Vigo: Mesa redonda de poesía con María Lado e Olga Novo, no VII Ciclo Escritoras/es na Universidade

Publicado o 19 Setembro 2012 por asociacionescritoras-es

O xoves 20 de setembro, ás 12:00 horas, no Salón de Actos da Facultade de Filoloxía e Tradución da Universidade de Vigo, organizados pola Asociación de Escritoras e Escritores en Lingua Galega, co patrocinio da Secretaría Xeral de Política Lingüística e a colaboración da Facultade de Filoloxía e Tradución da Universidade de Vigo, comeza o VII Ciclo de mesas redondas Escritoras/es na Universidade, baixo o lema Por que(n) escribir / Para que(n) escribir, cunha Mesa redonda de poesía, que contará coa participación de María Lado e Olga Novo.

Santiago: Congreso do Bicentenario de Francisco Añón, os 4 e 5 de outubro

Publicado o 18 Setembro 2012 por asociacionescritoras-es

O xoves 4 e o venres 5 de outubro, na Cidade da Cultura de Santiago, terá lugar o Congreso do Bicentenario de Francisco Añón, coordinado por Xoán Mariño. O programa previsto é o seguinte:

Xoves, 4 de outubro
– 16:00 h. Inauguración do congreso.
– 16:30 h. Intervención de Ramón Villares: A xeración de 1846.
– 17:15 h. Inauguración da exposición Añón, precursor do Rexurdimento.
– 18:00 h. Proxección do documental Añón na memoria, de Juan Silva e Óscar Sendón.
– 19:15 h. Intervención de Gonzalo Navaza: Consideracións sobre a poesía de Añón.
– 20:00 h. Presentación do libro Poesías galegas de Francisco Añón. Con Xosé Luís Méndez Ferrín.

Venres, 5 de outubro
– 10:00 h. Roteiro literario pola Compostela do Poeta Añón: Alameda, San Clemente, edificios da Universidade, San Martiño Pinario, Facultade de Historia…
– 12:00 h. Intervención de Pilar Sampedro: Valor e valores da poesía de Añón.
– 12:45 h. Intervención de Manuel García Sendón: Añón: creador do programa literario do Rexurdimento.
– 16:30 h. Intervención de Rosario Álvarez: O Poeta Añón na forxa do galego literario.
– 17:15 h. Intervención de Xesús Alonso Montero: Añón na literatura galega do Prerrexurdimento.
– 19:15 h. Presentación do libro Vida e obra de Francisco Añón. Por Ramón Blanco, autor do mesmo, e Víctor Freixanes, editor.
– 20:00 h. Coloquio.
– 20:30 h. Clausura.

Desde Certo.

Publican Os lonxes do solpor, un libro inédito de Manuel María

Publicado o 18 Setembro 2012 por asociacionescritoras-es

“«Non hai nada no mundo, nada/ tan fondo, lúcido e fermoso/ como a nidia claridade/ da palabra». Manuel María deixou palabras escritas que agora saen a luz despois de estar silenciadas varios anos, tras a morte do poeta. «Un ama até aos límites / o impenetrábel misterio/ do silencio / e, para defendelo, usa / a forza poderosa da palabra». Estes versos están no inicio no libro Os lonxes do solpor, un poemario inédito que vén de publicar a Fundación Manuel María de Estudos Galegos, acompañado polo CD Andando a Terra, de Uxía, e o DVD De amor e cantería, de Pixel Films, sobre un guión de Anxa González Refoxo. «Manuel María dera a coñecer algúns destes poemas, pero de xeito moi aillado, en publicacións espalladas que ahora están esgotadas, algunhas incluso no estranxeiro; de calquera xeito, como libro esta é a súa primeira edición». Isto esplicaba Alberte Ansede, secretario da fundación do poeta. Despois de presentar Lúas de Outono 2012, o espectáculo co que a semana pasada se lembraba na Coruña o cuarto aniversario do pasamento do escritor, Ansede indicaba que aínda quedan outros textos inéditos. (…)” Desde La Voz de Galicia.

Obradoiro Todo/nada poesía, impartido por Antía Otero

Publicado o 17 Setembro 2012 por asociacionescritoras-es

Todo/nada poesía é un obradoiro literario/artístico orientado a aquelas persoas que queiran achegarse ao entramado poético dende unha visión lúdica, interdisciplinar e contemporánea como primeira toma de contacto. No proceso aportaranse chaves que axuden a escoitar e mirar dende o aquí e o agora da cotidianidade, do preciso, do inmediato… facendo fincapé na grandeza do poético. Os obxectivos son:
– Aportar chaves que axuden á elaboración e creación de textos partindo da mirada única de cada participante.
– Poñer en relación o poético co interdisciplinar: cinema, música, vídeo…
– Desmitificar conceptos tradicionalmente asociados a poesía como: o romanticismo, a rima, a puntuación clásica.
– Atopar os silencios no lenzo.
– Bucear nas propias creacións a redor da imaxinación, a escoita, o concreto, os diálogos, o eu e os personaxes, o tempo, o espazo, o silencio.
– Desmitificar a idea de que para escribir un debe ser experto ou grande entendido.
– Plantexar o feito artístico como algo accesible pero complexo, polo que se aconsella implicación presencial.

RESUMO
– Nivel: Iniciación.
– Duración: Trimestral. Prazas limitadas.
– Datas de inicio e finalización: 03/10/2012 ao 19/12/2012.
– Horario: mércores de 20:30 a 22:30 horas.
– Prezo: 60 €/mes socios. 80 €/mes non socios.
– Inscrición: aquí.

Obradoiro de poesía on-line impartido por Antía Otero

Publicado o 17 Setembro 2012 por asociacionescritoras-es

“¿Tiveches algunha vez esta sensación?, ¿atopácheste con milleiros de frases bailando na cabeza e sentiches que poderían ser universos?, ¿ descubriches algunha vez que de tanto mirar o extraordinario poderías derreter os ollos?, ¿ pasaches semanas enteiras cunha imaxe cotiá e feble, áxil ou pesada na cabeza que loitaba por sair á luz?……se é así….habitas preto da poesía…. … mais xogar coas palabras, buscar a precisión, expoñer o que pensamos e o que vemos dende un código propio….é un bo xeito de materializala. Este taller on line está pensado para que poidas achegarte ao entramado poético e aprender recursos técnicos e estilísticos tomando a túa personalidade como punto de partida. Acompañándonos de exemplos, exercicios prácticos, lecturas, visionado de videos on line, imaxes… materializaremos ambientes, pensamentos e ideas ata chegar a construir textos que iremos correxindo e millorando dende a emoción, a consciencia e a constancia. Non deixes pasar esta oportunidade de achegarte ao mundo poético descubrindo as posibilidades da tua propia voz e daqueles que nos rodean.” Impartido por Antía Otero.
A inscrición realízase aquí.

Xabier Cordal, Antón Lopo, Anxo Rei Ballesteros e Manuel Rivas serán traducidos na revista norteamericana Absinthe

Publicado o 14 Setembro 2012 por asociacionescritoras-es

“Catro autores galegos publicarán textos da súa autoría no próximo número da revista norteamericana Absinthe, que o anuncia na súa web. A obra de Xabier Cordal, Antón Lopo, Anxo Rei Ballesteros e Manuel Rivas terá presenza nos Estados Unidos a través da vontade da revista de facer unha incursión na literatura galega.” Desde Xerais.

Betanzos: presentación de Letras de amor e guerra, de Ramiro Vidal Alvarinho

Publicado o 14 Setembro 2012 por asociacionescritoras-es

O sábado 15 de setembro, ás 20:30 horas, no Salón Azul do Liceo de Betanzos, en colaboración coa A. C. Eira Vella, preséntase o libro Letras de amor e guerra, de Ramiro Vidal Alvarinho, publicado nos Cadernos Q de Vian.