lei Medidas para que o Ministerio de Cultura asuma a multiculturalidade e plurilingüismo existente no Estado no sector da literatura, que se verá hoxe mesmo na Comisión de Cultura do Congreso dos Deputados a instancia da Federación Galeusca de asociacións de escritores/as en lingua galega, catalá e vasca. Participan: Cesáreo Sánchez Iglesias, presidente da AELG e da Federación Galeusca, e Mercedes Queixas Zas, secretaria xeral da AELG.

AELG: acto cívico e reivindicativo en lembranza do traslado dos restos mortais de Rosalía de Castro

Publicado o por

A Asociación de Escritores en Lingua Galega (AELG) vai celebrar mañá xoves 15 de xullo un acto cívico e reivindicativo en lembranza do traslado dos restos mortais de Rosalía de Castro -que tivo lugar o 25 de maio de 1891-, e para que se garanta o acceso público ao Panteón dos Galegos Ilustres.
O acto conta co apoio e colaboración de máis de 200 entidades e colectivos, entre asociacións e fundacións de todo o país.
Un tren, identificado como Follas Novas, partirá da estación da Matanza, ao carón da casa de Rosalía, o xoves día 15 de xullo ás 17,45 horas, para facer o traxecto Padrón-Compostela. Unha hora antes, ás 16,45, haberá unha concentración na colexiata de Santa María de Iria, no cemiterio de Adina, onde o presidente da AELG, Cesáreo Sánchez, informará do sentido dos actos, á vez que se lerá un poema de Rosalía de Castro.
Na estación de Compostela agardará a comitiva restante, actuando a banda municipal. Xa en Santiago, o cortexo sairá pola rúa do Hórreo cara a Praza do Toural, primeira parada da comitiva, onde haberá unha lectura de tres poemas de Cantares Gallegos, para continuar pola Praza da Universidade e pola Praza de Cervantes, onde se lerán outros poemas de Rosalía.
Finalmente, en San Domingos de Bonaval celebrarase unha audición do Ángelus, de Massenet, e unha lectura de poemas de Follas Novas, intercalando actuacións de diversos grupos musicais e artistas, para rematar o acto coa lectura dun comunicado reivindicativo da figura de Rosalía de Castro, cando se cumpren 125 anos da súa morte, e para que se garanta o acceso público ao Panteón dos Galegos Ilustres, unha vez coñecida a intención do Arcebispado de Santiago de Compostela de pechar as súas portas, despois dun litixio que lle outorga a titularidade do panteón á Igrexa.

PROGRAMA DO ACTO CÍVICO E REIVINDICATIVO

16.45 Concentración na colexiata de Santa María de Iria, cemiterio de Adina:
Lectura dun poema de Rosalía e marcha a pé até a estación da Matanza, ao carón da casa de Rosalía, para tomar o tren deica Compostela.
17.45 Saída do tren cara a Santiago
18.00 Recepción do tren “Follas Novas” na estación de Santiago de Compostela
Onde estará agardando a comitiva restante que non acudiu ao cemiterio e que se sumará neste momento ao cortexo a pé polas rúas compostelás, con actuación da banda municipal. Saída pola rúa do Hórreo cara a Praza do Toural.
18.45 Praza do Toural, primeira parada da comitiva.
Lectura de 3 poemas de Cantares Gallegos.
19.15 Praza da Universidade
Audición do Pietat Signore, de Stradella; lectura doutros tres poemas de Cantares Gallegos.
19.30 Praza de Cervantes
Escaparates da Libraría Couceiro dedicados ás obras de Rosalía. Lectura doutros tres poemas.
19.45 San Domingos de Bonaval
Audición do Ángelus, de Massenet, lectura de poemas de Follas Novas, intercalando actuacións dos grupos musicais ou artistas participantes, lectura do comunicado/manifesto sobre os 125 anos de Rosalía e a reivindicación de apertura ao público do Panteón.
Canto do Himno Galego.

Máis información (coa listaxe das entidades que apoian o cortexto cívico) pódese consultar aquí.