Certame SNL de microrrelato en feminino Microrrelatas A Coruña, 2021

Desde Normalización do Concello da Coruña:
“Cada semana lanzarémosvos catro palabras en feminino e abriremos o noso correo inscricionslingua@coruna.gal para recibir os vosos microrrelatos.
EIS AS BASES:
– Poderá participar calquera persoa que o desexe. Haberá dúas categorías: ata 18 anos e maiores de 18. Asinarase o microrrelato co nome e apelidos e idade.
– O concurso comezará o día 4 de outubro e rematará o venres 29 de outubro. Faranse catro quendas semanais, nas que o luns publicaremos as palabras para incorporar e entre os microrrelatos que nos cheguen antes das 14:00 h do venres comunicaremos o texto gañador.
– Os textos serán en lingua galega.
– Cada semana escollerase o mellor microrrelato dos recibidos durante a dita semana.
– Só se poderá participar cun texto cada semana.
– A persoa que resulte gañadora unha semana non poderá seguir participando nas seguintes.
– O texto, de dez liñas como máximo en letra ARIAL 12, deberá conter polo menos dúas das catro palabras que lanzaremos cada semana.
– O xurado (persoal do SNL) terá en conta a orixinalidade, a concisión, a forma do relato, así como a corrección lingüística e a ortografía.
– Os microrrelatos serán publicados nas nosas redes sociais (Facebook e Instagram) segundo os vaiamos recibindo, pero non haberá unha votación popular.
– O premio semanal consistirá nun lote de libros e produtos culturais.
– Se a situación sociosanitaria o permite, o acto da entrega de premios realizarase de maneira presencial.
– Se o xurado o considera, poderanse establecer un ou varios accésits.
– Calquera dúbida resolverase a través do correo inscricionslingua@coruna.gal”

Baiona: presentación de Urbanismo e patrimonio na vila de Baiona. Delimitación do seu conxunto histórico

O 9 de outubro, ás 19:30 horas, no Hotel Bahía de Baiona preséntase o libro Urbanismo e patrimonio na vila de Baiona. Delimitación do seu conxunto histórico, de María Paz Sáez Pérez e Ana Simóns Sánchez, publicado por Edicións Fervenza. No acto participa, xunto ás autoras, Valentín García.

A novela Eternity, de Xosé Monteagudo, é a gañadora do XV Premio Repsol

Desde Galaxia:
“A obra Eternity, de Xosé Monteagudo, resultou gañadora da XV edición do Premio Narrativa Breve Repsol en Lingua Galega. Así o comunicou o voceiro do xurado, Xavier Senín, na sede da Real Academia Galega na Coruña
O acto do ditame contou coa presenza de representantes das entidades participantes do premio, o secretario xeral de Política Lingüística, Valentín García, a directora da Refinería de Repsol na Coruña, Natalia Barreiro, o presidente da Real Academia Galega, Victor F. Freixanes, o director xeral da Editorial Galaxia, Francisco Castro, e o presidente da Asociación de Escritoras e Escritores en Lingua Galega (AELG), Cesáreo Sánchez.
O xurado da XV edición do Premio Narrativa Breve Repsol estivo composto por cinco prestixiosas personalidades das letras galegas, como son, a escritora, socióloga e filóloga, Estíbaliz Espinosa; Carlos Lema, director de Edicións da Editorial Galaxia; a escritora, ensaísta e investigadora, María López Sández; o tradutor e académico Xavier Senín; e Dolores Vilavedra, profesora da literatura galega na USC, crítica literaria, tradutora e autora.
Do mesmo xeito que en anteriores edicións, o galardón está dotado con 12.000 euros e coa publicación do libro pola Editorial Galaxia. O acto de entrega do Premio terá lugar antes de final de ano na cidade da Coruña.
Na súa XV edición o Premio Narrativa Breve Repsol contou cunha participación de 36 obras orixinais e inéditas cunha extensión mínima de 50 folios e máxima de 120.
Xavier Senín, voceiro do xurado desta edición, trasladou no acto que “Eternity consegue artellar unha trama na que funden a precariedade laboral, o mundo dixital e a construción da memoria. Sitúanos ante unha serie de desafíos que enfrontamos de cote, en ocasións sen decatarnos: como están a mudar as nosas vidas, ata que punto as convertemos en ficción, como se constrúe a historia persoal, como enfrontamos a morte”.
Ademais, o xurado salienta que, sendo unha novela moi actual na súa relación coas redes sociais, amosa que a natureza do ser humano ten un fondo de preocupacións transcendentes que permanecen: “As historias de vida enfíanse construíndo unha estrutura narrativa complexa, adquirindo un atractivo e engado de seu, pero integrándose na globalidade dunha novela que nos invita a reflexionar sobre o futuro dunha sociedade que aspira á permanencia concibíndose coma un inmenso arquivo dixital”. (…)”

Allariz: presentación de Vermellos e laicos. A represión fascista do maxisterio coruñés, de Narciso de Gabriel