María Xesús Lama, Premio Nacional de Ensaio pola súa biografía de Rosalía
Desde
Sermos Galiza:
“Rosalía de Castro. Cantos de independencia e liberdade (1837-1863) é o libro que lle acaba de valer a María Xesús Lama o Premio Nacional de Ensaio do Ministerio de Cultura. Publicado en 2017 por Galaxia, é a primeira parte dun ambicioso proxecto biográfico sobre a poeta de Follas Novas.
O galardón, dotado con 20.000 euros, coñeceuse na mañá desta quinta feira, 8 de novembro. Segundo o xurado, a obra de Lama (Lugo, 1964) “contribúe a revisar unha imaxe tópica de Rosalía de Castro, ancorada nunha visión romántica e chorosa, amosando unha escritura lúcida, independente e defensora da liberdade, a igualdade e a xustiza social”.
María Xesús Lama traballa como profesora de literatura galega na Universidade de Barcelona. Autora tamén de investigacións sobre o celtismo e a materia de Bretaña, con Cantos de independencia e liberdade iniciou a escritura dunha das máis completas achegas á vida e á obra de Rosalía de Castro.”
Linguaxes dixitais, de Clara Vidal
Desde
o blogue de Clara Vidal:
“Linguaxes dixitais verá a luz antes de rematar o 2018. Este poemario reúne poemas escritos ao longo de moitos anos. Nas próximas semanas, poderedes ver algún traballo anexo que elaborei para dar a coñecer o libro, comezando por este videopoema xa pendurado na miña canle de YouTube.
Ademais de informarvos desta boa nova, escribo este artigo para facer unha prevenda porque o libro está editado nunha editorial brasileira e facerse con el non vai ser moi doado para xente que non viva no Brasil. Antes de enviar o poemario ao prelo, eu farei un pedido de moitos libros. Se queres formar parte dese paquete que me chegará a min e que eu me encargarei de repartir entre a xente que o merque tan cedo como sexa posíbel, tan só terás que pagar o prezo do libro. Se non queres obter o libro a través de min, este estará á venda en cuestión de semanas na páxina da editorial, mais terás que pagar o custo do libro e tamén o do transporte (é dicir, 12 €+gastos).
A forma da prevenda será sinxela:
– Ingresa 12 € (o que custa o libro) no meu PayPal e…
– Enche o formulario que aparece a continuación. No caso de non ter PayPal, fala comigo.”
Cuntis: presentación de No medievo, castañas e castiñeiros como recursos económicos, de Héitor Picallo
Vila de Cruces celebrou o Día de Xosé Neira Vilas
Desde
a Xunta de Galicia:
“A Fundación Neira Vilas, o Concello de Vila de Cruces e a Xunta de Galicia celebraron o 3 de novembro o Día de Xosé Neira Vilas no concello pontevedrés, con motivo do 90º aniversario do nacemento do crucense máis universal en Gres. Unha cita que contou coa participación do secretario xeral de Política Lingüística, Valentín García. A conmemoración incluíu a entrega do III Premio Xosé Neira Vilas de Novela Curta para nenos ou adolescentes, que este ano recaeu no escritor Pedro Rielo Lamela pola obra Detrás dos perdidos, e a representación do espectáculo de baile e música tradicional Balbino, co que a formación compostelá Cantigas e Agarimos pechou o programa Danza 3 da Agadic. (…)
No acto de entrega do premio interviñeron tamén Jesús Otero, alcalde de Vila de Cruces; Luís Reimóndez e Rosalía Morlán, presidente e secretaria da Fundación Xosé Neira Vilas, respectivamente; Juan Andrés Fernández Castro, membro do xurado; e Pedro Rielo, gañador do certame.
O pasado 30 de outubro o xurado da terceira edición do Premio Xosé Neira Vilas de Novela Curta declarou gañadora, por unanimidade, a obra Detrás dos perdidos, de Pedro Rielo Lamela. Na elección influíu a viveza dos seus diálogos, o logrado da ambientación dos escenarios e a caracterización dos personaxes, que converten a narración nun texto de agradable lectura que combina a intriga coas evocacións paisaxísticas e as reflexións transcendentes.
O Premio Xosé Neira Vilas de Novela Curta, convocado pola Fundación Xosé Neira Vilas co apoio da Secretaría Xeral de Política Lingüística, está dotado con 1.000 euros e coa publicación da obra gañadora.
Pedro Rielo Lamela (Pontevedra, 1972) é escritor e xornalista. Como poeta publicou Illado na incerteza (2002) e As palabras furtivas (2006). Como ensaísta, é autor da monografía Ovidio Murguía (2004). Na súa faceta de xornalista, actualmente traballa nos informativos da TVG.”
“O veleno vertebral”, por Emma Pedreira
Artigo
de Emma Pedreira na Plataforma de Crítica Literaria A Sega:
“Escolle sempre Lara Dopazo Ruibal (Marín, 1985) un animal totémico a través do cal comunicarse co seu público lector. Se xa a Ovella marcara o seu debut poético (Premio Francisco Añón 2016) e Os Lobos na casa de Esaú (Chan da Pólvora, 2017) ceibaran a manda, é agora con Claus e o alacrán (Espiral Maior, 2018), merecedor do Premio de Poesía Fiz Vergara Vilariño do ano 2017, que recolle a animalización do seu leit motiv na figura do alacrán. Insectos, lesmas e formigas formarán o corifeo da alimaria que será fío condutor e filtro confesional do eu poético.
O alacrán fala, para Lara Dopazo Ruibal, de supervivencia. Alimaria despreciada polos demais seres vivos pola súa perigosa asociabilidade, no desespero pode atacar coa súa puga mortal ou inocular o veleno no seu propio corpo para matarse. Así actúan tamén os medos humanos, incapaces ás veces de deixarnos asumir a perda, a precariedade, a ausencia e continuar. Paralizan e mancan.
Poemario de personaxes, Lara, o alacrán e Claus amósanse vencidas desde o inicio. Os espazos son a ruína e os corpos constitúen o territorio de dor e dúbida vencidos ante o medo á desaparición da casa matriz e do núcleo familiar. (…)”
Bertamiráns: Escola de Escritoræs. Obradoiro de creación literaria “Mastervers. Petiscos poéticos”, con Carlos Negro
O
Obradoiro de creación literaria Mastervers. Petiscos poéticos, impartido por Carlos Negro, é unha iniciativa da Escola de Escritoras-es da AELG, co patrocinio do Servizo de Normalización Lingüística do Concello de Ames.
Obradoiro de versos para mentes creativas que desexan poñer en xogo a imaxinación e a intuición, usando unha multitude de ingredientes da nosa hora literaria.
Sempre coa mirada aberta e o oído delicado, poñendo o mundo ao revés.
Calendario e inscrición
– Días: sábados 10, 17 e 24 de novembro; e sábado 1 de decembro.
– Horarios: de 11:30 a 13:30 h.
– 20 prazas para persoas maiores de 15 anos (número mínimo de asistentes: 10).
– Inscrición, necesaria e gratuíta, en normalizacion@concellodeames.gal, indicando os seguintes datos:
- Nome e apelidos
- Idade
- Teléfono
As prazas asignaranse por orde de solicitude.
O obradoiro desenvolverase no Pazo da Peregrina de Bertamiráns (Avenida da Peregrina, 16 –como chegar-).
O obradoiro enmárcase na Escola de Escritoras e Escritores da AELG, iniciativa que centra os seus esforzos en impartir, por concellos de todo o país, obradoiros con formatos e destinatarios diversos, nos que se abordan diferentes xéneros literarios e contidos. Trátase dunha iniciativa que, cos autores/as como guías, ten o obxectivo de transmitir a experiencia apaixonante do acto creador, tentando concienciar á sociedade do imprescindíbel que é a estimulación creativa na escrita e o seu papel complementario na formación do individuo. O proxecto aposta por ofrecer á mocidade un sistema lingüístico, literario e cultural propio no que asentar as súas raíces.
O Milladoiro: Escola de Escritoræs. Obradoiro de creación literaria “A literatura pode cambiar (un pouco) as nosas vidas”, con María Lado
O
Obradoiro de creación literaria A literatura pode cambiar (un pouco) as nosas vidas, con María Lado, é unha iniciativa da Escola de Escritoras-es da AELG, co patrocinio do Servizo de Normalización Lingüística do Concello de Ames.
O obradoiro achegará as persoas participantes á literatura, tanto á escrita como á lectura, de maneira creativa e lúdica.
A literatura pode cambiar (un pouco) o noso mundo, porque nos permite relacionarnos co que nos rodea. Un obradoiro para espertar o amor pola escrita.
Calendario e inscrición
– Días: sábados 17 e 24 de novembro; e sábados 1 e 15 de decembro.
– Horarios: de 11:30 a 13:30 h.
– 20 prazas para persoas maiores de 15 anos (número mínimo de asistentes: 10).
– Inscrición, necesaria e gratuíta, en normalizacion@concellodeames.gal, indicando os seguintes datos:
- Nome e apelidos
- Idade
- Teléfono
As prazas asignaranse por orde de solicitude.
O obradoiro desenvolverase na Casa da Cultura do Milladoiro (Travesía do Porto –como chegar-).
O obradoiro enmárcase na Escola de Escritoras e Escritores da AELG, iniciativa que centra os seus esforzos en impartir, por concellos de todo o país, obradoiros con formatos e destinatarios diversos, nos que se abordan diferentes xéneros literarios e contidos. Trátase dunha iniciativa que, cos autores/as como guías, ten o obxectivo de transmitir a experiencia apaixonante do acto creador, tentando concienciar á sociedade do imprescindíbel que é a estimulación creativa na escrita e o seu papel complementario na formación do individuo. O proxecto aposta por ofrecer á mocidade un sistema lingüístico, literario e cultural propio no que asentar as súas raíces.
O escritor Xabier López gaña coa novela 900 o XXX Premio Torrente Ballester en galego da Deputación da Coruña
Desde
a Deputación da Coruña:
“O escritor Xabier López coa novela 900 é o gañador da nova edición do Premio Torrente Ballester de narrativa en lingua galega. O xurado destacou a calidade desta “gran novela río” que ronda as cincocentas páxinas polas que o autor recibirá un premio de 25.000 €, a maior dotación da literatura na nosa lingua.
O xurado da XXX edición do Premio Torrente Ballester na modalidade de lingua galega decidiu escoller como obra gañadora unha “gran novela río” que foi presentada co lema Casa Tomada e o título 900. Unha vez aberta a plica, a obra resultou ser do escritor Xabier López, un autor cunha traxectoria xa consolidada e unha ampla obra que recibiu xa numerosos recoñecementos en distintos certames literarios.
A escritora Marica Campo, a investigadora e profesora da Universidade de Vigo, Ana Luna, e os escritores Carlos Negro, Suso de Toro e Antonio Piñeiro, gañador da anterior edición do premio coa súa obra A través do fume, coa vicepresidenta e responsábel da área de Cultura da Deputación da Coruña, Goretti Sanmartín Rei como presidenta e a xefa de servizo de Cultura, Mercedes Fernández Albalat como secretaria formaban parte dun xurado que destacou a “alta calidade das obras finalistas do certame, con novelas moi audaces e arriscadas”.
De 900, a obra gañadora, unha novela que supera as 500 páxinas, o xurado destaca que se trata dunha “novela río dunha saga familiar narrada con intelixencia, ironía e mesmo humor”. Define tamén a través do fallo a obra presentada por Xabier López como unha “novela sagaz, cervantina que percorre a historia de Galiza e Europa desde o século XIX até mediados até a posguerra de mediados do pasado século”. (…)”
A Coruña: presentación de Vivir sen permiso e outras historias de Oeste, de Manuel Rivas
O
8 de novembro, ás 19:00 horas, na FNAC da Coruña (Praza de Lugo, s/n), preséntase o libro Vivir sen permiso e outras historias de Oeste de Manuel Rivas, publicado por Xerais. No acto, xunto ao autor, participa Xosé Manuel Pereiro.
