Coa lexenda “Galiza nom se vende”, desde 4 de setembro Salvaterra acollerá unha nova edición do «Festival da Poesia no Condado». Ofrecerá, como acostuma, un amplo programa que inclúe pintura, fotografía, poesía visual, música e poesía. Entre os poetas do programa figuran Marica Campo, O Leo, Kiko Neves, Carlos Figueiras, Valentina Carro, María Lado, Xiana Arias, Pedro Casteleiro, Paco Souto, Concha Rousia, Cruz Martínez, Alberto Lema, Igor Lugrís, Lino Braxe, Chus Pato, Pilar Beiro, Núria Martínez Vernís (Països Cataláns), Limam Boicha (Saara) e Isaque Ferreira (Portugal). Vexa o programa na páxina da SCD Condado.
Arquivo da categoría: Arte
Novo número da revista dixital Búsola
O novo número da revista dixital Búsola está dispoñible. Esta publicación, revista de artes, pensamento, ciencia que edita a Casa da Cultura do Concello do Valadouro presenta o nº 3 (4º en total) no que colaboran Olga Castro, Aurora Santos, Manuel Gago, Beatriz Hervella, Olga Osorio, Clara Martín, Noemí López e Xaquín Marín que prologa este novo número.
Exposición plástico-poética en Cabanas Raras
«Com este cartom postal, que reproduze o desenho feita com o poema Casa Skylab, anunciamos que o dia 21, estaremos com o nosso recital, com a nossa exposiçom, “Poesia para ver, Poesia para ler”, em Cabanas Raras, no Bierzo, com motivo das festas da nossa aldeia, as festas de santa ana.
“Poesia_para_ver/Poesia_para_ler” é um projecto que procura novos caminhos de expressom, novas formas de contacto com o público/leitor, convertindo o poema num objecto plástico que se poda ao tempo ler e ver, recitar e expor, num intento de achegar a poesia, e a literatura em geral a novos públicos, intentando romper o muro que separa a criaçom da vida cotiá. O resultado: poemas/cartazes que perfeitamente podem decorar as paredes dumha casa, dumha oficina, dum bar, dumha rua…
E, exclussiva mundial, em Setembro, para quem nom poda achegar-se até Cabanas Raras nesse dia, estarei, sem nom há novidades que nom o permitam, num famoso e estupendo festival da poesia que se celebra no sul da nossa naçom.» (Ovnis e Isoglossas)
Preséntase na mesma cidade o libro Ferrol, de Miguel Fernández Fernández
O día 19 na Central Librera (Rúa Real), a partir das 18:00, Miguel Fernández Fernández asinará exemplares do seu libro Ferrol antes de presentalo na Fundación Caixa Galicia (20:00). No acto de presentación desta obra acompañarán a Miguel Fernández o coautor do libro, o escritor e xornalista Ramón Loureiro, ademais de Hermenegildo Franco Suances e Tucho Calvo.
Entrega en Sarria do VIII Premio de Poesía Fiz Vergara Vilariño
O venres 18 de abril terá lugar no hotel NH Alfonso IX ás 20:00 a entrega do VIII Premio de Poesía Fiz Vergara Vilariño á poeta Olalla Cociña.
«Comezaremos cun solo da bailarina Carmela Garcia, que interpretará a coreografía “El jardín”, coa que recibiu o Premio á bailarina sobresaínte no XXI Certame Coreográfico de Madrid. A continuación intervirán os membros do xurado Xosé Mª Álvarez Cáccamo, Yolanda Castaño e Martín Veiga, o concelleiro de Cultura do Concello de Sárria Xermán Arias, o alcalde de Sárria Claudio Garrido e a Presidenta da A.C. Ergueitos María Casar. O artista plástico Eduardo Valiña farálle entrega á gañadora dunha peza coa que contribúe a facer do Fiz Vergara Vilariño un encontro das artes. O mantedor do acto será X. A. Neira Cruz.
Remataremos a entrega do premio cunha actuación do dúo formado por Luis Soto (frauta da Real Filharmonía de Galicia) e Xosé Antonio Rodríguez (profesor de guitarra no Conservatorio profesional de Santiago de Compostela) interpretando obras de Piazola, Machado, Satie e Paulino Pereiro. Posteriormente haberá unha cea no mesmo hotel.
Nesta ocasión tamén nos sería moi grato poder terte neste acto que anova en cada edición o noso labor de manter viva a memoria do Fiz e de facer medrar a árbore da poesía cun novo poemario anainado na casa da Espiral Maior.» (María Casar, Presidenta da A. C. Ergueitos)
GZ CREA 08: Certame galego de creadores novos
«A Vicepresidencia da Igualdade e do Benestar, a través da Dirección Xeral de Xuventude e Solidariedade convídavos a participar neste certame galego de creadores novos, que inclúe as especialidades de teatro, artes plásticas, moda, música, relato, poesía, videocreación, banda deseñada, graffiti, carteis, videoclips, composición para banda de música e deseño de xoias.
Acreditamos na creatividade da mocidade galega, apostamos por crear estímulos e canles de comunicación para a súa divulgación como modelos reais de presente e de futuro. O que pretendemos e implicarnos de xeito activo coa mocidade galega na procura de ferramentas e espazos que permitan estimular e vehicular as múltiples inquietudes artísticas individuais e colectivas da xuventude galega. […]» (Vicepresidencia da Igualdade e o Benestar da Xunta de Galiza)
As bases poden consultarse na web de GZ CREA 2008.
Presentación na Coruña dun libro sobre o pintor Alfonso Costa
O mércores día 26 de marzo ás 20.00 horas na sala de audiovisuais da Biblioteca Provincial (Rego d’ Auga, 37, A Coruña), terá lugar a presentación do libro Alfonso Costa (Colección Grandes Pintores). No acto intervirán as escritoras Ánxeles Penas e Eva Veiga, e o artista Alfonso Costa.
Inauguración da exposición ART-NATURA na Coruña
A exposición Art Natura, na que participan máis de 140 artistas e escritores galegos coa temática da defensa do medio natural, inagúrase este xoves 24 ás 20:00 horas no Edificio do Palexco, na Coruña. Poderase visitar entre os días 24 de xaneiro e 14 de febreiro. Á inauguración da exposición asistirán membros de ADEGA, da corporación municipal do Concello da Coruña e artistas participantes. A mostra realízase coa colaboración da Concellería de Cultura do Concello da Coruña e as consellerías de Cultura e Medio Ambiente. (ADEGA)
Entre as plumas figuran: Marilar Aleixandre, Glauco Antonio Amigo, Rosa Aneiros, Xurxo Borrazás, Darío Xohán Cabana, Fernando Cabeza, Francisco Castro, Olalla Cociña, Marta Dacosta, Lois Diéguez, Xoán Carlos Domínguez, Rosa Enríquez, Lobato, Yolanda López, Xulio Valcárcel, Ramón Loureiro, Xosé Miranda, Teresa Moure, Xesús Pereiras, Vicente Piñeiro, Xesús Rábade, Henrique Rabuñal, Daniel Salgado, Xavier Seoane, Xosé Vázquez Pintor, Miro Villar, Helena Villar e Alfredo Ferreiro.
Urbano Lugrís: viaxe ao corazón do océano, novo libro de Antón Patiño.
Urbano Lugrís: viaxe ao corazón do océano, de Antón Patiño (Ediciós do Castro. Arte, 2007) «trátase dun longo traballo de achegamento á vida e obra do pintor do mar, elaborado despois de décadas de esculcas. Rastrexando datos biográficos e referencias perdidas na néboa do tempo. Iste libro é o resultado máis completo despois de moitos textos e publicacións que dedicou o autor á obra de Lugrís. Xunto con Rosario Sarmiento, Antón Patiño foi comisario da meirande exposición dedicada a Urbano Lugrís (que tivera lugar en Madrid e Santiago de Compostela contra o 1997). Daquela xa fixera un extensa achega en profundidade ao pintor cunha morea de datos publicados no catálogo da mostra.»
III IMPLÍCATE! Noite de música e palabra solidaria
«Xa están á venda as entradas para o III IMPLÍCATE! Noite de música e palabra solidaria, promovido por Implicadas no desenvolvemento. O evento solidario, que terá lugar o domingo 16 ás 20:30 horas, reunirá no Teatro Principal de Compostela a artistas de luxo a prol da sensibilización cidadá e da cooperación.»
María Lado, Antón Lopo, Estíbaliz Espinosa e Miguel Anxo Fernán Vello daranse cita neste evento, que será presentado por Yolanda Castaño e Isabel Blanco.
