Asasinato 
no consello nacional, de Diego Ameixeiras, publicada en Xerais, obtivo o premio Libro do ano 2010, no ditame anual do xurado dos premios Irmandade do Libro, da Federación de Libreiros de Galicia, que se fixeron públicos nun acto celebrado en Narón. A colección Di-versos da Editorial Positivas conseguiu o premio á mellor Obra Editorial do 2010, pola súa aposta por un xénero minoritario, como é a poesía, tanto no ámbito nacional como da tradución de autores estranxeiros, e moi especialmente polo descubrimento e aposta cara a autores radicalmente contemporáneos, mentres que no apartado de Institucións, a premiada foi a Asociación Galega do Libro Infantil e Xuvenil, Galix.
No apartado de Fomento da lectura, o galardón recaeu na Fundación Xosé Neira Vilas (Vila de Cruces), polo traballo de promoción cultural no ámbito rural, o fomento da lectura que leva a cabo a súa biblioteca, a aposta polos xéneros de poesía e teatro a través dos seus premios Arume e Estornela e como recoñecemento ao traballo de Anisia Miranda ao longo dos últimos anos. O premio para Librerías recaeu na Aenea, de Santiago, pola súa produción interdisciplinar e por contribuír á difusión do libro a través da súa actividade cultural na propia libraría. Finalmente, o Xurado otorgou o premio para o centro de ensino ao IES Taboada Chivite de Verín pola orixinalidade das súas propostas, o entusiasmo na práctica diaria do club de lectura e a constancia na difusión lectora na mocidade. Estes galardóns súmase ao xa anunciado a Víctor F. Freixanes como autor do ano.
Arquivos da etiqueta: Edicións Positivas
Laiovento, Positivas e Baía chegan aos 20 anos
Allariz: presentación de Abelcebú, de Carlos Negro
O 
venres 11 de febreiro, ás 20:00 h., na Libraría Aira das Letras de Allariz preséntase o libro Abelcebú, de Carlos Negro, publicado en Edicións Positivas. No acto, que definen como un aquelarre literario, participan, co autor, Paco Macías (editor) e o titiriteiro Iñaki de Lalín (esconxurador) “para tentar representar ao demo”, segundo comentan os seus participantes.
Edicións Positivas publica Conversa ultramarina, inédito de Lois Pereiro
Edicións Positivas, 
tras reeditar as obras de Lois Pereiro, Poemas 1981-1991 e Poesía última de amor e enfermidade 1992-1995, publica agora o inédito Conversa ultramarina, obra na que o autor fala das súas inquedanzas, gustos, amizades, proxectos, do futuro.
Santiago: presentación de Abelcebú, de Carlos Negro
O martes 21 de decembro, ás 20:00 horas, na Libraría Couceiro (Praza de Cervantes, 6) de Santiago de Compostela, preséntase Abelcebú, de Carlos Negro, publicado por Edicións Positivas. O acto, segundo comentan, consiste na aparición “Por segunda vez en Compostela, en vivo e en directo, baixo apariencia carnal, o Demo en persoa, o noso adorado e pecadento Abelcebú. Exercerán de acólitos, nesta extravagante cerimonia, os seguintes elementos: Paco Macías (proveedor de surtidos Cuétara, Carlos Negro (amanuense trapalleiro) e Inacio Vilariño (mestre en augardentes). Haberá exorcismos literarios, tómbola malévola e, por suposto, gran queimada”, e advirten que a “Libraría Couceiro non se fai responsábel dos danos morais que poida padecer o público asistente a este evento. Rógase leven extintores, por se ascaso.”
A Coruña: presentación de Organoloxía, de Eva Moreda
O martes 29 de xuño, ás 20:30 horas, preséntase na Asociación Cultural Alexandre Bóveda (rúa Olmos, 16-18, 1º), da Coruña, o libro Organoloxía, de Eva Moreda, publicado en Edicións Positivas, e que ven de gañar a V edición do premio Narrativas quentes. O acto desenvolverase no salón de actos da Asociación, con entrada libre.
Santiago: presentación de Abelcebú, de Carlos Negro
O sábado 26 de xuño, ás 23:00 horas, na Granxa do Sexto, en Santiago, preséntase Abelcebú, de Carlos Negro, publicado por Edicións Positivas. O acto, segundo informan, consistirá nun Gran Show con queimada con glamour, tómbola popular, empanada a esgalla e exorcismos literarios, organizado por O Demo Perello e a Mona Chita, onde participan o propio autor, Camilo Franco e Iñaki de Lalín. Segundo advirten, “queda terminantemente prohibido que acudan ao espectáculo representantes das forzas vivas ou mortas da cidade, alén de banqueiros, especuladores bolsistas, poetas demasiado consagrados, fanáticos da selección española e, por suposto, os conselleiros de educación e de cultura.”
Editoras alíanse para ofrecer unha colección común de impresión conforme demanda
AGE: «Nace a colección «Módicos, unha iniciativa de Rinoceronte, Urco, Positivas e 2.0. que vai compartir deseño e prezo común ( 9,90 euros) e que se imprimirá á carta, segundo a demanda real dos compradores. A distribución farase exclusivamentte pola rede, por medio da web toupa.net. Os potenciais lectores poden escoller a obra que chegará ao enderezo que elixan.» Máis información en Toupa.net.
EDITORES DE COMPOSTELA na Feira do Libro de Santiago
A Feira do Libro de Santiago, que o sábado se inaugura no paseo da Alameda, terá este ano como unha das súas principais novidades a presenza dun stand monográfico onde se poñerán á venda só títulos de temática local, máis de sesenta referencias de todos os xéneros (infantil, ensaio, novela, poesía…). A iniciativa partiu do recén creado grupo de traballo EDITORES DE COMPOSTELA, que empezou a funcionar este mes de abril fundado por tres empresas culturais da cidade: Alvarellos Editora, Sotelo Blanco Edicións e Edicións Positivas, e que espera integrar nas próximas datas a máis editoriais ubicadas na capital de Galicia.
Conta co apoio da Concellaría de Cultura e tamén do Consorcio de Santiago, que terá á venda no stand parte do seu fondo editorial. No stand de EDITORES DE COMPOSTELA poderanse atopar os títulos que, sobre Santiago de Compostela, ten cada unha destas editoras nos seus respectivos catálogos. Entre outros, estarán á venda os contos infantís da colección “Branco de cores” de Sotelo Blanco ou as novidades de Edicións Positivas como Abelcebú, de Carlos Negro. Alvarellos Editora presentará na Feira dúas novidades editoriais: o luns 3 ás 20 horas, Apuntes históricos sobre Santiago, de Antonio López Ferreiro, libro co-editado co Consorcio e que conmemora o centenario do falecemento deste insigne historiador; o venres 7 ás 19 horas, o audio-libro de Uxío Novoneyra Tempo de elexía.
Os responsables desta nova iniciativa cultural consideran que “pode ser atractivo para calquera compostelán ou visitante atopar, nunha soa caseta da Feira, esta ampla e tan variada selección de títulos locais, algúns deles nada doados de atopar. Por outra banda, os editores de Santiago estamos obrigados a establecer accións conxuntas para fomentar a presenza do libro e da lectura na nosa xente, e facer participar tamén nisto ás administracións”.
• Para contactar con EDITORES DE COMPOSTELA:
Paco Macías: 660 397 064
Quique Alvarellos: 609 90 88 52
Santiago: presentación dun poemario de Raúl Gómez Pato
Este xoves 11 de marzo ás 20,00 na libraría Couceiro de Santiago de Compostela presentarase o libro TRATADO DE ZOOLOXÍA PARA CORAZÓNS MANCADOS, de Raúl Gómez Pato. En dito acto participarán o autor, Raúl Gómez Pato, o escritor Carlos Negro, o editor Francisco Macías (Positivas), así como o músico Héctor Lorenzo, que interpretará algunhas cancións relacionadas co poemario presentado.
