Desde Nós Diario:
“O Veliano de Honra é un galardón que cada ano outorga a Fundación Carlos Velo para recoñecer a aquelas persoas que partillan admiración e respecto, polo cineasta que dá nome a entidade que concede o premio.
A persoa recoñecida este ano partillou amizade e militancia política con Carlos Velo desde os primeiros 60. Neste sentido, Xosé Luís Méndez Ferrín e o cineasta de Cartelle fixeron parte nesa década e na seguinte da Unión do Povo Galego (UPG), participando da loita nacionalista e contra a ditadura franquista.
O acto desenvolvido na maña do sábado 25 de outubro en Cartelle serviu para lembrar esa relación. No mesmo, interviñeron o alcalde da localidade, Jaime Sousa, a presidenta da Fundación Carlos Velo, Carmen Leyte e o historiador Antonio Piñeiro.
Piñeiro, encargado da laudatio a Méndez Ferrín, destacou que “hoxe se volven encontrar Ferrín e Velo, grazas ao enlace que daquela exerceu sobre ambos o inefábel activista vilanovés Luís Soto e que hoxe protagoniza a Fundación Carlos Velo xunto co pobo de Cartelle e o resto da Galiza neste acto tan simbólico e pertinente”.
O historiador percorreu a amizade entre Carlos Velo e Méndez Ferrín mediante a lectura de diversos textos que dan conta da mesma. Un deles foi un artigo publicado polo cineasta en 1962 desde o seu exilio mexicano na revista Vieiros baixo o título de Carta ao fato Brais Pinto, grupo cultural de mozos galegos en Madrid.
A presidenta da Fundación Carlos Velo, Carmen Leyte, explicou a actividade da entidade, que ten como obxectivos garantir a memoria, legado e máis do espírito de Velo, un dos grandes pioneiros do cinema galego e creador dunha importante e premiada obra cinematográfica.
Leyte fixou entre os obxectivos da Fundación “estabelecer relacións de cooperación con institucións e colectivos dentro e fóra da Galiza, e sobre todo con México, promover un fondo filmográfico e bibliográfico vinculado á figura de Carlos Velo e promover o fomento do audiovisual galego en correspondencia ao desexo do propio Velo”.
Carlos Velo (Cartelle,1909 – Cidade México, 1988), militante nacionalista no período republicano veuse obrigado a exiliarse en 1939, desenvolvendo unha intensa actividade política e cultural en México, onde actuou como delegado do Consello da Galiza.”
Arquivo da categoría: Premios e concursos (outros)
Ledicia Costas gaña o Premio San Clemente por ‘Pel de cordeiro’
Desde Cultura Galega:
“O XXIX Premio Arcebispo Juan de San Clemente, organizado polo IES Plurilingüe Rosalía de Castro de Santiago de Compostela co apoio da Consellería de Educación, Ciencia, Universidades e FP e mais da Consellería de Cultura, Lingua e Xuventude, xa teñen novelas gañadoras nas súas tres categorías: Misericordia, da portuguesa Lídia Jorge, editado por La Umbra y la Solana na súa edición en castelán, fíxose co galardón no apartado de novela en lingua estranxeira; Pel de cordeiro (Edicións Xerais), de Ledicia Costas, acadou o galardón no apartado de lingua galega, e La península de las casas vacías (Ediciones Siruela), de Davíd Uclés, foi recoñecido co premio en lingua castelá.
O fallo do xurado, conformado polo alumnado de bacharelato de seis institutos galegos, un madrileño e tres europeos, deuse a coñecer esta mañá no salón de claustros do IES Rosalía de Castro. Os centros participantes desta edición foron: IES Antón Losada Diéguez (A Estrada, Pontevedra), IES 12 de Outubro (Ourense), IES Isaac Díaz Pardo (Sada, A Coruña), IES Sanxillao (Lugo), IES Antonio Fraguas (Santiago de Compostela), o IES Ramiro de Maetzu (Madrid), o Lycée Saint François Xavier de Vannes (Francia), o Grimmelshausen Gymnasium de Gelnhausen (Alemaña), o Hockerill Anglo European College (Reino Unido) e o propio IES Rosalía de Santiago.
Segundo o xurado, os motivos que levaron a premiar a obra Misericordia, de Lídia Jorge, foron “o lirismo que atravesa o texto”, o “retrato da beleza do cotiá que ofrece” e pola “visión renovada sobre os nosos maiores”. No relativo da novela en lingua castelá para La península de las casas vacías, de David Uclés, o xurado gabou “a ambición de novela total” que presenta este libro, así como a súa orixinalidade ao empregar “o realismo máxico” e o “multiperspectivismo” para “abordar a memoria histórica”. Finalmente o xurado en lingua galega, recoñeceu a obra Pel de Cordeiro, de Ledicia Costas, destacando a súa “singular estrutura e a súa prosa áxil” que permite “facer de todo o fantástico verosímil”. O xurado concluíu que era unha “obra completa” que brindaba un retrato orixinal e necesario dos vínculos entre mulleres. “
Compostela: acto de entrega da I Edición do Premio Trevo 2025
Carlos Paulo Martínez Pereiro, designado membro do xurado do prestixioso ‘Prêmio de Romance Machado de Assis 2025’, no Brasil
Carlos Paulo Martínez Pereiro, Profesor Emérito da UDC e integrante do Grupo de Investigación ILLA e da AELG, foi designado membro da ‘Comissão Julgadora’ do ‘Prêmio Machado de Assis de Romance 2025’ polo Presidente da ‘Fundação Biblioteca Nacional’ do Governo Brasileiro (Diário Oficial da União: https://shre.ink/CJPMdARomance2025).
As profesoras Márcia Fusaro e Márcia Moreira Pereira integran tamén a referida comisión xulgadora do prestixioso galardón, un dos máis importantes premios literarios brasileiros, a que concorreron 359 romances.
Para laurear o mellor romance brasileiro publicado en portugués no Brasil entre o 01/05/2024 e o 30/04/2025, son avaliadas a técnica narrativa, a orixinalidade temática e lingüística, así como é ponderada a contribución á cultura nacional. Os tres romances finalistas e o gañador serán divulgados até o 03/11/2025 e publicados no DOU até o 27/11/2025. O edital do premio e todas as informacións sobre o mesmo son accesíbeis no sitio electrónico da Fundação da Biblioteca Nacional (https://shre.ink/GovBrEditalPMdeARomance2025).
Ao longo dos anos, foron premiados romances de autoras e autores tan relevantes como Alberto Mussa, Ana Maria Machado, Bernardo Carvalho, Cristovão Tezza Daniel Galera, Evandro Affonso Ferreira, Flávio Moreira da Costa, Idalina Azevedo da Silva, Luciana Hidalgo, Luiz Ruffato, Marcelino Freire, Rubem Fonseca, Sheyla Smanioto ou Verónica Stigger.
[Edificio e logo da Biblioteca Nacional de Rio de Janeiro / Caricatura de Machado de Assis]
Irimia (Meira): XIV Festa de Afirmación e Dignidade 2025, o 21 de setembro
Os Verxeis (Teo): entrega do Caxato de Avelino a Pilar García Negro, o 20 de agosto
A MIT de Ribadavia outorga o premio de honra a Roberto Pascual
Desde a Mostra Internacional de Teatro de Ribadavia:
“A 41ª edición da MIT, organizada polo Concello de Ribadavia, e baixo a nova dirección formada por Sabela Mendoza e Gena Baamonde, anuncia o outorgamento do Premio de Honra 2025 ao que fora o director da Mostra ata o ano pasado, Roberto Pascual.
Roberto Pascual foi director da MIT de Ribadavia dende 2009 ao 2024, unha importante etapa na que soubo facer da Mostra un evento de referencia tanto para a profesión e a cultura galega como para a escena internacional. Nestes anos a MIT avanzou e situouse entre os máis prestixiosos festivais de teatro, en diálogo con compañías, redes e circuitos escénicos de primeiro nivel. Á vez que mantivo o carácter comunitario, identitario e arraigado no espírito transformador e renovador dos seus inicios históricos, alimentando o valor da cultura como pilar esencial para a cidadanía.
Este galardón instaurouse no ano 2000 co obxectivo de recoñecer publicamente a colectivos ou persoas notoriamente responsables do progreso e do bo labor nas artes escénicas galegas, contribuíndo á modernización e democratización social e cultural. Despois de 16 anos á fronte da Mostra, Pascual deixa unha fonda pegada tanto no festival e o sector teatral como na veciñanza de Ribadavia. Con este galardón, a nova dirección da Mostra quere recoñecer o seu compromiso coas artes escénicas e coa cultura galegas. (…)”
Coñécense os Premios Insua dos Poetas 2025
Medallas Castelao: Luar na Lubre, Víctor Freixanes, Emilio Pérez, Rosa Rodríguez e a asociación de afectadas pola Esclerose Lateral Amiotrófica
Desde Nós Diario:
“A Xunta da Galiza acordou conceder as Medallas Castelao 2025 a Luar na Lubre, que este ano conmemora o seu 40 anoversario; Víctor Freixanes, ex presidente da Real Academia Galego; Emilio Pérez, presidente do grupo Pérez Rumbao; Rosa Rodríguez, médica xubilada de Atencion Primaria e a Asociación Galega de Afectados pola Esclerose Lateral Amiotrófica.
A Medalla Castelao é unha condecoración de carácter civil que concede a Xunta da Galiza e que “recoñece a achega profesional e persoal de personalidades ou institucións polo seu traballo no ámbito artístico, literario, intelectual ou en calquera campo significativo para a Galiza”.
Este galardón entrégase cada ano o 28 de xuño, para conmemorar a chegada á Galiza dos restos de Daniel Rodríguez Castelao. (…)”
