Entrevista 
a Andrés Torres Queiruga en La Voz de Galicia:
“(…) – La Voz de Galicia (LVG): Van xa 32 anos do seu ingreso na Academia, o que o converte no máis veterano da rúa Tabernas. ¿Como lembra aquel día?
– Andrés Torres Queiruga (ATQ): Para min foi unha sorpresa non esperada. Vivín ese día con ilusión, sobre todo coa idea de colaborar na nosa cultura desde unha institución como é a Igrexa, que non acaba de encontrar o seu sitio xusto. (…)
– LVG: ¿Cre que a Academia necesita máis sangue novo?
– ATQ: Evidente. Pero sempre nesa dialéctica das idades, que marcan a continuidade fecunda da memoria do pasado coa sempre inédita aventura do porvir. O de «inmortais» xa pasou, pero as raíces son importantes.
– LVG: ¿E quizais algunha académica máis?
– ATQ: Máis evidente aínda. É preocupación común e tamén necesidade. Non por unha simple equiparación numérica, senón porque hoxe contamos con moitas e que están moi preparadas. (…)
– LVG: Comentou no seu discurso que Rosalía «é unha mística que non pasou da noite escura».
– ATQ: Ese é un tema fascinante: Rosalía nin foi santiña nin atea. Foi unha buscadora inconformista, con dúbidas abisais e fulguracións místicas. Non encontrou nin a igrexa nin a teoloxía que lle axudasen a ver respostas axeitadas. Pero era demasiado auténtica e profunda como para resignarse. (…)”
Manuscritos: Marta Dacosta
Desde o blogue Caderno da crítica, de Ramón Nicolás:
Cincuenta e un orixinais concorren ao V Premio de Poesía Victoriano Taibo
Cincuenta 
e un orixinais concorren ao V Premio de Poesía Victoriano Taibo – Entidade Local de Morgadáns, organizado polo Instituto de Estudos Miñoranos.
O pasado 31 de xullo rematou o prazo para a recepción de orixinais para participar no V Premio de Poesía Victoriano Taibo – Entidade Local de Morgadáns. O xurado reuniuse para recoller os traballos presentados, nun total de cincuenta e unha obras, cifra algo superior á das anteriores convocatorias. O fallo farase público nos primeiros días de setembro, en data que se anunciará nos medios de comunicación.
O premio dotado con 3.000 €, peza conmemorativa e a publicación da obra premiada está sufragado pola Entidade Local Menor de Morgadáns e xestionado polo Instituto de Estudos Miñoranos e será entregado nun acto a celebrar no edificio das Escolas de Guillufe (Morgadáns) na 2ª semana de novembro.
Dossier Autopoéticas, en Poesía Galega
“O 
dossier Autopoéticas recompila os materiais do repositorio de poesiagalega.org que encaixan nesta modalidade discursiva. Integran o sumario grupos de autopoéticas que, pola súa aparición nunha determinada publicación periódica ou colección editorial, constitúen corpus textuais coherentes e representativos da poesía galega contemporánea. Foron incluídos, ademais, materiais doutro tipo igualmente interesantes para a conformación dun panorama diverso e significativo da poesía galega contemporánea, que abrangue desde mediados da década de 1980 até a actualidade.” Desde Poesía Galega.
Convocado o XXV Premio de Poesía Eusebio Lorenzo Baleirón
BASES DO XXV PREMIO DE POESÍA EUSEBIO LORENZO BALEIRÓN 2012
“1. 
O Concello de Dodro, para honrar a memoria do seu ilustre poeta e contribuír á promoción da poesía galega, manifestación sobranceira da nosa literatura, convoca a XXV edición do PREMIO EUSEBIO LORENZO BALEIRÓN.
2. Poderán concorrer a este certame as poetas e os poetas que o desexen, con cadanseu libro escrito en lingua galega, segundo a normativa vixente.
3. Os poemarios aspirantes ao premio serán de tema e forma libres, cunha extensión mínima de 500 versos e máxima de 800. Deberán ser orixinais e estar inéditos na súa totalidade, condición que se estende ao soporte dixital. No momento do fallo do certame, non poderán estar presentados a ningún outro concurso.
4. Os participantes deberán enviar 4 exemplares da obra, mecanografados, sen remite identificador, ó seguinte enderezo:
XXV Premio de Poesía Eusebio Lorenzo Baleirón
Concello de Dodro
Tallós, 32
15981 Dodro- A Coruña
5. As obras concursantes deberán ostentar o título e un lema, que tamén figurará no exterior dun sobre que conteña a fotocopia do DNI do autor ou autora, o seu teléfono e enderezo, así como un pequeno currículo literario, no caso de que teña obra publicada.
6. O prazo de presentación das obras remata o día 6 de novembro do ano 2012.
7. A dotación do Premio, único e indivisible, será de 2.300 euros. Se o xurado o considera oportuno, pola baixa calidade dos libros presentados, o premio poderá ser declarado deserto.
8. O xurado será designado polo Concello de Dodro. Formarano o presidente e o secretario –este, con voz e sen voto-, ambos membros da Corporación Municipal, e catro especialistas vencellados á poesía e/ou á crítica literaria. A composición do xurado farase pública cando remate o prazo de admisión de orixinais.
9. O fallo será dado a coñecer nun acto que se celebrará na Casa da Cultura do Concello de Dodro o día 1 de decembro de 2012. A entrega do premio realizarase o día 16 do mencionado mes. As obras non premiadas serán devoltas aos autores que as soliciten no prazo dun mes a contar do día do fallo.
10. A obra galardoada publicarase dentro da Colección de Poesía Eusebio Lorenzo Baleirón da Editorial Sotelo Blanco, que se reserva os dereitos de edición. A contía do premio será considerada como un adianto dos dereitos de autoría. O autor ou autora recibirá gratuitamente 25 exemplares.
11. A participación nesta convocatoria implica a aceptación das bases e a interpretación que delas faga o xurado, non admitíndose recurso contra a decisión que este nas suas funcións adopte.”
VII Premio Estornela de Teatro para Nenos
A
Fundación Xosé Neira Vilas convoca a VII edición do Premio Estornela de Teatro para Nenos. Trátase dunha iniciativa de carácter bianual que pretende estimular a creación teatral dirixida a nenos e nenas.
O premio está dotado con seiscentos euros e inclúe a publicaciòn do texto por Edicións Embora. Enviarase o orixinal e dúas copias adxuntando sobre pechado co título por fóra e dentro del nome e apelidos do/a autor/a, enderezo e teléfono ata o vindeiro 30 de outubro á sede da Fundación Xosé Neira Vilas (C. P. 36587, Gres-Vila de Cruces-Pontevedra). Os textos han ser inéditos en lingua galega, e cada orixinal pode conter varias pezas teatrais.
Viveiro: comeza a Feira do Libro
Iníciase 
a XVI Feira do Libro de Viveiro, que se celebra nos Xardíns Noriega Varela até o xoves 16 de agosto, con horarios de 12:00 a 14:00 h. polas mañás e de 18:00 a 22:00 h. polas tardes. As actividades máis destacada deste primeiro día, luns 13, son as seguintes:
– 13:00 h. Pregón inaugural a cargo do escritor Xavier Alcalá.
– 19:30 h. h. Presentación do libro Verde oliva, de Xavier Alcalá, publicado en galego por Editorial Galaxia e en castelán por editorial Nowtilus. Xunto co autor participa no acto o xornalista Ernesto Sánchez Pombo.
– 20:30 h. Presentación do libro Xardín de inverno, de Ledicia Costas e publicado pola Editorial Everest Galicia. Participan a autora, Montse Pena Presas e Daniel Puente Bello.
– 21:30 h. Mesa redonda Segredos da novela histórica. Participan: Marcos Calveiro, Pere Tobaruela e Fran Zabaleta.
El invisible anillo nº 16: entrega dedicada á poesía galega
Desde 
o blogue de Ramón Nicolás, Caderno da crítica:
“Hai cousa dun mes un amigo púxome en contacto con Lur Sotuela, director da revista El invisible anillo, subtitulada Poesía, arte y literatura, publicación que particularmente descoñecía. Sotuela solicitoume un artigo arredor de cuestións biográficas e literarias de Celso Emilio Ferreiro e acabo de recibir un exemplar, subtitulado «Érase una vez… Galicia», que testemuña o excelente coidado que depositan desde a editorial Eneidanunha arriscada, heroica e marabillosa aventura que é, hoxe en día, soster unha revista destas características, nesta ocasión dedicada na súa totalidade á poesía galega, caracterizada no limiar como «de una riqueza abrumadora» e «fecunda y deslumbrante», mentres xa dispoñen no mesmo selo unha antoloxía que aparecerá no mes de outono baixo o título de Sinfonía atlántica. Antología general de la poesía gallega. A revista en si, inmellorable desde un punto de vista estético, conta con ilustracións ad hoc de Ginés Liébana, poeta e artista cordobés da xeración do grupo Cántico, e articula unha viaxe que vai mesturando mostras de voces clásicas como as de Rosalía, Pondal, Curros, Cabanillas, Otero, Pimentel, Novoneyra, Álvaro Cunqueiro ou Celso Emilio (en versións bilingües) até poetas dos nosos días como Méndez Ferrín, X. Mª Álvarez Cáccamo, Cesáreo Sánchez, Xulio L. Valcárcel, Darío X. Cabana, Claudio Rodríguez Fer e César A. Molina, onde boto en falta voces femininas, que as hai con talento e valía ben demostradas. Alén diso, incorpóranse diversos ensaios nucleados arredor de diversos aspectos da obra rosaliana, a cargo de Carmen Blanco e Arcadio López-Casanova; deténdose na figura de Álvaro Cunqueiro, cunha interesante lectura de C. Clementson; reparando na reescritura dos contos de fadas na poesía galega de hoxe a través da visión de Teresa Seara ao que se engaden unha serie de reflexións sobre o mundo clásico na poesía galega, subscritas por Carlos Beck. (…)”
Manuscritos: Claudio Rodríguez Fer
Desde o blogue Caderno da crítica, de Ramón Nicolás:
Héitor Picallo gaña o XVII Premio Xornalístico Manuel Reimóndez
O 
xurado do XVII Premio Xornalístico Manuel Reimóndez Portela outorgou, por unanimidade, o galardón a Héitor Picallo por catro artigos publicados no Diario de Arousa. No fallo valórase ante todo o grande dominio do xénero xornalístico do premiado, así como a linguaxe cultra, rica e variada que “amosa o autor, transmitindo ao lector a importancia do uso do galego, en perfecta convivencia con calquera outra lingua”. A defensa do idioma, engade o xurado, “está feita dende o máis fondo respeto, sensibilidade e tolerancia”. Vía El Correo Gallego.
