O 
sábado 26 de outubro, no transcurso da Cea Anual de Agradecemento que se celebrará no Queen Museum of Art de Nova York, terá lugar a Gala de entrega de premios do Certame Anual de Literatura Internacional L. A. I. A. 2013 convocado por Latin American Intercultural Alliance. No evento o escritor ourensán Miguel Mosquera Paans recibirá o premio de finalista nesta convocatoria pola obra poética Aromas da cidade de Ourense.
Nun comunicado emitido pola Casa da Literatura Peruana en Lima o pasado 15 de outubro o autor Miguel Mosquera Paans, que ostenta outros galardóns internacionais, ven de ser nomeado finalista do Premio Internacional de Ensaio Proxecto de Lei do Escritor do Perú, obra que a proposta da Asociación de Escritores e Artistas do Orbe considerarase á hora do desenvolvemento do citado proxecto lexislativo.
Arquivo da categoría: Premios e concursos (outros)
Convocado o I Certame dos Prémios Bóia de Vídeo-Poesia
“1.- Vídeo-Poema inédito que não exceda de 4 minutos e nos seguintes formatos:
– MPG4
– AVI
– WINDOWS-MEDIA
2.- Tema livre.
3.- Idioma: qualquer idioma para o Vídeo-Poema, sendo entregue o poema original e a sua tradução a qualquer das escolhas (normativas) ortográficas do Galego.
4.- Assinar o Poema con PSEUDÓNIMO e enviar uma resenha com o nome próprio, lugar de residência e correio eletrônico ou telefone de contacto.
5.- Praço de envio até o 31 de Dezembro do 2013. O correio eletrônico para o envio certamepremiosboiavideo.poesia@gmail.com.
6.- As pessoas participantes CEDEM os DIREITOS de uso, exposição e difusão do trabalho à organização do CERTAME até o dia seguinte da GALA-FINAL dos PRÉMIOS BÓIA DE VIDEO-POESIA.
7.- Os autores e autoras tanto dos poemas como dos vídeos aceitam as BASES deste CERTAME.”
Vídeo poema de Iolanda Gomis entre os 12 seleccionados na Mostra Londrix 2013 Vídeo-Poema
Filha das acácias, de Iolanda Gomis, é un novo vídeo poema galego seleccionado na Mostra Londrix 2013 Vídeo-Poema na cidade de Londrina, no Paraná, Brasil.
Un Vídeo poema que desexa ser un canto á comunicación entre Galiza e Brasil como espazos próximos na lingua e na cultura. Un canto á comunicación entre pobos desde unha perspectiva inmersa na identidade galega voltada para a súa universalización.
O grupo que creou o vídeo poema conta con participantes de Brasil e Arxentina.
Esta é a ligazón para entrar na votación. Para votar desde a Galiza é necesario marcar a opción Não sou brasileiro.
Unha web conmemora os 25 anos do premio de novela García Barros
Desde
Fervenzas Literarias:
“Co gallo do XXV aniversario do Premio de Novela Manuel García Barros presentouse a web deste premio, desenvolvida polo concello da Estrada co apoio da Secretaría Xeral de Política Lingüística. Este portal repasa a historia do premio ao longo dos 25 anos mediante unha escolma dos títulos gañadores e unha descrición dos seus autores e, ademais, recolle a vida e a obra de García Barros, entre outros puntos. (…)
A presentación da web do premio García Barros complementarase -neste ano no cal celebra as súas vodas de prata- con outras actividades. Deste xeito, no mes de outubro terá lugar un evento conmemorativo no que se reunirán os gañadores das 25 edicións do premio, así como representantes das distintas editoriais que publicaron as novelas vencedoras.
Contra finais de ano celebrarase o tradicional evento de entrega do premio á escritora Anxos Sumai, gañadora desta vixésimo quinta edición, coa novela A lúa da colleita, que será publicada por Galaxia.”
A Mesa pola Normalización Lingüística leva o premio Ramón Piñeiro Facer País
Desde
Cultura Galega:
“O XII Premio Ramón Piñeiro Facer País, que outorga unha quincena de asociacións culturais das comarcas de Sarria, Láncara e o Corgo, foi para A Mesa pola Normalización Lingüística. O responsables da Asociación Cultural Val de Láncara, que coordina o galardón, facían público o fallo o pasado venres no Consello da Cultura Galega, logo de que representantes de todos os colectivos seleccionasen o gañador entre propostas abertas a toda a sociedade. A entrega do galardón, aínda sen data fechada, celebrarase a finais do mes de outubro.”
Gres, Vila de Cruces: Xosé Neira Vilas, Arraiano Maior 2013, o 7 de setembro
PROGRAMA
– 11:00 h. Lectura do Manifesto Arraiano.
– 11:30 h. Visita á Fundación Xosé Neira Vilas.
– 12:15 h. Lectura de poemas e textos de Xosé Neira Vilas e música.
– 13:00 h. Nomeamento de Xosé Neira Vilas como Arraiano Maior de 2013, coa entrega do diploma, da pucha e da aguillada por Xesús Alonso Montero, Arraiano Maior de 2012. Intervencións do Arraiano Maior de 2012 e 2013.
– 14:00 h. Xantar Arraiano en Casa Lodeiro, a de Rafael (22 euros).
A Asociación Cultural, Ecoloxista e de Desenvolvemento Rural Arraianos nomea Arraiano Maior de 2013 a Xosé Neira Vilas.
Na última asemblea de Arraianos, celebrada en Celanova o pasado día 16 de agosto, acordouse por unanimidade distinguir co recoñecemento de Arraiano Maior de 2013 a Xosé Neira Vilas (Gres, Vila de Cruces, 1928) pola súa traxectoria vital e literaria. A obra e a vida deste autor, que estivo emigrado na Arxentina e Cuba, transita entre a Galicia interior e a exterior, entre o mundo rural e o urbano, entre o pasado e o futuro dunha Galicia real e soñada, por iso entendemos que é merecedor desta distinción, que recoñece a obra literaria e o compromiso intelectual deste autor.
O acto de nomeamento do Arraiano Maior deste ano vai ser en Gres (Vila de Cruces), no salón de actos Fundación Xosé Neira Vilas, o sábado, 7 de setembro de 2013, ás 11 da mañá. O feito de facerse o acto de recoñecemento neste lugar responde a unha vontade de destacar o valor do rural e de trascender as fronteiras políticas, administrativas, físicas e mesmo mentais, nun espazo que é lindeiro entre concellos, cuncas fluviais e provincias.
Ao remate do acto, no que vai estar presente o Arraiano Maior de 2012, Xesús Alonso Montero, quen vai facer entrega da aguillada arraiana a Xosé Neira Vilas, haberá un xantar popular no restaurante Casa Lodeiro, a de Rafael, onde imos degustar un menú típico da zona. Aínda que o acto vai ser público e a asistencia é libre, para anotarse no xantar popular haberá que porse en contacto cos membros do colectivo a través do correo electrónico xesusdiaz@gmail.com ou no teléfono 657425080, antes do martes, 3 de setembro de 2013.
Con este acto en Gres, no que colaboran a Fundación Xosé Neira Vilas e o concello de Vila de Cruces, o colectivo Arraianos continúa coa entrega das distincións anuais de Arraiano Maior, que comezaron no ano 2009, con Xosé Luís Méndez Ferrín, e continuaron cos nomeamentos do Padre Antonio Lourenço Fontes (2010), Bento da Cruz (2011), Xesús Alonso Montero (2012) e agora, con Xosé Neira Vilas (2013).
Xosé Neira Vilas recibe o Alecrín de Ouro en Cataluña
Desde
Cultura Galega:
“A Federación de Entidades Galegas en Cataluña entregou o martes 13 de agosto o seu premio Alecrín de Ouro a Xosé Neira Vilas. O escritor e activista cultural recibirá o galardón durante un acto que se celebrará no Courel, e antes do cal se inaugurará unha biblioteca. En paralelo, a Sociedade Galega Sementeira, de Basilea, Suíza, acordou nomealo socio de honra.”
A Editorial Galaxia, premio Fernández Latorre 2013
Desde
Galaxia:
““O Padroado da Fundación Santiago Rey Fernández-Latorre, constituido en xurado para fallar o LV Premio Fernández Latorre, instituido en memoria do fundador de La Voz de Galicia, acordou conceder por unanimidade o Premio Fernández Latorre na súa edición do 2013, dotado con 10.000 euros, á Editorial Galaxia”, di literalmente a acta da concesión.
“O Xurado valorou especialmente a contribución da editorial á recuperación e fomento da lingua e a cultura galegas e o seu compromiso inquebrantable co patrimonio cultural de Galicia, que se ten concretado na publicación dos autores máis destacados da comunidade ata formar un catálogo vivo de máis de mil títulos”.
Asemade, o texto salienta “o papel dinamizador de Galaxia na vida cultural galega e a posta en marcha de proxectos tan ambiciosos e fundamentais como a Fundación Penzol e a revista Grial“.
O anuncio do galardón faise público todos os anos o 25 de xullo, Día de Galicia, e entrégase o derradeiro trimestre do ano. Nese mesmo numero de La Voz de Galicia inclúese unha ampla crónica da historia da editorial, unha entrevista co presidente de Editorial Galaxia, Benxamín Casal, e un artigo do noso director xeral, Víctor F. Freixanes.”
O premio Álvaro Cunqueiro pasará a ser bienal
Desde La Voz de Galicia, por Camilo Franco:
“Os premios escénicos que ata agora convocaba anualmente a Axencia Galega das Industrias Culturais pasarán a organizarse cada dous anos, de xeito que as próximas edicións do Álvaro Cunqueiro, do Manuel María e mais do Barriga Verde se realizarán a finais deste ano para que sexan resoltas durante o 2014.
Segundo a Agadic, a convocatoria bienal destes premios é o xeito de mantelos en época de restricións. Para a axencia, coa convocatoria para o vindeiro ano 2014, o premio Álvaro Cunqueiro quedará sincronizado co Rafael Dieste que acaba de fallar a Deputación da Coruña e que tamén se celebra de xeito bienal. Segundo a Agadic, o Cunqueiro e o Dieste alternaranse ano con ano, de xeito que todos os anos haberá en Galicia un premio importante para textos teatrais convocado institucionalmente.
No caso dos outros dous galardóns convocados pola Agadic, o Manuel María de teatro infantil e o Barriga Verde de textos para monicreques, a axencia tivo en conta que nos últimos anos os xurados deixaran desertas algunha das edicións e que o ritmo bienal pode ser axeitado para ambos os dous xéneros.
Ademais da redución orzamentaria, a Agadic ten previsto utilizar os anos en que non se organice o premio para editar os textos dos gañadores. Neste sentido, a Agadic pretende aproveitar este 2013 para publicar os textos distinguidos nos seus premios desde o 2011 para acá e que aínda non foron editados, entre eles A cegueira, de Marcos Abalde; O refugallo, de Paula Carballeira; Isóbaras, de Gustavo Pernas; e Un mosquito de nome Henri, de Raúl Dans. (…)”
Salvador García-Bodaño, premio Voz da liberdade do PEN Clube Galicia
Desde
Sermos Galiza:
“Un xurado composto por Marilar Aleixandre, Miro Villar, Bieito Iglesias, Manuel Guede e Inma López Silva actuando como presidente Luís G. Tosar -presidente do PEN de Galiza– e Xabier Castro como secretario decidiu outorgarlle o premio Voz da Liberdade ao poeta Salvador García-Bodaño, en recoñecemento da súa dilatada traxectoria de autor de artigos xornalísticos en defensa da liberdade.
García-Bodaño é o sexto escritor galardoado co premio que o Centro Pen de Galicia convoca cada dous anos, despois de iniciarse no 2003 con Bernardino Graña e seguir con Úrsula Heinze, Francisco Fernández del Riego e Isaac Díaz Pardo, Marcos Valcárcel e María Xosé Queizán. O xurado destacou o “compromiso do autor e a firme loita pola democracia e polos dereitos políticos, sociais e culturais do noso país».
Natural de Vigo, Salvador García-Bodaño comezou a súa actividade cultural en Compostela cidade na que creou boa parte da súa obra literaria e na que desenvolveu un importante papel de dinamizador cultura, sendo, entre outras cousas, cofundador de O Galo e membro do Consello da Mocidade. Foi tamén patrón-fundador do Museo do Pobo Galego, cofundador e membro da actual Asociación de Escritoras e Escritores en Lingua Galega (AELG), cofundador do PEN Clube de Galicia, da Asociación de Tradutores en Lingua Galega (ATLG), do Museo de Arte Contemporánea Carlos Maside, do Instituto Galego da Información, da Fundación Castelao, da Asociación Galega do Libro Infantil e Xuvenil (IGI), e membro da Fundación Patronato do Pedrón de Ouro. (…)”.
