A Coruña: presentación do libro Miguel González Garcés, mineiro de luz
Arquivos da etiqueta: Xulio López Valcárcel
A Coruña: Gala XXV aniversario da Xeración de amor e desamor
A Asociación Cultural Alexandre Bóveda informa que este xoves 17 de decembro terá lugar a celebración da Gala XXV aniversario da Xeración de amor e desamor. Na mesma terá lugar a intervención poética de diversos integrantes desta xeración como Lino Braxe, Manuel Rivas, Miguel Mato, José Devesa, Miguel Anxo Fernán Vello, Xulio L. Valcarcel ou Xavier Seoane. O acto será presentado por Consuelo Bautista e durante o mesmo presentarase un libro e cd homenaxe a esta xeración poética. Será no teatro Rosalía de Castro, ás 20:30 h. con entrada gratuíta.
Recordatorio: hoxe, recital poético en homenaxe a González Garcés e presentación do libro Escapado
Recordámosvos a celebración hoxe de dous actos xa anunciados a semana pasada: o recital poético en homenaxe a Miguel González Garcés na biblioteca que leva o seu nome na Coruña, coa participación de Xavier Seoane, Xulio López Valcárcel e Miguel Anxo Fernán-Vello; e a presentación do libro Escapado de Luís Lamela, ás 20 horas na biblioteca Uxío Novoeneyra de Vilaboa, Culleredo.
A Coruña: Alberte Suras presenta o seu novo poemario
O vindeiro xoves 18 de xuño ás oito da tarde en Portas Artabras (rúa Sinagoga 22, na cidade vella da Coruña) terá lugar a presentación do libro de poesía Olladas dun intre de amor, do que é autor o escritor e profesor coruñés Alberte Suras. O acto contará coa participación do autor e de Felipe Senén, Henrique Rabuñal e Jacobo LLamas, director de publicacións da editorial Toxosoutos. Asemade recitaran poemas: Manuel Celso Matalobos, Xavier Rodríguez Barrio, Xulio López Valcárcel, Estíbaliz Espinosa e Diana Varela Puñal. Durante a presentación rendirase unha pequena homenaxe a Manuel María e Saleta Goy.
Homenaxe a Ramiro Fonte en Vigo (vídeo)
A Coruña: presentación de Lúa de xemas frías, escolma de poesía mapuche de Xulio L. Valcárcel
Xulio L. Valcárcel: “Hoxe, cunha globalización que pretende chegar coa súa teima uniformizadora e esterilizante aos lugares máis recónditos, os mapuches tratan de conservar a súa identidade. A loita tenaz e admirable deste pobo pola preservación, fronte a tanta e tan aberta hostilidade, dos seus sinais identitarios, a súa encomiable resistencia fronte á sociedade consumista de carácter masificador e homogenizador, e o papel esencial que nese proceso de afirmación do propio teñen desempeñado con orgullo os seus poetas, explican o porqué deste libro”.
A presentación de Lúa de xemas frías (Espiral Maior), a recente escolma de poesía mapuche cuxa edición vén de realizar Xulio L. Valcárcel, terá lugar o mércores 20 de maio ás 20,00 horas na Galería Sargadelos da Coruña (Rúa Real, 56). O acto contará coa participación de Iván Contreras, Miguel Anxo Fernan Vello e Xulio L. Valcárcel. Tamén ofrecerán unha participación especial o actor Gustavo Pernas e a actriz Ánxela G. Abalo.
Vigo: presentación do libro Deter o día cunha flor
Mañá mércores 20 de maio ás 19:30 horas na Casa do Libro de Vigo (R/ Velázquez Moreno, 27) terá lugar a presentación do libro de poemas de Luz Pozo Garza Deter o día cunha flor, ilustrado a toda cor polo gravador betanceiro José Valentín e editado por Baía. No acto, xunto a Luz Pozo e José Valentín, intervirán o profesor, poeta e crítico literario Xosé María Álvarez Cáccamo, a poeta María do Carmo Krukenberg e a directora editorial Belén López Vázquez, quen se encargarán de facer unha aproximación crítica a esta obra que combina a literatura poética e a expresión plástica e que ofrecerán un recital poético.
«”Non existe a arte, só os artistas”. Se así o aceptamos, podería explicarse a afinidade, a irmandade, entre dúas formas de expresión, imaxe e palabra, que se complementan. Antiga é a relación. Xa Simónides de Ceos sostiña que “a poesía é unha pintura falada, e a pintura unha poesía muda”. Luz Pozo e José Valentín seguen unha tradición ben nosa: houbo épocas nas que non se concebía a edición dun libro galego sen as correspondentes ilustracións: de Colmeiro, Seoane, Laxeiro, Xohan Ledo (…).
Relación constantemente renovada, a da pintura e a poesía, que volvemos atopar nesta obra, síntese fecunda de dúas achegas a un todo harmónico. Deter o día cunha flor, este é o título, enunciado-propósito, do libro de Luz Pozo Garza e José Valentín; Luz Pozo, unha das nosas máis grandes poetas; José Valentín, revelación serodia, pero a tempo, dun artista moito máis importante do que a súa modestia lle permite aceptar. Luz e José, dous creadores cun enfoque común de interacción e apoio».
(Do prólogo de Xulio López Valcárcel)
Gañadores dos Premios AELG 2009
Na celebración da Cea das Letras, un dos actos máis importantes na vida da Asociación de Escritores en Lingua Galega, foron entregados os premios á mellor obra publicada no 2008 nas modalidades de ensaio, literatura infantil e xuvenil, poesía, narrativa, tradución, teatro, traxectoria xornalística e blog literario, así como á institución que salientara na defensa e difusión da nosa cultura.
Os galardóns, concedidos por escritores/as para escritores/as, levan camiño de se afianzar como uns dos de máis prestixio no noso panorama literario.
Da conxunción de votos emitidos nunha primeira quenda polos asociados/as á AELG -coa participación dos socios/as de Gálix para elixir a mellor obra de Literatura Infantil e Xuvenil e dos membros do Colexio de Xornalistas para a modalidade de Traxectoria xornalística-, elaborouse unha listaxe de obras finalistas correspondentes a cada xénero dos mencionados, sobre a que os socios e socias emitiron de novo o seu voto nunha segunda quenda para elixir as obras gañadoras dos Premios AELG. Unha vez computados os votos, os gañadores do Premio AELG ás mellores obras publicadas no 2008 son:
Ensaio: Miguel Anxo Murado, pola súa obra Fin de século en Palestina (Galaxia)
Literatura Infantil e Xuvenil: Xabier P. DoCampo, pola súa obra O libro das viaxes imaxinarias (Edicións Xerais de Galicia)
Poesía: Xulio L. Valcárcel, pola súa obra A melancolía dos corpos (Ediciones de la Sociedad de Cultura Valle-Inclán)
Narrativa: Inma López Silva, pola súa obra Memoria de cidades sen luz (Galaxia)
Tradución: Gonzalo Navaza, pola tradución da obra As flores do mal, de Charles Baudelaire (Galaxia)
Teatro: Teresa Moure, pola súa obra Unha primavera para Aldara (Deputación Provincial de A Coruña)
Mellor traxectoria xornalística: Ana Romaní
Blog Literario: Marcos Valcárcel, polo seu blog As uvas na solaina
Institucións: Sección de Literatura do Liceo de Ourense
Escritora Galega Universal: Elena Poniatowska
Discurso de Cesáreo Sánchez Iglesias: Vídeo
Lectura e entrega dos Premios AELG 2009: Vídeo
(Vídeos retransmitidos en streaming durante a Cea das Letras no portal Blogaliza)
Homenaxe a Ramiro Fonte
A sede viguesa da Fundación Caixa Galicia, na rúa Policarpo Sanz nº 21, acollerá mañá venres 17 de abril, a partir das 19,30 horas, un acto de homenaxe ao escritor Ramiro Fonte.
O acto iniciarase coa actuación musical do “Grupo Instrumental Siglo XX”. A continuación, celebrarase un recital poético con participación de X. M. Álvarez Cáccamo, Manuel Álvarez Torneiro, Ignacio Chao, María do Carme Kruckenberg e Xulio L. Valcárcel. Tras unha segunda actuación musical, as recitacións proseguirán coas intervencións de Gonzalo Navaza, Román Raña, Xavier Rodríguez Baixeras, Cesáreo Sánchez Iglesias e Xavier Seoane.
Ramiro Fonte (Pontedeume, 1957) finou en Barcelona o 11 de outubro de 2008. Ocupaba a dirección do Instituto Cervantes en Lisboa. Colaborador en prensa e membro da Real Academia Galega da Lingua, exerceu como docente de Lingua e Literatura Galega en Vigo e foi profesor no Instituto Cervantes en Londres. Entre os galardóns que recibiu caben salientar o Premio da Crítica de Galicia, o Premio da Crítica Española, o Losada Diéguez e o Esquío, entre outros.
A Coruña: recital poético de Xulio López Valcárcel e Miguel Anxo Fernán-Vello
Hoxe martes 10 de febreiro no local da Agrupación Cultural Alexandre Bóveda (r/ Olmos, 16-18 – 1º, A Coruña) terá lugar unha nova sesión do ciclo de recitais poéticos A palabra na voz de quen a crea, coa participación de Xulio López Valcárcel e Miguel Anxo Fernán-Vello. Será a partir das 20:30 e a entrada é de balde até completar aforo.
