A Asociación Cultural Alexandre Bóveda informa que mañá, martes 23 de outubro, a partir das 21:00 horas, terá lugar no mesón A saimia (R/ Emilio Pardo Bazán), unha homenaxe ao falecido escritor e poeta Lois Pereiro. A homenaxe, aberta ao público en xeral, consistirá nun recital poético-musical e nunha proxección fotográfica organizados polo Colectivo Poético “Amor e desamor”. (Asociación Cultural Alexandre Bóveda)
Arquivo da categoría: Recitais
Galeguia: mesa redonda e recital poético n’ A Coruña
Entre as actividades programadas do “Galeguia. Encontro con Cabo Verde, para o venres 19 de outubro, n’ A Coruña, figuran as seguintes:
-Mesa redonda “Letras qu unen”, ás 17:00 horas no Kiosco Alfonso, coa participación de dous escritores cabo-verdianos e dous escritores galegos, presentados por unha experta en literaturas lusófonas, que falarán sobre a lingua galego-portuguesa como ferramenta útil de traballo: Felisa Rodrigues (profesora de literaturas africanas en lingua portuguesa na Universidade de Santiago de Compostela), Carlos Quiroga (escritor galego), Xavier Alcalá (escritor e enxeñeiro de telecomunicacións), Germano Almeida (escritor cabo-verdiano) e José Vicente Lopes (escritor e xornalista cabo-verdiano).
-Recital poético “Cabo Verde lírico”, ás 19:00 horas no Kiosco Alfonso, en que poetas galegos recitarán poesía cabo-verdiana: Yolanda Castaño, María Lado, Lucía Aldao, Estevo Creus, Enma Couceiro e Xavier Vásquez Freire.
Lucía Aldao na Galería Sargadelos d’ A Coruña
O martes 16 de outubro, ás 20:00 horas, a Galería Sargadelos da Coruña (Rúa Real, 56) contará coa presenza de Lucía Aldao nunha nova edición do ciclo quincenal “Martes Literarios”.
“Galeguia. Encontro con Cabo Verde” n’ A Coruña e Compostela
«A Fundación Via Galego organizou para o próximo 19 de outubro, sexta feira, no Kiosko Alfonso da Coruña, unha mesa redonda titulada “Letras que unen” e un recital poético denominado “Cabo Verde lírico”. Na mesa redonda Letras que Unen intervirán Felisa Rodrigues (experta-galega en literaturas lusófonas africanas), Germano Almeida e José Vicente Lopes (escritores cabo-verdianos) e Xavier Alcalá e Carlos Quiroga (escritores galegos). Incluirá unha breve introdución á literatura cabo-verdiana da profesora Felisa Rodrigues e posterior debate arredor da lingua galego-portuguesa como ferramenta útil de traballo para os escritores galegos e cabo-verdianos. Terá lugar a partir das 17horas. No recital participarán varias poetas novas, como Yolanda Castaño, Lucía Aldao ou María Lado, que recitarán poemas de autores cabo-verdianos. Terá lugar a partir das 19:00 horas.
O acto insírese nas xornadas Galeguia. Encontro con Cabo Verde, organizadas pola Fundación Via Galego entre os días 17 e 20 de outubro co patrocinio da Dirección Xeral de Creación e Difusión Cultural, entre outras institucións e entidades. Galeguia ten por obxecto fundamental promover un maior relacionamento entre a Galiza e os países de fala portuguesa, para así aproveitar na medida do posíbel a facilidade comunicativa que a lingua galega habilita no plano internacional, de extraordinario relevo no mundo global.» (Fundacion Via Galego)
Presentación en Compostela de Represión, Solidariedade e Resistencia Antifranquista (Caderno Arraiano / Verán 2007)
Será na Libraría Couceiro (Santiago de Compostela) o xoves 25 de outubro ás 20:00 horas. A introdución estará a cargo de Aser Álvarez e Xoán Carlos Domínguez Alberte (coordinadores da publicación). Ofrecerase unha charla do historiador Dionisio Pereira e un recital poético de textos do libro Volverlles a palabra. Homenaxe aos represaliados do franquismo, a cargo dos seus autores: María do Cebreiro, Antón L. Dobao, Francisco X. Fernández Naval, Raúl Gómez Pato, Manuel Outeiriño e Baldo Ramos.
Suso Pensado na Galería Sargadelos d’ A Coruña
O martes 2 de outubro, ás 20:00 horas, a Galería Sargadelos da Coruña (Rúa Real, 56) contará coa presenza de Suso Pensado nunha nova edición do ciclo quincenal “Martes Literarios”.
Eduardo Estévez recitará na Sargadelos de Ferrol
O día 3 de Outubro, ás 20:00 horas, na Galeria Sargadelos de Ferrol Eduardo Estévez ofrecerá un recital poético. O acto está coordinado polo colectivo Ao carón da Lareira.
“Versos para unha tarde de outono”, recital poético en Ferrol
O 28 de setembro o movemento cultural Ao carón da lareira fará un recital poético de membros e simpatizantes na Galería Sargadelos de Ferrol, ás 20:00 horas. Intervirán Mariola Hermida, Rosa Salanova, Esther Val, Xaime Pereira e Fernando Puente, entre outros.
Homenaxe a Bernardino Graña no Morrazo
Os días 27, 28 e 29 de setembro de 2007 terá lugar no Auditorio Municipal de Cangas unha homenaxe ao escritor Bernardino Graña no seu 75º aniversario.
27 DE SETEMBRO – Cea con Bernardino. no seu 75º aniversario, no restaurante De’Carla na Praia da Borna. Isamil (Moaña) ás 21:00 horas. Os Interesados poden anotarse nos teléfonos 986302030 (A Cepa), 637054164 (Heitor) ou no correo electrónico fernandocpintos@hotmail.com
28 DE SETEMBRO – “Voces para Bernardino”, ás 20:30 horas no Auditorio Municipal de Cangas: actuacións da Coral Polifónica de Bueu, a Coral Lestonnac de Cangas, o Coro músico-vocal Mornura, Tucho Perete e o Coro San José, e a coral Queixumes do Hío. Presentan o acto Elvira Ribeiro e Heitor Mera. Ao remate do acto cantarase o poema “Como hei vivir mañá sen a luz túa”.
29 DE SETEMBRO – No Auditorio Municipal de Cangas.
Ás 11:00 horas: Actuación da compañía de teatro SEISDEDOS, que estreará a obra “O Galo Kiriko e os seus amigos”, sobre contos infantís recreados por Bernardino, baixo a dirección de Anxo García e música de Carlos Quintá.
Ás 20:30 horas: Recital poético e concerto musical. O grupo Tromentelo (Coiro) ofrecerá un pasarrúas e un concerto previo ás actuacións de Na Virada, Tino Baz, Grupo A Quenlla, Mini e Mero, Pablo Costas, César Morán, Miro Casabella e Xavier Blanco. Contaremos coa presencia de poetas, escritores, amigos, compañeiros, veciños… recitando poemas de Bernardino Graña.
Esta homenaxe conta coa adhesión da Asociación de Escritores en Lingua Galega.
Lucía Aldao estará no Festival internacional de títeres do Porto
O mércores 19 de setembro Lucía Aldao recitará e ofrecerá un concerto no I Festival internacional de marionetas do Porto (Praça de João l).
