Arquivo da categoría: Institucións

Proposta da Asociación de Escritoras e Escritores en Lingua Galega sobre o Día das Letras dedicado a Ricardo Carvalho Calero

Publicado o por

A Asociación de Escritoras e Escritores en Lingua Galega fai pública a carta que dirixiu ao presidente da Real Academia Galega, coa seguinte proposta sobre o Día das Letras dedicado a Ricardo Carvalho Calero.

“Sr. Presidente da Real Academia Galega,
Prezado Sr. D. Víctor Freixanes,

A situación de excepcionalidade sanitaria, social e cultural que está a vivir a Galiza, levou a anular toda posibilidade de normal celebración das actividades de divulgación da figura do narrador, poeta, ensaísta, lingüista, profesor e pensador don Ricardo Carvalho Calero, no ensino e nas diversas actividades de concellos e outros colectivos culturais.
Despois de se reunir o Consello Directivo da Asociación de Escritoras e Escritores en Lingua Galega, acordou trasladarlle á Real Academia Galega, institución que vostede tan dignamente preside, que avalíe a necesidade dunha prórroga/alongamento do Día das Letras 2020 ao ano 2021, no pleno da RAG para tal fin, e, en consecuencia, a non elección dunha nova figura para ser celebrada en 2021.
A RAG, como consecuencia desta grave situación, decidiu adiar ao 31 de outubro -data próxima ao aniversario do nacemento no noso escritor- os actos de celebración das Letras Galegas deste ano 2020. A celebración do seu nacemento xustificaría de por si tan importante acto a celebrar pola RAG e toda a cidadanía na súa cidade natal.
Sendo conscientes do esforzo que a RAG fai anualmente para a divulgación do autor ou autora elixido, e as medidas que este ano serán feitas para substituír a celebración dos actos presenciais que normalmente veñen acompañados da implicación de todas as institucións e administracións, así como nos precitados ámbitos: editorial, educativo e de diversos colectivos sociais da cultura e outros, pensamos que sería unha inxustiza histórica que o autor homenaxeado non poida ser achegado á sociedade e aos seus escolares como todo autor e autora mereceron no pasado, dentro dunha maior normalidade social e cultural.
Ao tempo, a que será nova autora do ano 2022, que agardamos sexa unha muller, podería dispor tamén dunha outra normalidade social e cultural. Como ben sabe, a nosa Asociación apoiou e seguirá a apoiar sempre as actividades da RAG que vostede preside, mesmo nunhas circunstancias tan adversas como as actuais, e nas actividades futuras das escritoras e escritores elixidos.
Por todo o antes exposto, agradeceríamos tomase en consideración a nosa proposta, arriba desenvolvida, para que sexa posta en valor a figura de D. Ricardo Carvalho Calero e a súa tan importante obra para a nosa literatura e a nosa cultura.

Reciba os cumprimentos do Consello Directivo da AELG e, no seu nome, o afectuoso saúdo de Cesáreo Sánchez Iglesias, Presidente da Asociación de Escritoras e Escritores en Lingua Galega”

A Real Academia Galega traslada o pleno do Día das Letras Galegas ao 31 de outubro

Publicado o por

Desde a Real Academia Galega:
“A Real Academia Galega acordou pospoñer o pleno extraordinario e público do Día das Letras Galegas dedicado a Ricardo Carvalho Calero (Ferrol, 1910 – Santiago de Compostela, 1990) ante a situación provocada pola pandemia da COVID-19. A sesión mantense no lugar previsto, o teatro Jofre de Ferrol, pero trasladarase do domingo 17 de maio ao sábado 31 de outubro, xusto un día despois do 110 aniversario do nacemento do homenaxeado. De igual xeito, os demais actos presenciais que a institución tiña previsto celebrar nas vésperas e nas datas posteriores ao Día das Letras Galegas terán lugar á volta do verán.
A Real Academia Galega tomou esta decisión ante a evidencia crecente de que a mediados do mes de maio non será recomendable, nin quizais aínda posible, celebrar actos públicos concorridos. A medida, inédita nos cincuenta e sete anos de historia do Día das Letras Galegas, adóptase dende a responsabilidade ineludible, que esixe priorizar a seguridade do público asistente e de todas as persoas implicadas na organización dun acto destas características. O cambio de data desta e doutras iniciativas pretende tamén prolongar a celebración do Ano Carvalho Calero ao longo do último cuadrimestre deste 2020, procurando minimizar o impacto desta situación de emerxencia na celebración da gran festa da cultura galega.
Malia os cambios no calendario de actividades presenciais arredor do Día das Letras Galegas, a RAG quere que o 17 de maio sexa igualmente unha gran celebración colectiva, e fai un chamamento a toda a cidadanía galega para que sexa así valéndose das posibilidades do mundo dixital que tanto se están a aproveitar nestes tempos de obrigado afastamento social. Nesta liña, a institución reforzará nas vindeiras semanas na Rede as iniciativas de divulgación da figura e da obra do filólogo, escritor e profesor Carballo Calero, tanto a través desta páxina e do proxecto para o público infantil Primavera das Letras como do Portal das Palabras.
A entrada en vigor do estado de alarma o pasado 15 de marzo xa obrigara a Real Academia Galega a adiar o acto centrado no labor como dramaturgo de Ricardo Carvalho Calero que estaba a organizar da man de Santiago Fernández, que xunto con Manuel Lourenzo dirixe o estudio teatral Casa Hamlet. O programa ía desenvolverse na sede da institución, na rúa Tabernas da Coruña, o pasado 25 de marzo, cadrando co trixésimo cabodano do autor e nas vésperas do Día Mundial do Teatro.
Outro acto que terá que ser reprogramado á volta do verán é a homenaxe ao labor de Ricardo Carvalho Calero como docente, e como parte da resistencia galeguista na posguerra, que a RAG ía celebrar o 7 de maio en colaboración co Colexio Fingoi, o centro educativo lugués que o autor dirixiu dende 1950 ata o seu regreso en 1965 a Santiago de Compostela, onde se fixo cargo das primeiras aulas de galego na universidade. Tamén no outono, como vén sendo habitual, terá lugar o Simposio das Letras Galegas.
Tendo en conta o impacto que pode estar a ter a suspensión das clases presenciais no desenvolvemento de parte dos proxectos escolares dedicados a Ricardo Carvalho Calero, a RAG ampliará ata despois do outono o prazo de participación no concurso Contádenos o voso Día das Letras –convocado ao abeiro do proxecto Primavera das Letras– e anima o profesorado a que, alén de promover accións virtuais nas vésperas do propio 17 de maio, estenda as iniciativas arredor da figura e a obra do homenaxeado ao primeiro trimestre do curso próximo.”

Lavacolla xa é, oficialmente, Aeroporto Rosalía de Castro

Publicado o por

Desde Nós Diario:
“O Boletín Oficial do Estado (BOE) vén de facer público o novo nome oficial da terminal compostelá de Lavacolla: Aeroporto de Santiago-Rosalía de Castro.
O cambio foi impulsado con Compostela Aberta á fronte do Consistorio da capital galega, no anterior mandato local, e posteriormente obtivo o respaldo de todas as forzas políticas, como se evidenciou a través dunha iniciativa aprobada por unanimidade no Parlamento.
O acordo, que publica hoxe o BOE, certifica que o Concello de Santiago acordou solicitar ao Ministerio e a Aena o cambio de denominación para “poñer de manifesto a relevancia da escritora máis representativa da lingua galega, con motivo do 180 aniversario do seu nacemento”.
Coa denominación do aeroporto de Santiago co nome de Rosalía de Castro, reivindícase -engade o documento oficial- “a súa memoria, a súa contribución á literatura europea e a súa loita pola recuperación e forxa da identidade da Galiza”.
A orde, que subscribe o ministro de Transportes, José Luis Ábalos, conclúe que os gastos derivados do cambio de denominación proposto serán sufragados polo Consorcio de Santiago.”

A área de cultura do Concello de Lugo retomará a programación habitual unha vez remate o estado de alarma

Publicado o por

“A edil de Cultura, Turismo e Promoción da Lingua, Maite Ferreiro, anunciou que, para tentar reducir as consecuencias que a crise sanitaria do COVID19 producirá no sector cultural, “dende a área de Cultura estamos traballando para reprogramar o calendario de actividades culturais do 2020”.
Segundo indicou a edil de Cultura, “estamos buscando novas datas para desenvolver os espectáculos adiados, e garantimos as aportacións municipais comprometidas con todas aquelas actividades ás que non sexa posíbel atopar unha nova data”.
A área de Cultura manterá a colaboración e o apoio ao sector cultural e ao tecido asociativo da cidade. Segundo declarou Maite Ferreiro, “retomarase a actividade nas instalacións culturais dependentes desta área en canto sexa posíbel”. “Esta crise sanitaria é unha situación excepcional, e dende a área de Cultura debemos dar tamén unha resposta tamén excepcional”, afirmou Maite Ferreiro, que engadiu “para as estruturas profesionais da cultura galega estamos diante dun contexto de loita pola propia supervivencia, e dende as institucións temos o deber de colaborar con este sector”.
Segundo Maite Ferreiro, “unha vez remate o estado de alarma agardamos poder avanzar de cara a materializar dunha vez a cesión do novo auditorio”. Para a edil de Cultura, “as novas instalacións permitirannos manter a programación adiada e a continuar co calendario previsto para este ano”.

As asociacións profesionais da Cultura remítenlle as súas demandas á Xunta de Galicia

Publicado o por

Desde Erregueté:
“As Asociacións profesionais do sector cultural de Galicia veñen de facer público un documento remitido á Xunta de Galicia no que se expoñen as demandas dun sector que definen como “sector moi sensible ás crises económicas”. O documento subliña que “é o primeiro ao que renuncian as consumidoras en tempos de crise” e lembran que se recuperou “moi malamente da crise do 2008”.
Despois de lembrar que a cultura achega o 2% do PIB galego –que equivale a 1100 millóns de euros–, o documento explica que “as distintas federacións e asociacións están facendo estimacións das perdas” mais que “non son fáciles de calcular debido a que o impacto da crise sanitaria aparte do inmediato vai ser a corto e medio prazo”.
Algunhas das peticións que consideran urxentes os diferentes colectivos implicados son, entre outros: axilizar os pagamentos, revisar as bases das subvencións, manter as contratacións preferentemente aprazándoas, non rebaixar orzamentos en cultura, incentivar o consumo cultural baixando o IVE, ou establecer axudas directas ao sector para que poida facer fronte ás súas necesidades.
As dezasete asociacións que asinan o documento manifestan a súa solidariedade e fonda preocupación a todos os colectivos afectados por esta crise e a toda a cidadanía en xeral. Segundo lembran, “o dereito á cultura de todas as persoas está recollido no artigo 44 da Constitución española e os máis relevantes organismos internacionais documentan a importancia da cultura e a creatividade na sociedade, máis aínda nun tempo de conmoción emocional como o que se vai vivir unha vez que pasemos este primeiro momento de confinamento”.
“Pode parecer inoportuno estar reclamando medidas para o sector cultural nestas circunstancias nas que está morrendo tanta xente”, declaran os colectivos afectados, “pero o sector cultural é un sector moi precarizado, con moito autoemprego e pequenas empresas, que o están pasando realmente mal ao suspenderse toda a programación cultural e estar pechados os espazos de exhibición. Ademais da enorme incerteza sobre o que vai pasar no futuro. Moita xente vive das funcións, que neste momento están todos suspendidos e non se sabe cando se vai retomar a actividade cultural. O sector cultural é un sector solidario, proba disto é as actividades que se están facendo na rede, artistas que están facendo concertos, monólogos, obradoiros, etc para facer máis doada a situación de confinamento da sociedade. Outros países como Italia Francia ou Portugal xa aprobaron medidas específicas para o sector cultural”. Sinala Pilar Portela, presidenta da Asociación Galega de Profesionais da Xestión Cultura (AGPXC).
O documento remitíuselle á Xunta de Galicia para que o tome en consideración, na medida das súas competencias, así como para que llo faga chegar ao Goberno do Estado para que se coñezan as demandas do sector cultural galego que son de competencia estatal, á FEGAMP e as entidades locais galegas, así como aos grupos parlamentarios.”

A Deputación da Coruña diríxese ás asociacións profesionais da cultura para poñer en común medidas para a reactivación do sector

Publicado o por

Desde a Deputación da Coruña:
“A área de Cultura da Deputación da Coruña está a promover a modificación de liñas de traballo para adaptalas á situación actual e novas iniciativas encamiñadas a paliar os efectos negativos que o Covid19 vai ocasionar no mundo da cultura. Neste sentido, o deputado de Cultura, Xurxo Couto, púxose en contacto coas asociacións profesionais do sector para traballar man a man na recuperación despois de rematar o estado de alarma.
O deputado de Cultura, Xurxo Couto, dirixiuse ás asociacións profesionais do sector para transmitir a preocupación pola crise provocada polo Covid19 e ofrecer a colaboración da institución á hora de activar novas medidas que contribúan a paliar os efectos negativos que o confinamento, a crise económica e as medidas que limitan os actos públicos están a provocar nos distintos ámbitos da cultura.
Na carta, Xurxo Couto transmite a “vontade de, na medida do posíbel, axustar as nosas liñas de actuación á crise sanitaria e económica que estamos a vivir co fin de contribuír a paliar as graves consecuencias que está a producir nun sector que depende, en boa medida, da súa difusión en salas e espazos que tiveron que pechar pola pandemia”.
Anuncia tamén á representación dos distintos ámbitos da industria cultural que a Deputación da Coruña está a traballar “na creación de novas iniciativas e na modificación dalgúns programas existentes co fin de responder a unha situación que varía día a día e así continuaremos, co fin de flexibilizar a nosa acción de goberno para ser o máis eficaz e responder da maneira máis acaída ás necesidades e posibilidades dos distintos sectores”.
Entre as primeiras medidas que traslada ás distintas asociacións, destaca a flexibilización das bases da Rede Cultural coa ampliación do prazo de programación por parte dos concellos que se alongará até o primeiro trimestre do 2021 para así manter o orzamento e as actividades da edición anterior. A modificación sae publicada xa no BOP deste 31 de marzo.
Ademais, Xurxo Couto informa de que a área de Cultura da Deputación priorizará a realización dos pagamentos pendentes, garantirá as programacións propias con axustes á situación sanitaria no calendario previsto, e prorrogará o prazo para o desenvolvemento e xustificación das actividades subvencionadas. Campaña de apoio á cultura galega.
Finalmente, o deputado de Cultura ponse a disposición das asociacións para que acheguen propostas e indicacións para que “como sempre fixemos e agora de maneira máis intensa, traballar man a man coas entidades sectoriais para facer fronte a unha pandemia que ten efectos claros na cultura galega”.
Na súa carta, Xurxo Couto anuncia tamén que a Deputación desenvolverá no momento en que sexa máis indicado segundo a situación sanitaria e cando se poida volver á normalidade dos espectáculos ao vivo unha campaña de apoio á cultura galega.”

A RAG ofrece máis de 150 publicacións periódicas históricas en liña tras as últimas dixitalizacións

Publicado o por

Desde a Real Academia Galega:
“O 7 de febreiro de 1876 saía do prelo o parrafeo primeiro d’O Tío Marcos d’a Portela, a primeira cabeceira en galego que conseguiu certa permanencia no tempo, nun principio con difusión quincenal e logo semanal. O periódico posto en marcha por Valentín Lamas Carvajal, do que se chegaron a tirar 4.000 exemplares, pode consultarse en liña dende hai uns días grazas á última achega da Real Academia Galega a Galiciana – Biblioteca Dixital de Galicia, que inclúe un total de 75 publicacións periódicas históricas de fondo galego conservadas na hemeroteca da institución. Con estas incorporacións, son xa 122 as revistas e xornais editados entre o século XIX e a primeira metade do XX dispoñibles nestes espazo na Rede grazas ao labor de dixitalización dos fondos da Academia. A RAG segue ademais a ofrecer a través de academia.gal outros 29 títulos que prevé incorporar no futuro a Galiciana, de maneira que as publicacións periódicas da súa hemeroteca dispoñibles en liña son xa máis de 150.
As novas dixitalizacións leváronse a cabo en 2019 coas axudas da primeira convocatoria de subvencións para a dixitalización do patrimonio cultural de Galicia da AMTEGA. As preto de 140.000 páxinas que enriquecen a oferta do fondo galego do século XIX e a primeira metade do XX editado a ambas as beiras do Atlántico inclúen outros títulos pioneiros da prensa en galego como O Tío Pepe, publicación quincenal agrarista editada en 1913 dende A Fonsagrada; As Roladas: folla dos rapaciños galegos (1922), o primeiro intento de facer unha revista infantil en galego, promovida por Ramón Cabanillas dende Madrid e cunha vida efémera (só saíron do prelo dous números); ou a revista católica Logos (Pontevedra, 1931-1936), que apostou tamén dende o seu xénero pola lingua galega.
O semanario Follas Novas, editado na Habana entre 1897 e 1909, e o voceiro da Irmandade Nazonalista Galega de Buenos Aires A Fouce son, por outra banda, exemplos destacados da prensa galega procedente de América conservada na hemeroteca da Real Academia Galega que se incorpora a Galiciana, xunto a diversas revistas e boletíns de centros galegos doutras localidades de Arxentina, Cuba ou Uruguai. (…)”

As 167 cartas que se enviaron Otero Pedrayo e Carvalho Calero estarán dispoñíbeis ‘online’

Publicado o por

Desde Nós Diario:
“Trátase das 167 cartas que os escritores se enviaron entre 1949 e 1974, que pasarán a estar estar dispoñíbeis ‘online‘ para estudo ou consulta.
A firma contou coa herdeira de Carvalho Calero, María Vitoria Carvalho Calero, e o presidente da Fundación Penzol, Manuel Puga Pereira; así como co presidente do Parlamento da Galiza, Miguel Santalices.
As 85 cartas enviadas por Otero Pedrayo están depositadas no Parlamento galego, mentres que as 82 remitidas por Carvalho Calero son custodiadas pola Fundación Penzol.
Durante o acto, o presidente do Parlamento galego destacou que ambos os dous autores foron dúas persoas “comprometidas coa causa da liberdade e o galeguismo”, que afrontaron dificultades na súa traxectoria “cunha enteireza, valentía e integridade realmente exemplares”. “A Galiza actual está en débeda cos galeguistas históricos que antes e durante a ditadura, nuns casos desde o territorio, noutros desde a emigración ou desde o exilio, trazaron a senda do que é a Galiza actual”, destacou.”

A Deputación da Coruña garante as contratacións artísticas e o investimento cultural para paliar o impacto no sector cultural da crise do Coronavirus

Publicado o por

Desde a Deputación da Coruña:
“A área de Cultura da Deputación da Coruña anuncia novas medidas encamiñadas a garantir as contratacións artísticas e intentar paliar na medida do posíbel o efecto da crise do coronavirus no sector cultural. A área de Cultura presenta catro medidas que buscan garantir a contratación, animar os concellos a manter a programación da Rede Cultural que poderán realizar de maneira extraordinaria até o 31 de marzo de 2021. O deputado de Cultura, Xurxo Couto, dirixirase á Xunta para solicitar a redefinición do Xacobeo co fin de apoiar a cultura galega.
Catro actuacións estanse a activar na área de Cultura da Deputación da Coruña con fin de poñer todo o que está nas súas mans para responder ás urxencias polas que xa está a atravesar o sector cultural. Neste sentido, a Deputación atende as demandas das entidades representativas do sector que fixeron achegas para intentar activar novas medidas que tamén se están a estudar cos servizos administrativos da institución.
En primeiro lugar, o deputado de Cultura, Xurxo Couto, dirixirase por carta aos concellos para animalos a manter a contratación na Rede Cultural en 2019, anunciando que permitirá cambios de datas nas actuacións a causa da pandemia. Ao respecto, a Deputación aprobou de maneira extraordinaria que os concellos poidan reprogramar as actuacións que se poderán realizar até o 31 de marzo de 2021.
Priorizar os pagamentos pendentes e axilizar ao máximo todos os trámites para os contratos e subvencións é outra das medidas que xa se activaron desde o servizo da Deputación que continúa traballando a través da plataforma dixital SUBTEL.
En terceiro, a Deputación da Coruña comunicou xa oficialmente ás compañías e artistas o mantemento das programacións propias que tiveron que ser adiadas polo estado de alerta.
Finalmente, o deputado de Cultura, Xurxo Couto, dirixirase á Consellaría de Cultura para solicitarlle que sexa sensíbel á situación de fonda preocupación polas consecuencias económicas da crise do COVID19 no sector cultural e, en consecuencia, redefina a programación do Xacobeo 2021 en función da necesidade de que o apoio á produción cultural galega sexa a prioridade absoluta.
O prazo de solicitude de actuacións na Rede Cultural por parte de concellos e entidades prolongarase despois do fin do estado de alerta mais, neste tempo, a área de Cultura da Deputación da Coruña indica que tanto artistas como programadores poden avanzar no proceso a través da plataforma SUBTEL desde a que o persoal do servizo está a traballar na actualidade nos seus domicilios. Neste sentido, a Deputación estuda novas medidas para garantir a programación da Rede Cultural no primeiro trimestre do ano 2021, para compensar a posíbel perda de programación que se produza este ano
Cando se poña fin ao estado de alerta, concellos e entidades disporán aínda de tempo para solicitar as actuacións para as súas axendas culturais mais, neste sentido, a área de Cultura da Deputación anuncia que será flexible coas datas e posíbeis cambios no calendario debido ao coronavirus. Con isto, o obxectivo é, segundo sinala o deputado de Cultura, Xurxo Couto, “animar a concellos e entidades a manter o nivel de programación doutros anos co fin de que o sector sufra o mínimo posíbel debido á crise do coronavirus que está a ter un efecto moi negativo nun ámbito que vive de maneira especial de eventos públicos que foron cancelados”.
Desta maneira, concellos e entidades que fagan agora as súas previsións, poderán cambiar as datas propostas se así o requiren as indicacións das autoridades sanitarias en canto á celebración de actos con asistencia de público. “Por parte da Deputación o que imos garantir é que se mantén o orzamento destinado á Rede Cultural nesta edición que, inevitabelmente vai ser máis curta mais agardemos que se manteñan as contratacións habituais con outro calendario”, sinala Xurxo Couto que convida a concellos e entidades a facer a súa solicitude tendo tamén en conta que a “Rede Cultural é fundamental para o tecido do sector que son persoas autónomas e pequenas empresas para os que este circuíto é fundamental”.
Ademais, desde o servizo de Cultura da Deputación da Coruña están a priorizar os pagamentos pendente co fin de que o sector poida facturar neste tempo en que a actividade está a diminuír de forma acelerada. Por outra parte, o deputado Xurxo Couto tamén anuncia que se vai manter toda a programación propia cancelada por causa da crise sanitaria para a que se buscarán novas datas, o que xa se lle comunicou a compañías e artistas.
Igualmente o deputado de Cultura anunciou que dirixirá unha carta á Consellaría de Cultura da Xunta de Galicia para solicitarlle “a redefinición da programación cultural do Xacobeo 2021, centrándoa no apoio á produción cultural galega, de maneira que sirva como elemento paliativo do que pode ser un 2020 negro para a cultura galega”.”

O Salón do Libro retoma a súa actividade adoptando un formato virtual

Publicado o por

Desde o Concello de Pontevedra:
“Logo de pechar as portas o pasado xoves 12 por mor do Coronavirus, a organización atopou unha alternativa para favorecer tanto á cativada como ao sector cultural.
A partir do 17 de marzo e nas próximas semanas o Salón compartirá no seu Facebook, Instagram e web diferentes contidos: expos virtuais, contacontos e obradoiros.
As publicacións terán lugar cara ás 12:00 h. ou 12:30 h. pola mañá e 17:30 h. ou 18:00 h. pola tarde
Logo de case un ano de traballo tanto por parte da propia organización como dos centros escolares colaboradores – que elaboran traballos relacionados co tema – o Salón pechou apenas 6 días despois de abrir as súas portas por mor do COVID19. Quedaron pendentes unha chea de actividades da programación por levar a cabo e tamén unha morea de centros, familias e cativos por visitalo.
As circunstancias fan imposible a reapertura noutras datas máis, dende o propio día do peche, a organización traballou a reo para atopar unha solución que permitira por unha parte facer máis levadeira a situación actual á cativada confinada nas súas casa e por outra, paliar na medida do posible o impacto que está a ter no sector cultural onde se están a cancelar a meirande parte das activiades programadas nas próximas semanas/meses.
A resposta á proposta realizada tanto aos contadores, compañías, etc. como ao propio monitorado do Salón foi moi positiva e unha gran parte da programación prevista para este XXI Salón do Libro “O humor” adaptará o seu formato – cunhas condicións ténicas mínimas e respectando desa maneira os contratos asinados – para poder ser difundida a través das canles do Salón (redes, web, etc.) e así os máis pequenos e pequenas da casa poderán gozar de contacontos, obradoiros ou visitas virtuais aos espazos.
A falta da resposta de outras persoas contactadas, neste momento están confirmadas a participación de Tamara Andrés, Soledad Felloza, Polo Correo do Vento, Reviravolta, Pakolas, Pablo Díaz, “Magia en la manga”, Asociación Mater Lingua, María Faltri e Jorge Juncal, Leucoíña, Fantoches Baj, “A xanela do maxín” ou 7H cooperativa.
Sobre outros espectáculos de maior formato que non poden ser adaptados, estanse a valorar opcións.”