Arquivo da categoría: Premios poesía: ditames

Luís Valle Regueiro gaña o XXIII Premio de Poesía Eusebio Lorenzo Baleirón con Palabras e palabras e palabras

Publicado o por

“No día de hoxe, 11 de decembro de 2010, tivo lugar a resolución do Premio de Poesia Eusebio Lorenzo Baleirón na súa edición de 2010, por parte do xurado composto por:
Presidente: don Arturo Díaz Díaz, Alcalde do Concello de Dodro.
Vogal primeira: dona Ánxeles Penas, poeta e tradutora de Eusebio Lorenzo Baleirón.
Vogal segundo: don Modesto Fraga Moure, poeta.
Vogal terceira: dona Dolores Vilavedra, profesora da USC e crítica literaria.
Vogal cuarto: don Daniel Costas, gañador do certame do ano 2009.
Secretaria: dona Victoria Rei Mariño, tenenta de alcalde con delegación na Área de Cultura.
Que acordan, tras a deliberación do xurado, outorgar por unanimidade o premio ao seguinte traballo: Palabras e palabras e palabras. Aberta a plica resultou ser da autoría de Luís Valle Regueiro. O xurado destacou a profundidade temática, a orixinalidade das imaxes, a musicalidade e un impecable coidado da lingua. Salienta tamén a calidade en xeral das obras presentadas, así como o elevado número, o que destaca a importancia que este Certame ten no ámbito da literatura galega.

Para que conste a todos os efectos, asinan acta o sábado 11 de decembro de 2010.

Ademais de emitir a súa resolución, os membro do xurado realizaron unha visita ao cemiterio onde repousan os restos do poeta de Dodro, Eusebio Lorenzo Baleirón para dar testemuño do noso recordo.”

Vía Concello de Dodro. Recollido tamén en A Nosa Terra, La Voz de Galicia, Galicia Hoxe, El Correo Gallego e Cultura Galega.

Morgadáns: entrega do III Premio de Poesía Victoriano Taibo a María Goretti Fariña

Publicado o por

O sábado 11 de decembro ás 19:00 h. na Escola de Guillufe en Morgadáns terá lugar o acto de entrega do III Premio de poesía Victoriano Taibo-Entidade Local de Morgadáns a Goretti Fariña Caamaño (San Xoán de Baión, Vilanova de Arousa, 1965), que resultou gañadora polo seu poemario Devastacións imposibles. O premio xestionado polo Instituto de Estudos Miñoranos e sufragado pola Entidade Local Menor de Morgadáns consta de un premio en metálico de 3000 euros, a edición do libro premiado e unha figura escultórica realizada polo artista miñorano Fino Lorenzo. No acto, que será presentado pola xornalista e guionista Araceli Gonda, presentárase tamén o libro premiado e estará animado polo grupo de gaitas “Balcón do Miñor”, de Morgadáns, así como polos cativos do Colexio Rural Agrupado “Antía Cal” que recitaran textos de Victoriano Taibo e polo grupo de teatro baionés “Non si? Teatro” que dramatizará algúns textos poéticos de don Victoriano, contando tamén coa presenza da premiada, que recitará tamén algúns dos textos do libro.

Coñécense os gañadores dos Premios Ánxel Casal da Concellaría de Educación de Santiago

Publicado o por

Afonso Francisco Traficante Fernández, de Ordes, con 14 anos, foi o gañador do XV Premio Ánxel Casal, convocado pola Concellaría de Educación de Santiago, na modalidade de poesía por Nós corredizos, unha obra que a escritora Dores Tembrás, integrante do xuri, considerou “extraordinaria e dunha brillantez e madurez poética pouco habitual”. Na modalidade de conto, o premio foi para Brais Lamela Gómez, de 16 anos, alumno do IES Basanta Silva (Vilalba). Da súa obra, Fiat Voluntas Tua, sinalou Marcos Calveiro, escritor e membro do xuri, a “calidade literaria e o uso dos recursos lingüísticos do galego”. En teatro, a premiada foi Lara Porto Mato, de 17 anos, alumna do colexio compostelán Manuel Peleteiro, por Sagrada Familia. A entrega dos premios celebrarase o xoves 16 de decembro, ás 12:00 h. no Pazo de Raxoi, en Santiago. Máis información aquí.

Coñécense os Premios Xuventude Crea 2010 de poesía, relato e teatro

Publicado o por

Xa se coñecen os premiados das modalidades de poesía e narrativa dos Premios Xuventude Crea 2010, convocados pola Xunta de Galicia.

No apartado de Poesía, os premiados son:
1º Premio: Gonzalo Hermo González, pola obra Crac.
2º Premio: Jacobo Llamas Martínez, pola obra Terapia gestáltica.
3º Premio compartido: Roi Vidal Ponte, pola obra Pop.
3º Premio compartido: Celia Parra Díaz, pola obra Código morse.
O xurado está formado por: Presidenta: Yolanda Otero Balsa; Vogais: Luis Blanco Vila, Noemí Martínez Ferreiro; David Pérez González; e Secretaria: María Jesús López Cernadas.

No apartado de Relato, os premiados son:
1º Premio: Enrique Bernárdez Reigosa, pola obra Xetréceme.
2º Premio: Lorena Rivero Rodríguez, pola obra Barlovento.
3º Premio compartido: Tito Pérez Pérez, pola obra O derradeiro lobo cerval.
3º Premio compartido: Elena Rojo Joga, pola obra O día que voltou a moda dos dinosaurios.
O xurado está formado por: Presidenta: Yolanda Otero Balsa; Vogais: Luis Blanco Vila; Noemí Martínez Ferreiro; Anxos García Sumai; e Secretaria: Consuelo Méndez Mouzo.

No apartado de Teatro, os premiados son:
1º Premio: Mequetrefes Teatro, pola obra In-comunicando.
2º Premio: Non si? Teatro, pola obra Xogando Shakespeare.
3º Premio compartido: Asociación Cultural Bicodobrelo, pola obra Matilde.
3º Premio compartido: Teatro da Falúa, pola obra The Falua’s Rocky Horror Show.

María Rosendo Priego gaña o premio Pérez Parallé de Poesía

Publicado o por

O xurado do Premio Nacional de Poesía Xosemaría Pérez Parallé, composto por Pedro Casteleiro, Antía Otero e Ramón Neto, reunido en Fene, decidiu por unanimidade outorgar o premio deste ano ao libro Nómade da autoría de María Rosendo Priego, presentado baixo o pseudónimo Verdecente. María Rosendo (Vigo, 1984) participou en recitais poéticos coas Redes Escarlata ou na II Rebelión da décima musa pero non ten ningún texto publicado. Nómade é, tal como se indica nas bases do premio, o primeiro libro da autora que verá luz. Na actualidade vive en Compostela onde traballa en produción teatral coa compañía Berrobambán. O Premio Nacional de Poesía Xosemaría Pérez Parallé convócao o Círculo Mercantil e Industrial-Unidade de Fene para lembrar a figura do Segrel do Penedo. Desde hai xa varios anos, o premio está dedicado a promover a obra dun autor ou autora inéditos en lingua galega. A entrega do premio levarase a cabo nun acto que terá lugar o próximo sábado 20 de novembro na sede do Círculo Mercantil e Industrial-Unidade de Fene. Máis información aquí.

O premio de poesía Fermín Bouza-Brey queda deserto en 2010

Publicado o por

O xurado do premio Fermín Bouza Brey do 2010, formado por Fermín Bouza Álvarez, Xosé María Álvarez Cáccamo, Miguel Anxo Fernán Vello, Xosé María Dobarro e o historiador Gonzalo Bouza-Brey, considerou que as obras presentadas non ofrecen o nivel de calidade esixida para un premio desta traxectoria e prestixio, polo que declarou deserto o gañador da súa quinta edición. Tras coñecerse o fallo, o concelleiro de Cultura do concello de Vilagarcía, entidade organizadora do certame, Xosé Castro Ratón, anunciou que os 3.000 euros cos que estaba dotado este premio engadiríanse á vindeira convocatoria do certame, polo que a sexta edición do premio de poesía Fermín Bouza-Brey contará cun galardón en metálico de 6.000 euros. Os membros do xurado subliñaron que o feito de declarar deserto o premio representa unha excepcionalidade pero que, por outra parte, supón tamén un índice de normalidade cultural. Ao mesmo tempo consideran que a baixa participación acadada non é reflexo da situación que vive a poesía galega, da que, aseguran, nunca estivo tan fornecida de discursos tan plurais, senón que tivo máis que ver con cuestións relacionadas coa publicidade da convocatoria.Ao certame presentáronse doce obras, dúas das cales incumprían as bases, polo que tan só dez foron tidas en conta. A cifra é sensiblemente inferior á de edicións anteriores. Cabe lembrar que en 2005 foron 52 as obras que concurriron a este premio e máis de setenta na edición de 2003.

Mª Goretti Fariña Caamaño gaña o III Premio de Poesía Victoriano Taibo

Publicado o por

O xurado do III Premio de Poesía Victoriano Taibo convocado polo Instituto de Estudos Miñoranos e a Entidade Local de Morgadáns-Gondomar decidiu premiar o poemario titulado Devastacións dispoñibles, de Mª Goretti Fariña Caamaño, do que valorou especialmente o seu lirismo así como un manexo elegante e eficaz da lingua. Mª Goretti Fariña Caamaño naceu en San Xoán de Baión (Vilanova de Arousa) no ano 1965. Na actualidade reside en Vilagarcía de Arousa. É licenciada en Bioloxía e profesora de Ciencias nun colexio de Vilagarcía. A gañadora recibirá o premio co que está dotado este certame (3.000 € en metálico e unha peza escultórica de Fino Lorenzo) no transcurso dun acto que se celebrará na primeira metade de novembro, en cuxo momento será tamén presentado o libro gañador editado polo Instituto de Estudos Miñoranos. Nesta terceira edición do certame presentáronse un total de 43 orixinais. A participación non só foi abundante senón tamén de gran calidade, como sinalaron unanimemente os membros do xurado (formado por Gonzalo Navaza, Marta Dacosta, Elvira Riveiro Tobío, Mª Carmen Caramés Gorgal, Araceli Gonda Cabreira, e no que actuou como secretario -sen voto- en representación do Instituto de Estudos Miñoranos, Miguel Anxo Mouriño Fernández, e presidido polo Presidente da Entidade Local de Morgadáns, Urbano Esmerode Domínguez -tamén sen voto-) que decidiron seleccionar os dez finalistas. O veredicto completo pódese consultar aquí.

Pablo Bouza gaña o XXXVI Certame Literario do Concello de Vilalba

Publicado o por

O poeta de Fene Pablo Bouza Suárez vén de gañar o XXXVI Certame Literario do Concello de Vilalba, dotado con 3000 euros e a publicación da obra, polo seu poemario Na intimidade do azougue, mentres que Martiño Maseda conseguiu o segundo premio coa súa obra Nos labirintos das almas, dotado con 1000 euros e a súa publicación. O xurado estivo composto polo concelleiro de cultura de Vilalba, José María García-Leira, o académico e escritor Darío Villanueva, o xornalista Fidel Fernán e o xefe territorial de cultura en Lugo, José Carlos Rodríguez Andina, actuando como secretario Xulio Xiz. O poeta de Ferrolterra repite, desta maneira, o éxito da pasada edición, en que tamén gañara o certame.