A escritora Ana Pérez Cerviño presenta mañá xoves 11 de marzo ás 19:30 horas o seu libro Elucubracións dunha mente en proceso de sé-lo, “un profundo diálogo sobre o sentido da vida, o significado de nós mesmos/as e os nosos pensamentos no devir dos días”. Será en Vigo, na Rúa López de Neira número 27.
Arquivo da categoría: Presentacións de libros
Santiago: presentación dun libro de David Otero
O libro de David Otero Nun bambán de non virar baldo preséntase este venres 12 de marzo ás oito da tarde na Libraría Couceiro de Santiago (Praza de Cervantes, 6). No acto intervirán Avelino Pousa Antelo –mestre galeguista e presidente da Fundación Castelao–, Xoán Xosé Fernández Abella –mestre e poeta–, Mini e Mero –mestres, do grupo musical A Quenlla–, X. Amancio Liñares Giraut –director editorial de 3C3– e o propio autor.
Ferrol: presentación da carpeta-homenaxe a Uxío Novoneyra
O próximo venres 12 de marzo terá lugar a presentación no Ateneo Ferrolán, da reedición especial da Carpeta “Homenaxe a Uxío Novoneyra” con poemas, fotografías e estampas de pintura que fixeron os creadores na homenaxe de hai dez anos. Esta reedición da carpeta foi promovida por Rei Zentolo con motivo do Día das Letras Galegas 2010. No acto contará coa participación de Uxio Novoneyra Rei.
Santiago: presentación dun poemario de Raúl Gómez Pato
Este xoves 11 de marzo ás 20,00 na libraría Couceiro de Santiago de Compostela presentarase o libro TRATADO DE ZOOLOXÍA PARA CORAZÓNS MANCADOS, de Raúl Gómez Pato. En dito acto participarán o autor, Raúl Gómez Pato, o escritor Carlos Negro, o editor Francisco Macías (Positivas), así como o músico Héctor Lorenzo, que interpretará algunhas cancións relacionadas co poemario presentado.
A Coruña: presentación dun poemario de Rosalía Fernández Rial
O venres 5 de marzo ás 20:00 no local da Agrupación Cultural Alexandre Bóveda (Rúa Olmos, 16-18, 1º) preséntase o poemario musical En clave de sol de Rosalía Fernández Rial. A autora estará acompañada por Olga Patiño Nogueira e Emma Pedreira; o recital contará ademais coa participación do músico Brais Morán.
A Coruña: presentación de Moncho Reboiras e o nacionalismo dos anos 70
Mañá mércores 3 de marzo preséntase o libro Moncho Reboiras e o nacionalismo dos anos 70, editado pola Fundación Bautista Álvarez de Estudos Nacionalistas. O acto terá lugar ás 8 da tarde na Casa Museo Casares Quiroga (rúa Panadeiras 12), e contará coa presenza de Lois Diéguez Vázquez, director de Programación de Cursos e Publicacións da Fundación Bautista Álvarez; e Francisco Rodríguez Sánchez, doutor en Filoloxía Románica e autor dunha ampla obra investigadora e de ensaio en temas culturais e políticos.
Escairón: Xabier Quiroga presenta O cabo do mundo
O vindeiro sábado, 6 de marzo, ás 20:00 horas presentarase nas instalacións do Círculo Saviñao (rúa Pardo Bazán 17 de Escairón) O Cabo do Mundo, a cuarta novela de Xabier Quiroga. No acto acompañarán ao autor Enrique Sampil e Manuel Bragado. O Cabo do Mundo é unha das finalistas dos premios AELG na categoría de Narrativa.
Gondomar: encontro con Begoña Caamaño
Hoxe martes 2 de marzo celébrase unha nova sesión do club Sete Vidas centrada na lectura da novela da escritora viguesa Begoña Caamaño Circe ou o pracer azul (Galaxia, 2009). A cita será, coma sempre, a partir das 20.00 horas na Biblioteca Municipal de Gondomar. O encontro coa escritora terá lugar no mesmo espazo ás 21 horas.
Santiago: presentación da colección infantil “A igualdade conta”
Ferrol: presentación dun ensaio de Manuel Antón
Mañá mércores 3 de marzo na Galería Sargadelos Ferrol terá lugar a presentación do libro A ceca de Xuvia. Unha visión dende a Economía, do autor Manuel Antón, editado por Edicións Embora. O acto ten entrada libre e comezará ás 20 horas.
