Arquivo da categoría: Obradoiros
A Coruña: obradoiro O ollo da Arte (II), dirixido por Antía Otero
O ollo da Arte (II) é 
un obradoiro de creación artística contemporánea impartido por Antía Otero, onde coñecer, descubrir e valorar o feito contemporáneo e a creación actual a través dunha mirada propia.
Obxectivos:
– Presenciar.
– Escoitar.
– Poñerse na pel d@ outr@.
– Materializar.
– A deriva.
Contidos:
– A mochila.
– Poñer en valor.
– Colocarnos na pel d* outr*.
– A construción.
– A arquitectura do dispositivo.
– Facer e refacer, entre os pilares e a cheminea.
– A mostra.
– A valoración.
Se che interesa a arte, se tes unha idea, un proxecto artístico no que leves tempo pensando, un bosquexo que che bule na cabeza… e queres participar nun proceso compartido entre máis persoas con inquietudes comúns… ou se non tes nada pensado, pero sintes ganas de aprender e compartir, de descubrir deixándote levar polo proceso e a deriva…. O ollo da arte II é un laboratorio de creación que está pensado para iso.
Ao longo dos anos, O ollo da arte foise enchendo de xente interesada na literatura, na fotografía, nas artes escénicas, na arte urbana, na música, na arquitectura ou no cinema. *s participantes neste obradoiro son *s verdadeir*s protagonistas, poñendo en valor os seus intereses e abríndose cara outros campos máis descoñecidos.
Empregando a práctica, ferramentas que nos axuden a colocarnos na propia experiencia artística, xerando dinámicas de grupo nas que tod@s sexamos creadoras e espectadores a un tempo e marcando un plan de traballo, dende a primeira xornada teremos a oportunidade de colocarnos na pel d@ outr@ e de acompañarnos nos procesos partindo dunha vía de traballo personalizada para cada participante.
Ao longo do laboratorio teremos a visita de dous creadores que traballen en activo e que se achegarán a NORMAL para compartir co alumnado as súas experiencias, guiaros proxectos e aportar novas ferramentas.
Metodoloxía: As sesións estarán organizadas en partes teóricas e prácticas, lecturas compartidas, debates e mostras continuas dos procesos.
Datas: todos os luns entre o 23 de febreiro e o 8 de xuño de 2015.
Horario: de 19:00 a 21:00 horas (30 horas en total).
Lugar: Aula circular de NORMAL.
Prezos: 35€ comunidade universitaria da UDC (25€ en segunda matrícula) / 55€ público xeral (45€ en segunda matrícula)
Créditos solicitados: 2 créditos libre elección (plans antigos), 1 crédito recoñecemento (plans novos)
Participantes: máximo de 15 persoas.
O prazo de matrícula e pagamento comprende desde o día 2 ao 16 de febreiro. Pode facerse directamente nesta plataforma en liña.
Máis información en:
NORMAL. Espazo de intervención cultural da UDC. Paseo de Ronda 47, A Coruña.
TF: 981 167 000, extensión 4502 Mail: info@istoenormal.org
Compostela: obradoiro de creación literaria con Xosé Neira Vilas
Vigo: obradoiro de escrita creativa con Francisco Castro, o xoves 5 de febreiro
O
xoves 5 de febreiro, entre as 17:00 e as 19:00 horas, no Salón de Actos da Facultade de Filoloxía e Tradución da Universidade de Vigo, Francisco Castro dirixirá un obradoiro de escrita creativa gratuíto e aberto a toda e todo aquel que queira asistir.
“Dende o minuto un do Obradoiro escribiremos e faremos literatura. O director do Obradoiro proporá actividades que actuarán como catalizadores da creatividade. Logo, sobre os resultados obtidos (os poemas, os relatos, a descrición dos personaxes, a literaturización dalgún aspecto da realidade…), será o momento de teorizar e amosar como grandes autores e autoras da literatura universal constrúen o seu universo de ficción.
O Obradoiro é eminentemente práctico e participativo e nel practicaremos o relato breve ou a creación de personaxes, todo co único obxectivo de escribir e gozar do feito de crear literatura, aprendendo, ao tempo, as técnicas básicas da creación literaria.”
Esta actividade está enmarcada no Congreso Exploring Liminality in Anglophone Studies, entre cuxos organizadores participa María Alonso Alonso, a quen agradecemos o envío da información.
A Coruña: obradoiro A palabra que hai, por Estevo Creus, o venres 30 e sábado 31 de xaneiro
Desde
Apiario:
“Periodicamente Apiario ofrecerá cursos intensivos e monográficos que coordinarán autor*s de recoñecido prestixio. Dentro da formación que ofrecemos aos nosos habituais parécenos fundamental a exposición ás distintas miradas literarias, para que cada quen poida atopar os camiños teóricos, metodolóxicos e prácticos máis axeitados para a súa voz.
A palabra que hai, con Estevo Creus, vai dirixido a todos aqueles que queiran achegarse ao traballo poético dende o cerne da palabra.
– Número de horas: 8.
– Horario: Venres 30 xaneiro (18:00 a 20:00) Sábado 31 xaneiro (11:00-14:00 e de 17:00-20:00) Prezo: 65 euros.
– Descrición: A palabra que hai é un obradoiro de escrita/pensamento no que, mediante xogos coas palabras e actividades de escrita, tenta provocar reflexións sobre os procesos creativos de forma que a suma de xogo, escrita e reflexión ofreza ás persoas participantes ferramentas novas para enfrontar calquera proceso creativo.
1. A palabra bala.
2. A palabra habitable.
3. A palabra é un como?
4. A palabra en ¨Lázaro e anda”.
5. A palabra en formatos.
– Matrícula e máis información: info@apiario.eu”
Vigo: obradoiro de escritura creativa. As técnicas dos grandes autores, con Dores Tembrás
Desde
Afundación:
“A proposta deste obradoiro tenta abordar a escritura creativa dende os mestres. Así apoiaremonos na análise dos mecanismos que algúns autores empregan maxistralmente nas súas obras, co obxectivo de penetrar e descubrir as súas ferramentas. O que nos interesa é fixar aquelas técnicas que servirán de guía para a propia escritura.
Organizado en catro bloques o traballo coa palabra irá da man de Julio Cortázar dende a concepción da trama, internándonos no proceso do misterio xunto co manexo da tensión e a distensión. Despois deterémonos con Sandor Marai na construción das personaxes, as posibilidades que se abren no retrato profundo, e esa procura da unicidade, da personaxe xenuina que trascende a propia obra. A seguir traballaremos con Herta Müller e o estilo único que fai recoñecíble a voz da autora. E fecharemos cunha das voces máis potentes do panorama galego, Gonzalo Hermo, que servirá de modelo para mergullarnos na precisión e a arquitectura do poema.
TRAMA: Cortázar. Casa tomada
O misterio necesario
Levar da man ao lector
Entre tensión e distensión
O final. Ecoando. Onde todo comeza
PERSONAXES: Sandor Marai. A herdanza de Eszter
Cuestión de detalle
Verosimilitude. Credibilidade
Accións e relacións
Individuos únicos
ESTILO: Herta Müller. O home é un grande faisán no mundo
A prosa poética
Contar e cantar
Ritmo. As palabras e a música
A construción da imaxe
PRECISIÓN: Gonzalo Hermo. Crac e Celebración.
A procura da palabra
Referentes. Cando o diálogo é imprescindíbel
De constelacións. O poemario que agroma
Fechar. O sen alento final
– Datas: Os venres, 13, 20 e 27 de febreiro ao 6 de marzo de 2015
– Horario: 18:00 a 20:30 h.
– Lugar: Sede Afundación Vigo (Rúa Policarpo Sanz, 24-26, Vigo. C. P. 36202).
– Duración: 10 horas.
– Prezo: 75 €
– Docente: Dores Tembrás.
– Prazas: 15.
– Inscricións en Servinova.
– De non chegar ao número mínimo de inscricións (13 persoas), o obradoiro cancelarase e devolverase o diñeiro da inscrición polo mesmo método por que se realizou o pagamento. En caso de cancelación, avisarase por correo electrónico ou por teléfono con un día de antelación.”
A Coruña: obradoiro De misterio e técnicas, por Dores Tembrás
Desde
Apiario:
Co aninovo arrincamos un curso de escrita creativa na Coruña. Os luns (19.00-21:00) aproximarémonos á literatura da man de Dores Tembrás dende dúas perspectivas: misterio e técnica. Emoción e mensaxe. Todo para adentrarnos na trampa, para descubrir o motor do texto. Un dos obxectivos é analizar o estrañamento que ten lugar cando un poema ou unha prosa nos toca. Traballar dende o íntimo ao universal. Percorrer os grandes tópicos, achegarnos ás palabras da tribo. Procurar as chispas metálicas que desprenden o contacto de determinadas palabras e analizar o traballo de grandes escritores universais (Cortázar, Marai, Müller, Pizarnik, Valente, Paz…) co fin de fascinarnos e tentar acceder ao mecanismo do poema e a maquinaria do texto.
Queres escribir? Buscas un espazo onde compartir a túa escrita e adquirir novas técnicas?
Estamos en Apiario (Rúa Pondal 4, Entrechán Esq.) Dende o luns 12 de xaneiro podes achegarte cando queiras.
Matrícula e toda a info: info@apiario.eu”
A Coruña: presentación e obradoiro sobre Man, o alemán de Camelle, de Beatriz Maceda e Laura Veleiro
O
sábado, 3 de xaneiro, ás 12:30 horas, na Libraría Sisargas (Rúa San Roque, 7), na Coruña, terá lugar a presentación de Man, o alemán de Camelle, escrito por Beatriz Maceda Abeleira e ilustrado por Laura Veleiro, publicado por Galebook. Posteriormente, as autoras dirixirán un obradoiro sobre o libro.
A Coruña: Obradoiro Literario Itinerante A Coruña e o Mar, a cargo de Xurxo Souto
O
Obradoiro Literario Itinerante A Coruña e o Mar, a cargo de Xurxo Souto, organizado pola Asociación de Escritoras e Escritores en Lingua Galega, dentro da Escola de Escritoras e Escritores da AELG, co patrocinio de Gadis, é un convite a desenvolver a creatividade literaria de cada un de nós.
Xurxo Souto insiste nos argumentos que lle son máis queridos: A Coruña e o Mar. Unha descuberta de dúas facianas desta cidade-barco, mediante dúas rutas ben diferentes cara o noso espazo interior:
A cidade é un libro que se le camiñando
Sábado, 13 de decembro
Tras das pegadas do Antigo Gremio de Mareantes, ou como a Cidade Vella e a Peixaría están inzadas de referencias náuticas que hoxe xa non sabemos ver.
Saída ás doce da mañá, dende o “Pórtico de San Andrés”.
Sábado, 20 de decembro
A toponimia das pedras percebeiras da península da Torre, ou o encontro co Mar Maior a poucos metros do centro mesmo da cidade.
Saída ás doce da mañá, dende o cargadoiro de pedra da Praia de Santo Amaro.
O obxectivo final deste obradoiro será realizar dentro dunhas semanas un recital ou lectura pública dos textos que xurdan tras destas dúas viaxes. Máis argumentos para seguir conformando (polo rego de Urbano Lugrís, Monterroso Devesa ou Luísa Villalta) a gran rapsodia da cidade-barco.
Cómpre acudir con papel e lapis, e en disposición de escribir e debuxar camiñando. En caso de que o mal tempo non permitise realizar estes paseos, as sesións do obradoiro desenvolveranse no local da Agrupación Cultural Alexandre Bóveda (rúa dos Olmos, 16)
Para persoas a partir de 16 anos.
Inscrición no 981 133 233 ou oficina@aelg.org
A Coruña: V Día Lugrís, o sábado 20 de decembro
O 
sábado 20 de decembro terá lugar na Coruña o V Día Lugrís, organizado polo Colectivo literario In nave civitas, en colaboración coa A. C. O Mural e a Asociación de Escritoras e Escritores en Lingua Galega. Este é o programa previsto:
– 17:00 h. A arribada do grafiti (Praza José Sellier).
Solemne e lírica inauguración do grafiti que recrea unha obra de Urbano Lugrís na Praza de José Sellier, cerna da Coruña lugrisá, seguido do tradicional Obradoiro de Paraugas Pintados (Praza José Sellier). Xuntarémonos para decorar os nosos paraugas con motivos mariños e lugrisáns cos que logo percorreremos as rúas coruñesas. (Que cada quen leve o seu paraugas, as súas pinturas e toda a súa imaxinación)
– 17:45 h. Manifestación atlántica e surreal (Praza de José Sellier-Xardín de San Carlos).
Cos nosos paraugas pintados e unha serpe mariña seguiremos as alancadas diurnas e nocturnas do pintor do mar até atoparnos con a outra metade de Ulyses Fingal: Antón Avilés de Taramancos.
– 18:30 h. Recreación do intre no que Antón Avilés de Taramancos coñeceu a Urbano Lugrís (Xardín de San Carlos).
Coa participación de todo o público asistente e Anxo Angueira.
– 18:45 h. Manifestación atlántica e surreal (continuación) (Xardín de San Carlos – Praza do Papagaio)
Segunda parte da marcha na que chegaremos até o Papagaio, seguindo os cantos de tritóns e sereas.
– 20:30 h. A habitación do vello mariño (Monty Ambigú)
Recital poético mariñeiro na memoria e honra do Noso Señor Lugrís polos vates mareiros Manuel O’Rivas, Serafín Mourelle e Xosé Iglesias.
Todos os actos deste V Día Lugrís son abertos.
Prégase que quen a tivera acuda cunha corna mariña para axudar a encher de sons atlánticos esta xornada e invitamos a que participedes nos actos disfrazados dalgunha das personaxes dos cadros do gran pintor sur-marino.
