Tito Pérez Pérez | ::Axenda cultural AELG::

Entrevista de Ubaldo Cerqueiro a Tito Pérez en Xornal da Coruña:
“(…) – Xornal da Coruña (XC): Dende cando escrebes?
– Tito Pérez (TP): De pequeno, con 14 anos, cos trobadores Martín Codax, comecei a escribir poemas de amor á típica rapaza que pasaba de ti… Despois xa na carreira empecei a escribir relatos, xa nalgún dos primeiros gañei un premio, e a partir de aí funme animando, a escribir, presentarme…
Eu escribía sobre todo relatos, e algo de poesía. Publiquei o primeiro libro de relatos, despois o segundo, e agora a miña primeira novela.
Por agora, publicando gaño poucos cartos, pero cos premios algo se fai.
– XC: Como nace Latexar de barrio. Vivencias e conflitos na sociedade real dun barrio? Levaba tempo fraguándose na túa cabeza?
– TP: Escribino a raíz dos primeiros 20 relatos realistas. Todo están ambientados na nosa sociedade. Non é que sexan nas rúas de Coruña. Hai algún por exemplo, que se dan nunha casa, con problemáticas de aquí.
O caso é que un dos 20 relatos do primeiro libro chámase “Latexar de Barrio”, e é un percorrido dende a praza de España ata casa dos meus pais. O protagonista chámase Curros (sabes que Curros está enterrado no cemiterio) e va contando o que ve.
Intento describir a sociedade galega e os seus conflitos, no caso de ser lido, que a sociedade reflexione para mellorarse. Intento non caer no panfleto, pero ten unha intención clara. Eu non xulgo, describo -o que fan, e que cada un saque as súas conclusións.
A novela O grupo vai sobre o bulling, por exemplo, cunha intención clarísima, das cousas reais e frecuentes. (…)”

Desde Xornal da Mariña:
“O XI premio de poesía Manuel Leiras Pulpeiro recaeu este ano en Xurxo Alonso García, residente en Vilagarcía de Arousa. O premio está convocado polo Concello de Mondoñedo. Unha edición marcada polo gran número de participación de obras, preto de 100 orixinais recibidos. O traballo presentado pola gañador, que obterá un premio de 1500 €, placa e diploma, ten como lema O Outro Lado.
O segundo premio, dotado con 600 €, placa e diploma, recaeu na obra titulada Na ferradura interna do lóstrego, da que é autor Tito Pérez Pérez.
María Soledad García Riveiro acadou o 3º premio, dotado con 300 €, placa e diploma, coa obra presentada baixo o rótulo Aposiopese.
A entrega do premio terá lugar o xoves, 8 de decembro segundo o seguinte programa:
12.30 horas; Recepción oficial no Cemiterio Vello e Ofrenda Floral ante a tumba do poeta.
13.00 horas; Entrega de Premios no Salón de Plenos do Concello.

Alba Doval Rodríguez foi a gañadora do XXIII Premio de Poesía Díaz Jácome para novos creadores, convocado polo Concello de Mondoñedo. O traballo presentado pola gañadora, que obterá un premio de 1500 €, placa e diploma, ten por título A herba que crece sobre nós.
O segundo premio, dotado con 600 €, placa e diploma, recaeu na obra Cando brotan no campo rebelións, da que é autor Ciro Fernández Briones (A Pobra do Caramiñal, 1996).
Clara Vidal López acadou o 3º premio, dotado con 300 €, placa e diploma, coa obra Os Caracois Alpinistas.

A entrega do Premio terá lugar o sábado, día 10 de decembro segundo o seguinte programa:
Ás 12.15 horas; Recepción oficial na Casa do Concello.
Ás 12.30 horas; Entrega de Premios do XXIII Certame de Poesía Díaz Jácome no Salón de Plenos do Concello.”