A exposición sobre o “cadáver exquisito” promovido na rede por Igor Lugris foi inaugurada o sábado 31 na galería Dosmilvacas.arte de Ponferrada, adubada con música e recitado de poemas. Numerosos visitantes asistiron ao acto que foi recollido por varios medios de comunicación. Máis información no blogue do poeta Ovnis e isoglossas.
Arquivo da categoría: Poesía
Actividades da A. C. Alexandre Bóveda
A Asociación Cultural Alexandre Bóveda informa das próximas actividades previstas:
ABRIL
Martes 10: Presentación do libro de poesía Hoxe que vén o vento do sur, de Miguel Sande, coa participación do autor, de Pilar Pallarés e do editor Miguel Anxo Fernán-Vello, ás 20:30 h., no salón de actos da Asociación.
Luns 16: Curso de Recursos informáticos en galego, que se desenvolverá os días 16, 18, 23, 25 de abril e 2 de maio, de 20:30 a 22:30 hs., coa colaboración de “Net Informática”. Aberto prazo de inscrición.
Martes 17: Curso de Recursos informáticos en galego, que se desenvolverá os días 17, 19, 24, 26 de abril e 3 de maio, de 20:30 a 22:30 hs., coa colaboración de “Net Informática”. Aberto prazo de inscrición.
Martes 24: Conferencia con motivo do Día das Letras Galegas sobre a figura de María Mariño, a cargo de María Pilar García Negro, ás 20:30 hs., no local da asociación.
Mércores 25: Mesa redonda Enerxías renovábeis e desenvolvemento sustentábel, con Anxo Calvo (Director Xeral de Industria), Alexandre García (representante de ADEGA) e Xosé Antonio Diéguez (representante da Asociación de propietarios de terreos VENTONOSO), ás 20:00 h. na Aula de cultura de Caixa Galiza, situada na rúa Médico Rodríguez.
Domingo 29: Excursión para participar na Iª xuntanza de sendeirismo As Mariñas-Culleredo 2007. A ruta partirá dende Orro e inclúe xantar en común co resto de grupos participantes e un percorrido de 15 Km. O prezo é de 10 €. Aberta a inscripción.
AVANCE DO MES DE MAIO
Martes 8 e xoves 10: Curso intensivo de galego, intitulado “Por un modelo digno de lingua”, das 20:00 h. até ás 22:00 hs., no salón de actos da asociación, a cargo dos profesores Xosé Ramón Freixeiro Mato e Xosé Manuel Sánchez Rei. Inscrición gratuíta.
Martes 22: Conferencia a cargo do escritor portugués José Braga-Amaral, que falará sobre a “A Visión da Galiza na literatura dos escritores do Douro: Miguel Torga, Camilo Castelo Branco e João Araujo-Correia”, ás 20:30 h., no salón de actos da Asociación.
Venres 25: Concerto do grupo Na virada, a presentar o seu último traballo, “Solaina”, ás 21:00 hs., no Fórum Metropolitano do Parque Europa.
Homenaxe a Cipriano Fernández en Fisterra
O venres 30 foron inauguradas en Fisterra as Xornadas de homenaxe ao republicano Cipriano Fernández, alcalde da vila fusilado polo réxime franquista. Con sesións tamén no 2 e no 4 de abril, a homenaxe contará coa presenza dos escritores Xesús Alonso Montero, Xosé Luis Axeitos, Modesto Fraga, Miro Villar, Marcos Valcárcel e Yolanda López, entre outras persoas da cultura e da política.
Igor Lugrís lanza na rede un “cadáver exquisito” no que participaron 75 persoas
«A arañeira está chea de “cadáveres” poéticos. A idea do cadáver exquisito -un texto con vontade literaria, escrito por diferentes persoas, que van achegando novas partes para ese escrito- tomou forma na rede da man do escritor galego Igor Lugrís. A partir do verso Há umha certa luz incomprensível na distáncia, que o poeta -nado en Melide e residente no Bierzo- lanzou a través da arañeira a finais de febreiro deste ano, xa recibiu até 60 “cadáveres” nos que participaron máis de 75 persoas». (Galicia Hoxe)
Véxase tamén o blogue de Igor Lugris Ovnis e isoglossas.
Nace Espoesía, rede poética en todas as linguas do Estado
(Vieiros).
Día mundial da poesía: presentación do cartaz “Poetas de Galiza”
A Asociación de Escritores en Lingua Galega, coa colaboración da Consellaría de Cultura e Deporte a través da súa D. X. de Creación e Difusión Cultural, e cumprindo cun dos seus principais obxectivos (a visibilización da figura dos nosos escritores/as), desenvolveu a idea de elaborar unha serie de carteis que nos axuden a poñerlles imaxe aos/ás nosos/as Poetas, e cuxo primeiro froito agora presentamos, coincidindo coa celebración do Día Mundial da Poesía este 21 de marzo.
Este cartaz, do que se imprimiron 20.000 exemplares, foi xa distribuído por todo o país. (Véxase en “Novidades” da web da AELG)
Presentación d’ “Os ríos pasan cheos de Deus”, de Victorino Pérez
Os ríos pasan cheos de Deus é unha antoloxía da poesía relixiosa en galego que inclúe unha importante representación da poesía portuguesa nos Séculos Escuros en Galiza. lnclúe tamén unha longa introducción sobre o que o autor entende por poesía relixiosa e a súa presenza na literatura galega. Prólogo de Xesús Portas.
A presentación será no marco excepcional dos 30 anos da revista Encrucillada, o próximo venres 23 de Marzo ás 19 h. no Consello da Cultura Galega (Pazo de Raxoi, Santiago de Compostela). Tras das palabras de Andrés Torres Queiruga e o relatorio de Ramón Villares Paz polo evento de Encrucillada, presentarán o libro a nova directora de Toxosoutos, Xesús Portas Ferro e mais o autor.
Día mundial da poesía / World Poetry Day 2007
O P.E.N. Clube de Galicia e o Consello da Cultura de Galicia organizan un recital poético que contará coa presenza de Helga Moreira, Carlos Marzal, Eva Rumí, Miguel Anxo Fernán-Vello, Luis G. Tosar e Manuel Rivas. Terá lugar hoxe 21 de marzo ás 19:30 horas no Auditorio do Consello da Cultura Galega (Pazo de Raxoi, Praza do Obradoiro, Santiago de Compostela).
Presentación de Volverlles a palabra
A presentación do libro Volverlles a palabra. Homenaxe aos represaliados do franquismo terá lugar no Ateneo de Ourense o venres 23 de marzo de 2007 ás 20:00 hs. Intervirán: Representante do Ateneo de Ourense, Xosé Carlos Sierra (delegado da Consellería de Cultura e Deporte en Ourense), Xoán Carlos Domínguez Alberte (coordinador da publicación), Baldo Ramos (coordinador da publicación), Xesús Alonso Montero (prologuista do libro). Lerán textos literarios: Francisco X. Fernández Naval, Chus Pato, Manuel Outeiriño, Baldo Ramos, Xoán Carlos Domínguez Alberte, Manuel Vilanova e Víctor Campio.
Presentación do libro de poemas “Obertura sen heroe”
O acto de presentación do libro de poemas Obertura sen heroe (gañador do 1º Premio Antón Tovar), de Yolanda López, terá lugar o vindeiro venres 16 de marzo ás 20:15 horas no Salón Nobre do Liceo de Ourense. Contará coa intervención de Marcos Valcárcel, Delfín Caseiro e a propia autora. Será ofrecido tamén un recital a cargo de Teresa Devesa e Loly Conde, acompañadas ao piano por Ángel Losada.
