A editorial Galaxia publicou hoxe no seu blog un resumo das cifras de edición e ventas en 2008. Ao longo do ano Galaxia presentou 95 novidades que se incorporan a un catálogo comercial que sobrepasa xa os mil títulos. A tiraxe media actual está perto dos 1800 exemplares, con mínimos de 800 e máximas de 8000. 211.890 foron os exemplares publicados e comercializados pola editorial en 2008. Entre 2000 e 2007 Galaxia lanzou ademais 145 traducións, case un terzo delas procedentes do inglés. Máis información, no blog da editorial.
Arquivos da etiqueta: Editorial Galaxia
Reedición de “long-sellers” da literatura galega
Nas últimas semanas foron anunciadas as reedicións dalgúns grandes éxitos da literatura galega, obras que seguen a gozar do fervor dos lectores moitos anos despois da súa saída ao mercado. É o caso de Que me queres, amor? de Manuel Rivas, da que Galaxia vén de sacar a edición número quince e que acumula 65 mil exemplares vendidos. Quince son tamén as edicións de Crime en Compostela de Carlos Reigosa, en Xerais, que tamén puxo nas librarías a vixésimo terceira edición das Cartas de inverno de Agustín Fernández Paz, un dos fitos do sistema editorial galego con perto de setenta mil exemplares vendidos.
Bonchul, conto de Xavier Alcalá
A Editorial Galaxia publicou no seu blog un relato de Xavier Alcalá, Bonchul, que aparecera en 1997 no Boletín Galego de Literatura editado pola Universidade de Santiago. O conto pode descargarse premendo nesta ligazón.
A Coruña: presentación da novela Memoria de cidades sen luz, de Inma López Silva
O xoves 4 de decembro, ás 20:00 no Palexco, no marco do Culturgal, terá lugar a presentación na Coruña da novela Memoria de cidades sen luz, de Inma López Silva.
A Editorial Galaxia na Feira do libro da Coruña
A Editorial Galaxia comprácese en convidar aos seguintes actos que terán lugar na Feira do Libro da Coruña 2008, do 1 ao 10 de agosto, nos Xardíns de Méndez Núñez:
– Venres 1 de agosto, ás 19.00 h. Presentación de Toponimia de Galicia, de Fernando Cabeza Quiles. Participan xunto co autor Carlos Lema e Xesús Fraga.
– Venres 1 de agosto, ás 19.00 h. Inma López Silva asinará exemplares do seu libro New York, New York.
– Luns 4 de agosto, ás 21.00 h. Presentación do poemario Estúrdiga materia, de Luís González Tosar. Víctor F. Freixanes, Miguel Anxo Fernán-Vello e Luciano Rodríguez acompañarán o autor.
– Xoves 7 de agosto, ás 20.00 h. Presentación da triloxía Evanxélica memoria, de Xavier Alcalá. Participan xunto co autor Víctor F. Freixanes e Alfredo Ferreiro.
– Venres 8 de agosto, ás 20.00 h. Recital literario-musical de A vida nova de Madame Bovary, de Xosé Carlos Caneiro, acompañado por Xosé Manuel Salgado á guitarra.
– Sábado 9 de agosto, ás 19.00 h. Antón Riveiro Coello asinará exemplares da súa novela Os ollos de K.
– Sábado 9 de agosto, ás 20.30 h. A escritora Fina Casalderrey asinará exemplares dos seus libros Ola, estúpido monstro peludo! e Apertas de vainilla.
Vigo: preséntase Estúrdiga materia, de Luis González Tosar
O mércores 16 de xullo, ás 20:00, terá lugar no Centro Social Caixanova de Vigo (R/ Policarpo Sanz, 24-26) a presentación do libro Estúrdiga materia, de Luis González Tosar. Participarán no acto Guillermo Brea (director da Obra Social), Víctor F. Freixanes (editor) Xosé Luis Méndez Ferrín (escritor e autor do limiar), Manuel Quintana Martelo (pintor e autor das ilustracións), así como o autor do poemario.
Preséntase en Boiro a novela de Xosé Carlos Caneiro A vida nova de Madame Bovary
A editorial Galaxia, a Asociación Cultural Barbantia, La Voz de Galicia e o Proxecto Leñaverde, convídano/a á presentación da novela de Xosé Carlos Caneiro A vida nova de Madame Bovary, así como á saída do nº 35 do suplemento cultural “A voz de Barbantia”.
Acompañarán o autor do libro Xerardo Piñeiro (Concelleiro de Cultura), Carlos Lema (editor de Galaxia) e Antón Riveiro Coello, presidente de
Barbantia, que manterán unha conversa co escritor verinense. O acto terá lugar o vindeiro venres 30 de maio, na Estación Leñaverde (Centro Social) de Boiro, ás 20:30.
Presentación en Ferrol do libro de Ceferino Díaz A esforzada conquista da autonomía. 1979-1981
O xoves 22 ás 20:00 a Galería Sargadelos Ferrol e a A. C. Fuco Buxán organizan a presentación do libro de Ceferino Díaz A esforzada conquista da autonomía. 1979-1981 (Galaxia). No acto intervirán o autor do libro, Ceferino Díaz, e Manuel Cendán. (Galería Sargadelos de Ferrol)
Presentación en Marín da novela Unha falsa luz, de Xavier Alcalá
O venres 18 ás 20:00 no Museo Manuel Torres de Marín terá lugar a presentación da novela Unha falsa luz, de Xavier Alcalá, terceira parte da triloxía “Evanxélica memoria”. No acto acompañarán ao autor Esther Crespo Iglesias (Concelleira de Cultura de Marín), Xulio Torres (pastor evanxélico) e Marta Piñeiro (colaboradora do programa “Nacer de novo” da TVG).
Cea “García Barros”
«Con posterioridade á entrega do Premio García Barros a Francisco Castro, o Concello da Estrada e Editorial Galaxia organizaron este ano, por primeira vez, unha Cea Literaria na que escritores, críticos e editores reflexionaron ao redor dun tema central relacionado coa obra premiada.
Os novelistas Xerardo AgraFoxo, Alfonso Álvarez Cáccamo, Francisco Castro, Manuel Darriba, Jaureguizar, Xosé Monteagudo, Antón Riveiro Coello, Séchu Sende e Anxos Sumai, na compaña do crítico literario Xosé Manuel Eyré e mais dos editores Víctor F. Freixanes e Carlos Lema, que se encargou de conducir o debate, mantiveron un coloquio sobre “Ficción e verosemellanza: da imitación da realidade á novela histórica”. […]» (Editorial Galaxia)
