Arquivos anuais: 2011
Marín: Moita poesía, pouca diversión, con Lucía Aldao e María Lado
O 
domingo 12 de xuño, ás 20:00 horas, como parte da programación do Ciclo Artes no Mercado de Abastos de Marín que organiza a Central Folque, Lucía Aldao e María Lado achegarán o seu espectáculo Moita poesía, pouca diversión, como parte da programación do ciclo Artes no Mercado de Abastos que organiza a Central Folque.
Vigo: presentación de Un soño na bandexa, de Mariné Lorenzo
O 
sábado 11 de xuño, ás 11:00 horas, no local da Asociación de Persoas Xordas de Vigo (Rúa Romil 24), preséntase o libro Un soño na bandexa, de Mariné Lorenzo, publicado en Galaxia. O acto contará coa asistencia da autora e a representación dunha obra para nenos baseada no conto, ademais de xogos e outras actividades.
Vigo: nova edición do Círculo Poético Aberto
O
sábado 11 de xuño, ás 21:00 horas, no Café Uf Negra Sombra (Rúa Pracer, 19) de Vigo, terá lugar unha nova edición do Círculo Poético Aberto promovido polo Grupo Penúltimo Acto, no que se presentará unha revista conmemorativa.
Rafael Yáñez Jato: ”Non teño présa por publicar, da poesía non se vive”
Lugo: Encontro Escritor@s polo territorio
O 
sábado 11 de xuño, no Salón de actos da Deputación Provincial de Lugo, terá lugar o Encontro Escritor@s polo Territorio, convocado por ADEGA, no que os escritores convidan a toda a cidadanía interesada a participar neste encontro, enriquecendo deste xeito o debate, e achegando novas visións dos temas tratados, ofrecendo un lugar de participación para todas aquelas persoas con inquedanzas sobre o territorio que habitan. O programa é o seguinte:
– 09:30 h. Inauguración da xornada, por Virxinia Rodríguez, presidenta de ADEGA e Antón Bao, Vicepresidente 1º da Deputación de Lugo.
– 10:00 h. Mesa de debate: A literatura oral do territorio. Nesta mesa analizarase a literatura e tradición oral, a importancia da súa conservación, a súa defensa e o seu vencellamento ao territorio. Con Ana Carreira e Xoán Ramiro Cuba. Modera: Antonio Reigosa.
– 11:00 h. Coloquio – Debate.
– 11:30 h. Actuación do coro LUGH dirixido por Fernando García Jácome.
– 12:30 h. Mesa de debate: Os nomes do territorio. A Toponimia. Aquí abordarase o tema dos cambios producidos na Toponímia galega; cidades, pobos, parroquias….a súa deturpación e a desfeita cultural que isto supón, desde o punto de vista da Tradición Oral, a Arqueoloxía ou a Historia. Con Xulia Marqués e Gonzalo Navaza. Modera: Xosé Miranda.
– 13:30 h. Coloquio – Debate.
– 16:00 h. Mesa de debate: Cambios no uso da Cidade. Por medio da narración das experiencias vitais de tres escritores pertencentes a diferentes xeracións (1940, 1951, 1975), dos seus recordos do uso da cidade para o xogo o traballo, a vida cotiá, obteremos unha visión do cambio producido no territorio urbano nos últimos 75 anos. Con Paco Martín e María Reimóndez. Modera: Isidro Novo.
– 17:00 h. Coloquio – Debate.
– 17:30 h. Actuación de música galega.
– 18:00 h. Mesa de debate: O meu territorio na miña literatura. A través de diversos autores, faremos un percorrido polas diferentes percepcións que teñen e tiveron das cidades onde se sitúa a súa obra literaria tendo deste xeito unha visión de como se manifestan os cambios das cidades na literatura. Con Pilar García Negro e Adela Figueroa Panisse. Modera: Xurxo Souto.
– 19:00 h. Coloquio – Debate.
– 19:30 h. Conclusións e Clausura do Encontro. Os moderadores; exporán as conclusións de cada unha das mesas de debate. Posteriormente procederase á clausura do Encontro.
Reseña posterior en Galicia Hoxe.
Ponteceso: Encontro fotográfico-literario na busca das fotos con cheiro
O 
sábado 18 de xuño en Ponteceso terá lugar un Encontro Fotográfico-Literario de miradas poéticas sobre o espazo (des)habitado coa consciencia de que detrás de ningures sempre hai algo que permanece. Entrar nese mundo baleiro é habitar Areaquente, o lugar das sombras ás que lles cazar a súa luz, o seu “cheiro” da man da escritora An Alfaya e da fotógrafa Olga Seoane Paulus. O programa é o seguinte:
– 10:00 a 10:15 h. Chegada a Ponteceso, recepción na Fundación Eduardo Pondal, (O Couto, 15110, teléfono 981-714000).
– 10:15 a 10:30 h. Visita á exposición Fundación Eduardo Pondal.
– 10:30 a 11:30 h. Presentación da novela Areaquente, publicado en Sotelo Blanco. Intervirán a autora, An Alfaya e Ánxela Gracián, directora da colección.
– 11:30 a 13:30 h. Primeira parte do Obradoiro fotográfico a cargo da fotógrafa Olga Seoane Paulus. Lugar: Fundación Eduardo Pondal. (O curso contará cunha explicación teórica dos principais elementos que interveñen nunha fotografía (tempo de obturación, profundidade de campo, luz…) e cunha explicación de como conseguir selo de autor ou mirada de artista, isto é, fotos con cheiro).
– 13:30 a 14:00 h. Chegada á Praia de Balarés, onde terá lugar o xantar (optativo): prezo 25 euros, previa reserva.
– 16:00 a 19:00 h. Fotografar o espazo. (Segunda parte do Obradoiro fotográfico a cargo da fotógrafa Olga Seoane Paulus. O curso contará cunha explicación práctica do encadre, texturas, espazos, luz… nos escenarios das aldeas do Roncudo e Candelago para fotografar a memoria, as casas baleiras, as portas vencidas e, tras delas, a vida doente das sombras, os amores furtivos e os pasos perdidos, nostalxias que atraparemos na lente da nosa cámara con ese instinto de cazador de fotos con cheiro. Importante levar calzado cómodo, cámara de fotos dixital ou analóxica e actualizada a lectura da novela Areaquente de An Alfaya).
O prezo é de 50 euros (incluindo xantar e obradoiro fotográfico) e 25 euros (incluindo só o obradoiro fotográfico). Comunicarase a inscrición a Sotelo Blanco Edicións no mail soteloblanco@soteloblancoedicions.com ou en horario de mañá no teléfono: 981-582571 indicando nome completo, correo electrónico e un número de teléfono de contacto e realizarase o ingreso na conta 2080 0155 13 0040015861 (Novacaixagalicia), indicando o nome completo e a actividade (xantar e obradorio fotográfico, ou obradoiro fotográfico). O prazo de inscrición remata o mércores 15 de xuño. Prégase levar o xustificante o día do Encontro Fotográfico-Literario Na busca das fotos con cheiro.
Hai un total de 50 prazas, até esgotar o número de prazas por orde rigorosa de inscrición e pagamento.
Organizan: Sotelo Blanco Edicións en colaboración da Fundación Eduardo Pondal e co asesoramento da sección de Turismo do Concello de Ponteceso.
‘Os escritores achan un erro estrondoso que o Litvi non inclúa autores da literatura galega’
“A programación do II Encontro de Literatura de Viaxes (Litvi), que comeza o próximo 14 de xuño cunha conferencia inaugural do escritor Antonio Gala, espertou o enfado de certos sectores da cultura do país ao non incluír autores da literatura galega. “Resulta sorprendente que non se inclúan autores galegos nun ámbito tan emblemático na literatura galega como é a literatura de viaxes e no que sempre houbo autores como Álvaro Cunqueiro ou Blanco Amor. Resulta sorprendente e resulta un erro estrondoso. O enfado que hai nos escritores é grande”, explica o presidente da Asociación de Escritores en Lingua Galega (AELG), Cesáreo Sánchez.
O programa do II Litvi foi presentado o martes pola súa directora, Ana Trevisani, e o director xeral do libro, Francisco López. A atención centrarase nesta ocasión na gastronomía e na fotografía e o encontro será inaugurado polo escritor Antonio Gala. Entre os nomes máis destacados do programa atópanse Julio Llamazares, José Luis Corral Lafuente ou o presentador José María Íñigo. Ademais, un dos temas principais será a Catedral de Santiago, xa que este ano se celebra o 800 aniversario da súa consagración.
Estas circunstancias espertan a sorpresa do sector cultural en Galicia. “Hai tres cousas que destacar de forma obxectiva. A primeira é que é unha boa noticia que se promova a continuidade dun encontro temático. O segundo é que non están presentes autores en galegos. O terceiro é que parece que se suprime a feira do libro de viaxes que se iniciou o ano pasado”, explica Manuel Bragado, presidente da Asociación Galega de Editores (AGE), que lembra que a única excepción sería a participación do fotógrafo Xurxo Lobato, que ten publicado en galego. Non obstante, Xurxo Lobato participa como comisario do festival Olladas viaxeiras. Trátase dun festival con diversas proxeccións audiovisuais nas noites do sábado 17 e 18 de xuño.” Vía Xornal. Máis información no día seguinte no mesmo medio.
Sanxenxo: gala de entrega de premios do VII Certame Literario IES Sanxenxo, con María Lado, Lucía Aldao e Xosé Neira Vilas
O 
venres 10 de xuño, ás 20:00 horas, no Auditorio Emilia Pardo Bazán de Sanxenxo terá lugar a gala de entrega de premios do VII Certame Literario IES Sanxenxo, dentro da que haberá un recital poético-musical con María Lado e Lucía Aldao. Como escritor convidado estará Xosé Neira Vilas. Crónica posterior en Galaxia.
Santiago: concerto Camelias para Cunqueiro, por Amancio Prada
O 
venres 10 de xuño, ás 21:00 horas, no Salón Teatro (Rúa Nova, 34) de Santiago de Compostela, e con entradas a 10 euros, terá lugar o concerto Camelias para Cunqueiro, no que Amancio Prada interpretará poemas do grande autor mindoniense. O concerto forma parte da programación conmemorativa 2011, Ano Cunqueiro, e está organizado conxuntamente por Agadic e o Consello da Cultura Galega. Amancio Prada estará acompañado por Hilary Fielding ao violonchelo e Josete Ordóñez á guitarra e mandola.
