O martes
7 de setembro no Teatro Rosalía de Castro da Coruña, a partir das 20:30 h., celébrase unha cálida homenaxe á figura de Manuel María, LÚAS DE OUTONO, que quere ser a rememoración dunha vida e dunha obra e a reivindicación da súa vixencia, comemorando o sexto aniversario do pasamento do poeta. Nesta gala de homenaxe Uxía cantará poemas do autor chairego, acompañando un recital no que participan Pilar Pallarés, Luz Pozo Garza, Cesáreo Sánchez Iglesias e Miguel Anxo Fernán Vello. O acto está organizado pola Fundación Manuel María e a Concellaría de Cultura do Concello da Coruña.
Arquivo da categoría: Poesía
Salvaterra: programa do XXIV Festival da Poesia do Condado
Este é o programa do XXIV Festival de Poesia do Condado. O xoves 2 de setembro será presentado publicamente xunto co libro ás 13:00 h. na Casa do Conde (Recinto da Muralla), de Salvaterra.
A Coruña: presentación de Ein Rosenfeure, das uns Verstört, 4 Dichter aus Galicien, 4 poetas galegos
O venres 
3 de setembro, 
ás 20:00 h., no Fórum da Fnac da Coruña, desenvolverase un recital con motivo da presentación da antoloxía bilingüe alemán-galego: Ein Rosenfeure, das uns Verstört: 4 Dichter aus Galicien, 4 poetas galegos, publicado polo Centro de Estudos Galegos de Kiel (Alemaña), no que intervirán os seus autores: Miguel Anxo Fernán-Vello, Manuel Rivas, Xulio L. Valcárcel e Xosé María Álvarez Cáccamo.
Ana Romaní: “A poesía desvélase”
Entrevista
a Ana Romaní en Galicia Hoxe:
“Galicia Hoxe (GH): Ten algún proxecto para a próxima temporada?
Ana Romaní (AR): Seguirei traballando no programa (Diario Cultural), e no que respecta a escribir imaxino que sairá cara a outono un novo libro de poemas. O libro titúlase Estremas e resúltame difícil explicar como é. Supón unha certa ruptura con respecto a libros anteriores ó tempo que continuidade. De tódolos xeitos creo que é moi recoñecible o universo de Arden. É o resultado dunha necesidade, teño unha relación cíclica coa escrita e escribo cando vexo que necesito dicir algo. Os poemas chegan, chegan eles e desvélanse. Empecei a escribilo hai un ano pero non porque fora unha decisión previa, senón porque tiven necesidade de escribir un poema e ese levou a outro, etc. (…)
GH: Para un escritor escribir é á vez unha profesión e un hobby?
AR: Non sei para outros, pero para min non é ningunha das dúas, non responde a esos modelos a miña vivencia. Creo que é unha necesidade, realmente.
GH: O escritor sempre ten un libro baixo o brazo?
AR: Non sei. Haberá quen o teña, haberá quen non… Eu sempre procuro ter algún libro na mesiña de noite, no bolso, na bolsa da praia, no coche… En fin, a man.”
Vídeo do I Encontro Milpedras, en xullo do 2010 na Coruña
Este é o vídeo do recital de poesía, música e pintura, I Encontro en Milpedras, acontecido o 23 de xullo deste ano na Coruña:
Desde O Levantador de minas.
Pablo Bouza gaña o XXXVI Certame Literario do Concello de Vilalba
O poeta de Fene Pablo Bouza Suárez vén de gañar o XXXVI Certame Literario do Concello de Vilalba, dotado con 3000 euros e a publicación da obra, polo seu poemario Na intimidade do azougue, mentres que Martiño Maseda conseguiu o segundo premio coa súa obra Nos labirintos das almas, dotado con 1000 euros e a súa publicación. O xurado estivo composto polo concelleiro de cultura de Vilalba, José María García-Leira, o académico e escritor Darío Villanueva, o xornalista Fidel Fernán e o xefe territorial de cultura en Lugo, José Carlos Rodríguez Andina, actuando como secretario Xulio Xiz. O poeta de Ferrolterra repite, desta maneira, o éxito da pasada edición, en que tamén gañara o certame.
Concurso Musicando Carvalho Calero
A 
Associaçom Galega da Língua e Komunikando.net convocan o Concurso Musicando Carvalho Calero, que consiste en poñerlle música a un poema do autor ferrolán, que logo se deberá enviar en formato mp3 a esta dirección de correo electrónico: aperloca@komunikando.net. A dotación é unha semana nun estudio profesional para gravar todos os temas que se queiran, máis 3 días para masterizar o disco resultante. Toda a información sobre o concurso e os temas que van chegando pode ser consultada aquí.
Celanova: actos de homenaxe a Celso Emilio Ferreiro
O 
domingo 29 de agosto varios poetas das Redes Escarlata, entre os que figuran Claudio Pato, Alberto Lema e Elvira Riveiro, Rafa Balado, Xabier Xil Xardón, Brais González, Aitor Rivas, Xosé Antón Laxe Martiñán, Oriana Méndez e Silvia Penas, desenvolverán a súa Acción de ferreiro, acto que coincide coas celebracións de homenaxe a Celso Emilio Ferreiro que cada ano teñen lugar en Celanova, a súa vila natal. Con esta acción pretenden manifestar as posibilidades dos individuos como unidades dun proxecto común. Durante o percorrido dos membros da asociación pola vila, que manteñen en segredo para manter o efecto sorpresa, recitarán textos de Celso Emilio ou doutros poetas que os participantes seleccionen. Todos eles confluirán nun punto predeterminado no que recitarán, “en efusión polifónica”, o poema do poeta celenovés Lingua proletaria.
Ese mesmo domingo 29, a partir das 11:00 h., no cemiterio de San Breixo de Celanova, onde está enterrado o autor de Longa noite de pedra, organizouse unha homenaxe colectiva ao poeta, impulsada pola Fundación Celso Emilio Ferreiro, o Colectivo Arraianos e as propias Redes Escarlata. No transcurso do acto, presentarase a nova entrega da revista Arraianos, un número especial titulado Vivir na raia, co que a publicación, segundo os seus impulsores, pecha un ciclo comezado hai seis anos nese mesmo espazo e como homenaxe tamén ao poeta. A continuación haberá un recital poético e musical onde intervirán Anxo Angueira ou Xosé Luís Méndez Ferrín, e músicos como MC García -da formación Dios Ke Te Crew-, Leo e Arremecághona ou os Labregos no tempo dos Sputniks, que interpretarán cancións con letras de Celso Emilio en clave contemporánea. O acto pecharase co gaiteiro de Lobeira, Daniel Romero.
Eva Moreda na Revista das Letras
Vía GaliciaHoxe.com.
Santiago: recital Camiño de Oz
O sábado 21 de agosto, ás 19:30 horas, desenvólvese o recital de poesía galega contemporánea Camiño de Oz, con Emma Pedreira, Dores Tembrás, Begoña Regueiro, Xurxo Fernández Martíns e Ana Cibeira. O acto, presentado por Teresa Seara, celébrase na Praza de Cervantes, de Santiago, sendo organizado pola Libraría Couceiro.
