Arquivo da categoría: Premios e concursos (outros)

Fervenzas Literarias: Os mellores libros do 2011

Publicado o por

“Un ano máis, e xa van cinco edicións, abrimos esta fiestra para que valoredes literariamente este 2011 que está a piques de rematar. Escritor@s, ilustrador@s, novelas, poesía, literatura infantil e xuvenil, críticos literarios, editoriais, etc… Agora podedes facer valer a vosa opinión e votar polos vosos gustos e preferencias.
As votacións están abertas dende o 15 de decembro ata o 15 de xaneiro do 2012. De novo temos que agradecer a amabilidade da Federación de Libreiros de Galicia a xenerosidade de cedernos un lote de libros que sortearemos entre todos os participantes na enquisa.
Querémosvos agradecer a vosa colaboración e animarvos a que participedes nestes V premios Fervenzas Literarias. Moitas grazas a tod@s!”. Vía Fervenzas Literarias.

Concurso para a elaboración dunha exposición sobre Valentín Paz Andrade

Publicado o por

A Secretaría Xeral de Política Lingüística, por delegación do conselleiro de Educación e Ordenación Universitaria do día 4 de novembro de 2011, en virtude da disposición adicional da Orde do 22 de abril de 2010 de delegación de competencias nos órganos superiores e periféricos da Consellería de Educación e Ordenación Universitaria (DOG núm. 78, do 27 de abril de 2010), con motivo do Día das Letras Galegas, convoca un concurso, entre os centros de ensino non universitario de titularidade da Consellería de Educación e Ordenación Universitaria para a elaboración dunha exposición sobre a obra, época e lingua do autor homenaxeado en 2012, Valentín Paz Andrade, e/ou sobre a situación sociolingüística da etapa histórica na que este viviu.
Obxectivos:
1. Potenciar o estudo da obra e da época de Valentín Paz Andrade.
2. Propiciar a reflexión sociolingüística sobre esta etapa histórica.
3. Fomentar a valoración das contribucións individuais e colectivas na dignificación e normalización da lingua galega.
4. Impulsar a realización de actividades que fomenten a colaboración interdepartamental e que potencien a implicación activa do profesorado e do alumnado.
5. Fomentar e difundir unha visión persoal por parte da comunidade educativa sobre a figura deste autor.
6. Enriquecer a oferta de materiais existentes en lingua galega, e promover a súa divulgación como referentes para outros centros.

BASES

1. Poderán participar todos os centros de ensino non universitario de titularidade da Consellería de Educación aos que se refire a base 2.ª desta convocatoria.
2. Establécense dúas categorías:
a) Para os centros de educación infantil e primaria.
b) Para os centros de educación secundaria obrigatoria, bacharelato e formación profesional.
Os centros educativos nos que se imparta educación infantil, primaria e secundaria poderán concursar nas dúas categorías.
3. Os traballos serán orixinais e inéditos.
4. O eixe temático da exposición será a obra e a época de Valentín Paz Andrade, observada dende unha perspectiva pluridisciplinar e onde o percorrido biográfico sexa só un pretexto para abordar unha realidade complexa e heteroxénea.
5. O traballo será interdepartamental e na súa elaboración deberán estar implicados un mínimo de cinco seminarios. No caso dos centros de educación primaria, terase en conta a participación dos equipos de distintos ciclos.
6. A exposición constará de:
– 10 carteis de 70 x 50 cm.
– Para cada cartel elaboraranse unha serie de actividades que guíen a súa observación e fomenten o labor de investigación do alumnado. Xuntarase á exposición en forma de guía ou cuestionario e a súa extensión non superará as 20 páxinas.
7. A técnica para utilizar é libre e os traballos poderanse presentar en cor.
8. Os grupos de traballo que elaboren as exposicións gañadoras recibirán cadanseu premio en metálico por importe de 3.000 €. Os premios poderán, se a calidade dos traballos presentados non fose a axeitada, declararse desertos.
9. Os traballos entregaranse en formato dixital PDF e EPS, cunha resolución mínima das imaxes de 300 píxeles/polgada, modo de cor cmyk, acompañado da reprodución impresa dun dos carteis, no Rexistro Xeral da Xunta de Galicia, nos das súas delegacións provinciais ou por calquera dos medios previstos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común. Presentaranse baixo un pseudónimo ou lema identificador. Ademais, acompañarase un sobre pechado no que figurará no exterior unicamente o pseudónimo ou lema da exposición e no seu interior, os datos do centro e os do grupo de traballo.
10. O prazo de presentación remata o día 16 de xaneiro de 2012.
11. Para o ditame dos premios establecerase un xurado formado por:
– O titular da Subdirección Xeral de Política Lingüística.
– O titular da Subdirección Xeral de Planificación e Dinamización Lingüística.
– Un asesor ou asesora técnica encargado/a dos contidos educativos.
O xurado poderá contar cos informes dunha comisión técnica especializada para colaborar na valoración daqueles proxectos que coide pertinentes.
12. O xurado terá en conta os seguintes criterios de valoración:
– Ampliación da perspectiva de coñecemento do autor homenaxeado.
– Inclusión de actividades dirixidas a distintos ámbitos de coñecemento, ademais das correspondentes aos seminarios implicados.
– Nivel de implicación e incidencia na comunidade educativa.
– Carácter motivador e orixinalidade da proposta.
– Orde, claridade, coherencia e corrección gramatical na presentación.
13. Os orixinais non premiados serán devoltos, sempre que os/as autores/as así o soliciten por escrito, no prazo máximo dun mes a partir da data en que se faga pública a resolución do xurado. Os orixinais que non se retiren, destruiranse.
14. A mellor exposición de cada unha das categorías será imprimida e distribuída en máis de 1.600 puntos de Galicia e do exterior, tales como centros de ensino, centros de estudos galegos, centros da emigración, bibliotecas municipais e casas da cultura, entre outros. Nela figurarán a imaxe gráfica da Xunta de Galicia e o nome do centro gañador.
15. A Secretaría Xeral de Política Lingüística quedará eximida de calquera responsabilidade derivada do plaxio ou de calquera transgresión da lexislación vixente na que, en materia de propiedade intelectual, puidesen incorrer os/as participantes.
16. A Secretaría Xeral de Política Lingüística resérvase o dereito a organizar exposicións e/ou a exhibición, reprodución ou publicación da imaxe ou contido dos traballos presentados por calquera medio que se considere oportuno, sen máis limitacións que as derivadas do Real decreto lexislativo 1/1996, do 12 de abril, polo que se aproba o texto refundido da Lei de propiedade intelectual.
17. A Secretaría Xeral de Política Lingüística poderá desenvolver as accións que considere oportunas encamiñadas á difusión dos traballos seleccionados das categorías incluídas nesta convocatoria.
18. A participación no concurso implica a aceptación destas bases. A Secretaría Xeral de Política Lingüística queda facultada para dirimir calquera controversia derivada da interpretación das bases. O ditame do xurado será inapelable.

Santiago de Compostela, 7 de novembro de 2011

Eva Veiga, Paola García Paz e a Casa da Gramática, gañan os Sereos, premios da Asociación Cultural Barbantia

Publicado o por

“A Asociación Cultural Barbantia xa se prepara para a súa gran festa anual, que este ano vai ter lugar en Noia e contará con tres protagonistas de excepción: os galardoados cos Sereos, os premios instituídos pola asociación que acadan este ano a quinta edición. Na Traxectoria Cultural no Barbanza, a galardoada é a pintora Paola García Paz; a Iniciativa Cultural no Barbanza é para a publicación do IES Virxe do Mar de Noia, Casa da Gramática; e a distinción á Cultura Galega vai para a poeta Eva Veiga. A entrega das figuras de Sargadelos que substitúen ás de bronce que se viñeron dando ata o ano pasado, vai ser o acto máis solemne da cita fixada na Casa de Cultura Avilés de Taramancos da histórica vila de Noia, pero vai haber outros que xa son fixos na programación da principal entidade cultural da zona. Trátase, por exemplo, da presentación no Anuario de Estudos do Barbanza 2011, publicación na que se recompilan colaboracións de creadores barbanceses, un resumo dos actos que se desenvolveron ao longo dos doce meses baixo e epígrafe de Barbantia, a relación dos libros editados na comarca e outras achegas, do que falará Manuel Cartea, o coordinador da publicación. A designación dos premios Sereos fíxose por medio dunha votación entre os socios de Barbantia. O período para presentar as propostas rematou o pasado venres e o escrutinio foi feito polo presidente da asociación, Xesús Laíño; o directivo Antón Riveiro Coello e o coordinador da organización, Alberto Piñeiro.” Vía La Voz de Galicia.

María Xosé Queizán, Premio Voz da Liberdade 2011, outorgado polo Centro PEN de Galicia

Publicado o por

“O xurado cualificador do Premio Voz de Liberdade 2011, outorgado polo Centro PEN de Galicia e de carácter bienal, integrado por Luís González Tosar, Miro Villar, Inma López Silva, Marilar Aleixandre, Manuel Outeiriño, Román Raña e Manuel Guede, decidiu conceder este galardón, na súa quinta edición, por unanimidade, á escritora viguesa María Xosé Queizán. Entre outros méritos, o xurado considerou, “a súa traxectoria independente e firme, tanto na defensa da liberdade de expresión coma na dos dereitos das mulleres desde a década dos sesenta ata a actualidade. María Xosé Queizán, cunha obra de referencia na narrativa, na poesía, no ensaio e no teatro, destaca tamén polo seu labor de tradutora e por manter, ao longo de 28 anos, a revista Festa da palabra silenciada, verdadeira voz da escrita feminina e exemplo de pluralidade e proxección exterior da literatura galega”. O xurado fai constar, asimesmo, que María Xosé Queizán impulsou, xunto con outros 22 escritores e escritoras, o primeiro intento de creación do PEN Clube de Galicia, asistindo á asemblea constitutiva celebrada en Santiago o 7 de abril de 1977 e suscribindo a incorporación ao PEN Internacional. (…) A entrega do Voz de Liberdade 2011, unha peza escultórica da autoría do ourensán Xosé Cid, terá lugar no transcurso dunha actividade literaria aberta, na que a glosa da homenaxeada correrá a cargo da Catedrática de Lingua e Literatura Galegas da Universidade de Vigo, Prof. Mª Camiño Noia Campos. O acto terá lugar o sábado 26 de novembro, ás 12:00 horas, na Sala de Conferencias do Centro Social Novacaixagalicia, Praza de Cervantes, de Santiago de Compostela.” Vía Xerais.

Comunicado de ProLingua ante a segunda edición dos Premios da Cultura Galega

Publicado o por

Comunicado de ProLingua:
“A Consellería de Cultura vén de facer públicos os nomes das persoas e institucións galardoadas cos que, logo de lles cambiar o nome e suprimir a dotación económica, decidiu chamar Premios da Cultura Galega. É o segundo ano que o actual goberno da Xunta de Galicia convoca e reparte estes premios.
Paralelamente, lonxe de rectificar as prácticas destrutivas no ámbito cultural e lingüístico que puxo en marcha desde o inicio, tamén este ano vimos como o goberno de Núñez Feijoo recrudecía o acoso contra moitas das institucións que serven ao mandato legal e á obriga moral d e promover o idioma. Continúanse negando os recursos mínimos para contribuír á permanencia das editoras, do teatro, dos equipos de normalización, do sector audiovisual, dos xornais; de toda iniciativa, en suma, que faga da lingua galega un factor estratéxico na recuperación social e económica deste país.
É por iso que ProLingua comparte a alarma da sociedade ante as prácticas dun goberno que se disfraza outra vez de promotor cultural mentres leva a cabo a peor regresión que se recorda non só en materia lingüística, senón tamén e precisamente no ámbito da cultura. Desde a súa posición apartidaria e plural, a plataforma ProLingua fai un novo chamamento a cada unha das persoas premiadas para non abonaren coa súa presenza as agresións contra o dereito a vivir libre e plenamente no idioma galego.”

Bases do XX Certame Literario A Pipa de Becerreá

Publicado o por

A Asociación Cultural A Pipa de Becerreá convoca o XX Certame Literario A Pipa, coas seguintes bases:

“1. Temática. O tema é libre.
2. Tres categorías.
2.A.- CATEGORÍA INFANTIL (Dos 8 ós 14 anos)
2.B.- CATEGORÍA XUVENIL (Dos 14 ós 18 anos)
2.C.- CATEGORÍA Revista A PIPA para maiores de 18 anos.
3. Dúas modalidades.
3. A.- POESÍA (máximo 50 versos)
3. B.- RELATO, NARRACIÓN OU CONTO breves (máximo 5 folios Din A4, dobre espazo entre as liñas, letra Times New Roman tamaño 12, marxes entre 2 e 3 cm.)
4. Os premios.
Para cadansúa CATEGORÍA establécense 1º e 2º Premio de Poesía, e tamén 1º e 2º Premio de Relato, mailos ACCÉSITS que o Xurado considere necesarios.
Cada premio consiste nunha estatuíña de cerámica de Sargadelos con placa inscrita, un lote de libros, e o correspondente título acreditativo. A Asociación Cultural A PIPA non descarta que os traballos premiados poidan ser editados nun futuro.
5. Presentación e Prazo.
5. A.- Cada participante poderá presentar un ou máis traballos, en LINGUA GALEGA.
5. B.- Os traballos presentaranse anónimos, sinalando neles a CATEGORÍA e MODALIDADE na que participan, e achegando nun sobre pechado a identidade, o enderezo e o número de teléfono do/a autor/a.
5. C.- O prazo de admisión rematará o 22 de decembro de 2011.
5. D.- Os traballos poden entregarse, ou enviarse ó seguinte enderezo: Certame Literario A PIPA. Rúa Ancares, 57. – 27640 Becerreá (Lugo).
6. O Xurado. O Fallo.
O Xurado estará composto pola Xunta Directiva da Asociación Cultural A PIPA de Becerreá, que tamén poderá convidar a algún profesional do mundo do Ensino, da Literatura e das Artes. O fallo farase público a través dos medios de comunicación, e tamén se transmitirá persoalmente ós/ás gañadores/as.
7. Cerimonia de Entrega de Premios.
A Cerimonia de Entrega de Premios terá lugar na Casa de Cultura de Becerreá o mércores 28 de decembro ás 21:00 h. no marco da XX Noite poética A Pipa 2011, con María Lado e Lucía Aldao.”

Certame Literario sobre o Río dos Gafos

Publicado o por

BASES PARA PARTICIPAR NO ÁLBUM LITERARIO POEMA – RÍO SOBRE O RÍO DOS GAFOS

1. Poderá participar neste álbum calquera persoa que presente un texto en lingua galega que faga referencia ao río dos Gafos. Cada persoa poderá remitir tantos textos como desexe para a súa posterior inclusión no álbum literario Poema-río.
2. O tema será o río dos Gafos e a súa contorna. Os traballos serán de extensión libre, pero sempre inferior ás 15 páxinas. Poderán presentarse textos inéditos, orixinais de creación propia ou transcricións de textos recollidos da literatura oral tradicional. O carácter do texto poderá ser xornalístico, ensaístico ou literario, en calquera xénero agás novela.
3. O texto presentaranse, necesariamente e como mínimo, en formato electrónico, nun arquivo xunto en formato modificable ou en CD, con letra Arial de 12 puntos, 1,5 cm de espazo entre liñas e con marxes de 2,5 cm. Ademais, tamén se poderá remitir impreso en papel, coas mesmas características de edición. Non se aceptarán textos manuscritos. Os textos terán que axustarse ás Normas ortográficas e morfolóxicas do idioma galego, publicadas pola Real Academia Galega e polo Instituto da Lingua Galega no ano 2004.
4. Todos os textos estarán asinados polo/a autor/a, con nome e apelidos, teléfono e enderezo electrónico de contacto. Se o texto é recollido da tradición oral, deberase indicar ao final do texto Texto tradicional e, opcionalmente, o lugar onde se recolleu ou o nome da persoa de quen se oíu.
5. As persoas participantes enviaran os seus traballos antes do 31 de xaneiro do 2012. Remitiranse por correo electrónico a vaipolorio@terra.com ou ao enderezo postal: Asociación Vaipolorío. Preescolar de Cabanas. CP 36140- Salcedo – Pontevedra.
6. Durante o mes de febreiro reunirase un comité para seleccionar os traballos que se publicarán. Este comité estará formado por un/unha representante da Concellaría de Normalización Lingüística do Concello de Pontevedra, un/unha literato/a pontevedrés/a de recoñecido prestixio e un membro da asociación Vaipolorío.
7. Todos os traballos seleccionados serán recollidos nun libro que publicará o Concello de Pontevedra a través da Concellaría de Normalización Lingüística. A publicación non estará destinada á venda, polo que ninguén obterá beneficios económicos. Cada texto levará indicado o nome e apelidos da persoa autora. O libro presentarase no mes de maio do ano 2012, dentro do programa Maio, Mes da Lingua que promove o Concello de Pontevedra.
8. A extensión máxima do libro publicado en papel será de 60 páxinas, polo que o comité seleccionador poderá decidir a publicación total ou parcial de calquera traballo que se presente. Todos os traballos presentados, fosen ou non seleccionados para a publicación en papel, poderán ser publicados na páxina web da asociación Vaipolorío, segundo o criterio desta asociación. En calquera caso indicarase o nome completo da persoa autora.
9. A participación nesta convocatoria non dá dereito a ningún tipo de compensación, agás o recoñecemento público das persoas seleccionadas. As entidades convocantes agasallarán cun exemplar do libro impreso a cada autor/a seleccionado/a para a publicación en papel.
10. Os/As participantes aceptan estas bases e as decisións do comité seleccionador.

Pontevedra, outubro de 2011

Máis información no teléfono 676842942.

Coñécense os gañadores dos Premios da Cultura Galega

Publicado o por

“Son os galardóns máis destacados da cultura galega. Creados polo bipartido, modificados (perderon a etiqueta de nacionais máis a dotación económica, así como reduciron o número de premios) polo actual goberno recoñecen os mellores creadores do país. Nesta ocasión, os gañadores son Arcadio López Casanova na categoría de Letras, Manolo Paz en Artes Plásticas, Quico Cadaval en Artes Escénicas, a Fundación Aquae Querquennae na de Patrimonio Cultural, Carlos Núñez en Promoción Cultural de Galicia, Roxelio Groba en Música e María Pujalte en Creación Audiovisual.
O xurado estivo integrado polo propio Conselleiro de Cultura, o presidente do Consello da Cultura Galega, o presidente da Real Academia Galega, o da Real Academia de Belas Artes, o director xeral do Libro e catro profesionais “de recoñecido prestixio” designados pola Consellería (Miguel Fernández Cid, Natalia Lamas, Isabel Aguirre e Carmen Castro Pombo). Estes doce membros deliberaron a súa decisión nunha xuntanza celebrada o 2 de novembro na Cidade da Cultura, entre as candidaturas presentadas (os premiados non se pudieron postular a si mesmos, senón que foron promovidos por institucións e entidades culturais ou profesionais relacionados co obxecto de cada premio). Na convocatoria do Premio especifica que os galardóns serán entregados nun acto público organizado pola Consellaría de Cultura que a nota de prensa non especifica nin lugar nin data de entrega. (…)” Vía Cultura Galega.
Valoracións de Arcadio López Casanova en La Voz de Galicia.

Galicola: III edición do Concurso Ángelo Casal

Publicado o por

“A Galicola, o projeto galego de economia social que destina todos os benefícios da venda do refresco à normalizaçom da língua, convoca por terceiro ano consecutivo o Concurso Ángelo Casal.
Durante todo o ano, o 5% das vendas do refresco engrossará o Fundo polo Galego, que será o prémio a entregar ao projeto normalizador com mais votos, ganhador do Concurso Ángelo Casal. O projeto ganhador deste concurso -que leva o nome do alcalde galeguista de Compostela assassinado polo fascismo em 1936, e grande mecenas da cultura galega de pré-guerra- conhecerá-se no 17 de maio, Dia das Letras Galegas.
O prazo de apresentaçom de candidaturas ao Concurso rematará no 31 de dezembro de 2011. Deverám ser enviadas ao correio eletrónico info@galicola.org, e serám aceitadas as que cumpram as seguintes bases:

Bases para a apresentaçom de candidaturas
– Nom se aceitarám candidaturas de empresas com ánimo de lucro.
– Nom se aceitarám candidaturas de entidades que empreguem o espanhol.
– Nom se aceitarám candidaturas de entidades que promovam valores reacionários como o racismo ou o sexismo.
– Nom se aceitará mais de umha candidatura por entidade.
– Nom se aceitarám candidaturas de entidades que tenham ganhado o prémio o ano anterior.
– As candidaturas entregarám à Galicola umha apresentaçom do destino a que dedicarám o prémio, com extensom nom superior à duas folhas. Essa apresentaçom será divulgada nesta página web para o seu conhecimento polos participantes no Concurso.
– O prazo de recepçom de candidaturas fecha-se em 31 de dezembro de 2011. Nom se aceitarám candidaturas fora de prazo.

Eleiçom dos projetos ganhadores
No 31 de janeiro publicará-se a listagem de candidaturas admitidas por Galicola, e exporám-se os seus projetos na página web da Galicola.
O Concurso resolverá-se por votaçom popular. De 31 de janeiro a 1 de maio cada consumidor de Galicola poderá votar polos projetos que prefera, enviando umha etiqueta do refresco com o seu voto. Nom há limite aos votos que cada pessoa queira enviar. Poderáse votar tanto por correio postal, quanto em urnas instaladas em centros sociais e locais por todo o país. No 17 de maio, Dia das Letras Galegas, abrirám-se as urnas e procederáse ao reconto de votos e à proclamaçom do projeto ganhador.”

A Xunta non convocará os certames Xuventude Crea este ano

Publicado o por

“Nin banda deseñada, nin premio Tesoira de novos deseñadores, nin teatro nin música nin poesía nin videocreación. Como xa temían moitos sectores por mor do atraso na súa convocatoria, Xuventude Crea, o Certame galego de Creadores Novos, non se convocará este ano en ningunha das súas categorías. Segundo confirma a Consellaría de Traballo e Benestar, os galardóns considerados dos máis importantes e mellor dotados do país nos seus diferentes ámbitos, sofren tamén os recortes orzamentarios e están nunha fase de reformulación. Desde a Consellaría sinalan que aínda non está decidida a fórmula da convocatoria para 2012, a contía nin as categorías que se desenvolverán.” Vía Cultura Galega.