Eduardo Estévez impartirá un obradoiro de escrita na Libraría Chan da Pólvora de Santiago de Compostela (Rúa de San Pedro, 74) durante os meses de xaneiro, febreiro e marzo: 12 horas intensivas repartidas en seis xornadas (que cadrarán a luns de 20:00-22:00).
O prazo de inscrición finaliza o 16 de xaneiro. Toda a información en chandapolvoralibraria@gmail.com ou no teléfono 881253585.
Arquivos mensuais: Xaneiro 2019
Ana Cabaleiro: “Na literatura óbviase a diferenza de clase e iso é perigoso”
Entrevista
de Daniel Salgado a Ana Cabaleiro en Sermos Galiza:
“(…) – Sermos Galiza (SG): O seu primeiro e anterior libro era de relatos, Sapos e sereas (Galaxia, 2017). A que se debe o salto á novela?
– Ana Cabaleiro (AC): Sempre defendín que son escritora de relatos. É un formato que me gusta moito e non me parece nada doado. O que pasa é que eu empecei a escribir As ramonas un pouquiño antes de asinar o contrato de Sapos e sereas. Fun escribindo, publicouse Sapos e sereas e fun vendo a recepción. Ademais, sempre temos algo dentro que nos leva a pensar en se seriamos quen de facer outra cousa. Como un reto. As ramonas naceu máis por divertimento. Quería contar a historia e nun relato tería que condesala demasiado. Por iso naceu esta historia máis longa, aínda que tampouco é que sexa unha novela moi longa. Mais para min escribir curto é máis difícil e ao mesmo tempo é moito máis interesante.
– SG: Á hora de escribir, que diferenza hai entre decidirse por un formato ou por outro?
– AC: A min divírteme máis o relato. Gústame crear personaxes constantemente. Nunha novela eu non teño capacidade –como escritora– para crear personaxes abondo para divertirme. Hai que seguirlles o fío e aínda non cheguei a ese punto. Ao mellor algún día chego.
– SG: Pero polas Ramonas transitan moitos personaxes.
– AC: Si, hai moitos personaxes, pero cunha vida moi curta. Nacen e morren seguido. Non fisicamente, quere dicir que o seu percorrido na historia é moi curto. (…)”
Crónica videográfica da III Xornada de Literatura Dramática (III)
A
III Xornada da Sección de Literatura Dramática. A palabra teatral nas aulas, actividade organizada pola AELG coa colaboración da Asociación Sócio-Pedagóxica Galega, co patrocinio do Concello da Coruña, Deputación Provincial da Coruña e CEDRO, e a colaboración da Universidade da Coruña, tivo lugar o 24 de novembro de 2018 Espazo Normal da Coruña.
Aquí pode verse a crónica videográfica completa, da que publicamos hoxe estes vídeos:
– Festival Pezas dun teatro do porvir: Malcriada, unha historia de amor, Esther F. Carrodeguas:
– Festival Pezas dun teatro do porvir: Pulso, Paula Sanmartín:
– Festival Pezas dun teatro do porvir: Proxemia 45 (posible título), AveLina Pérez e Manuel Lourenzo:
– Festival Pezas dun teatro do porvir: Infinito Conxugado, Gloria Rico:
O Autor fala da súa obra: Darío Xohán Cabana (2018)
Desde
finais de 2018 incorporáronse á web da AELG catro novas entrevistas longas a ese mesmo número de autoras/es socias/os. O obxectivo deste formato é falar demoradamente da súa traxectoria literaria e da súa biografía, de modo que se poida obter un pequeno documental de aproximadamente unha hora por autor/a, coa intención de que supoña un documento valioso que resuma a súa obra e ofreza valoracións de escritoras e escritores sobre a creación, a cultura e o pensamento en xeral. Esta actividade contou co financiamento da Deputación de Lugo.
Aquí pode verse o vídeo gravado a Darío Xohán Cabana:
Paula Carballeira: “Quixen darlles voz aos personaxes dos contos, aos que normalmente non escoitamos”
Entrevista
de Montse Dopico a Paula Carballeira en Praza:
“(…) – Praza (P): Hai quen escolle os camiños máis longos revisa contos clásicos universais. Ou non sei se chamarlles tradicionais… Non es a primeira persoa que fai isto pero, como xorde este libro?
– Paula Carballeira (PC): Pois a verdade é que a primeira idea que xurdiu foi a do bosque. E si, podemos chamarlles contos tradicionais porque son contos da tradición indoeuropea. Son tradición no sentido de que son transmitidos tradicionalmente por distintas culturas. Non son só contos europeos. Están baseados en estereotipos, personaxes que simbolizan unha serie de aspectos: a nena que se perde no bosque, a nena que queda durmida moitos anos, a que se refuxia no bosque… Os mesmos estereotipos repítense en moitos lugares.
O que eu quixen foi partir do punto de vista do personaxe, e non da voz narradora, que é a que nos conta normalmente os contos. E facer isto permíteme reflexionar sobre unha serie de cuestións, coma os papeis femininos nos contos. Trátase, así, de darlle voz no conto aos personaxes aos que normalmente non escoitamos: a voz do lobo, a voz da bruxa…
– P: O título do libro está explicado ao principio: os nenos e nenas prefiren o camiño longo, e non o curto, o atallo que buscan os adultos para non “perder o tempo”. Ao final do libro tamén se di que o camiño longo implica, ás veces, perigos. Pero tamén liberdade. Vida, supoño. Que ten que ver todo isto coa idea do bosque?
– PC: A idea do bosque é, entre outras cousas, unha maneira de reivindicar a liberdade de escoller. Dinnos que se vamos por certos sitios estamos a meternos no perigo, e o que eu reivindico é a liberdade de escoller, de dispoñer do noso espazo, do noso tempo… Ademais, o bosque representa tamén os lugares aos que non prestamos moita atención ata que, por exemplo, se incendian. O bosque pode representar moitas cousas: o perigo, pero tamén o refuxio, a propia natureza…
Despois, en cada parte do libro, o bosque simboliza algo distinto. En ‘O da nena coa carapuchiña vermella’ o bosque é o camiño, e o que lle importa á nena é o camiño e non tanto chegar ao seu destino. En ‘O da nena de pel branca coma a neve’ (Brancaneves) o bosque é refuxio, e en ‘O da nena que durmiu 100 anos’ é protección. En ‘O da nena que atopou a bruxa da casa de chocolate’ (Hänsel e Gretel) o bosque é a casa da bruxa. E neste libro teñen bastante presenza as bruxas, mulleres conectadas coa natureza, co pasado e coa sabedoría… (…)”
A Coruña: sesión de sinaturas de O puño e a letra, de Yolanda Castaño
Compostela: Club de lectura feminista A Lila + A Sega, Maternidade fóra de catálogo, de Marga Tojo
Crónica videográfica da III Xornada de Literatura Dramática (II)
A III Xornada da Sección de Literatura Dramática. A palabra teatral nas aulas, actividade organizada pola AELG coa colaboración da Asociación Sócio-Pedagóxica Galega, co patrocinio do Concello da Coruña, Deputación Provincial da Coruña e CEDRO, e a colaboración da Universidade da Coruña, tivo lugar o 24 de novembro de 2018 Espazo Normal da Coruña.
Aquí pode verse a crónica videográfica completa, da que publicamos hoxe estes vídeos:
– Mesa redonda. O teatro nas aulas (primeira parte). Con Rosalía Fernández Rial, Raquel Castro e Fran Godón:
– Mesa redonda. O teatro nas aulas (segunda parte). Con Rosalía Fernández Rial, Raquel Castro e Fran Godón:
– Mesa redonda. A literatura dramática galega nas primeiras décadas do século XXI (primeira parte). Con Afonso Becerra de Becerreá, Eva F. Ferreira e AveLina Pérez:
– Mesa redonda. A literatura dramática galega nas primeiras décadas do século XXI (segunda parte). Con Afonso Becerra de Becerreá, Eva F. Ferreira e AveLina Pérez:
Vigo: Ledicia Costas e Emma Pedreira na Libraría Cartabón
O
4 
de xaneiro, na Libraría Cartabón (Rúa Urzaiz, 125), en Vigo, terá lugar un serán literario cos seguintes actos:
Ás 17:30 horas Ledicia Costas asinará exemplares das súas obras.
Ás 20:30 horas terá lugar a presentación de Besta do seu sangue, de Emma Pedreira, Premio Xerais de Novela 2018. A autora estará acompañada de Marga do Val e Fran Alonso.
A Rede Galega de Teatros e Auditorios inicia a súa nova programación con 349 funcións e unha decena de estreas ata xuño
Desde
Agadic:
“A Rede Galega de Teatros e Auditorios (RGTA) retoma a súa programación a partir de mañá co arranque da súa primeira carteleira semestral de 2019, que lle ofrecerá ao público 349 citas co teatro, a danza, a música, a maxia e o circo en 40 escenarios. Entre elas, as estreas absolutas das novas propostas das compañías galegas Colectivo Verticalia, Estudo Momento, Malasombra Producións, Licenciada Sotelo, Os Monicreques de Kukas, Os Náufragos, Producións Teatrais Excéntricas, Redrum Producciones e Talía Teatro.
A Consellería de Cultura e Turismo, a través da Axencia Galega das Industrias Culturais (Agadic), coordina o funcionamento deste circuíto de espectáculo en colaboración coas entidades locais que contan con espazos asociados, ás que tamén se lles achega asesoramento técnico para apoiar o óptimo desenvolvemento das súas respectivas programacións. O orzamento para este primeiro semestre do ano é de preto de 919.000 euros, destinados a financiar as actuacións das 115 formacións artísticas contratadas, das que máis do 90% son galegas.
Novidades sobre as táboas
Malasombra Producións será a encargada de abrir a carteleira de 2019 con Os fabulosos Cleaners, espectáculo de pompas de xabón para público familiar que porá en escena mañá venres, ás 19,00 h., no Centro Cívico Cultural de Arteixo. Ao tempo, a compañía está a iniciar os ensaios da súa próxima produción, Bernarda, que estreará o 1 de febreiro no Pazo da Cultura de Narón, tamén dentro da programación da RGTA. José Prieto dirixe esta montaxe, protagonizada por Luisa Merelas, Celia González e Esther Aja, que traslada o punto de inicio de La casa de Bernarda Alba a unha aldea de Galicia nun cambio de terzo respecto das anteriores propostas de Malasombra.
Pero a primeira das estreas da Rede Galega de Teatros e Auditorios chegará xa este mes de xaneiro da man de Estudo Momento e Macbeth. O ruído e a furia, que representará o día 25 no Teatro Rosalía Castro da Coruña.
En febreiro, ademais da Bernarda de Malasombra, terán lugar outras tres estreas no seo do circuíto da Xunta. Serán as de Licenciada Sotelo, co espectáculo de danza A gala, o día 14 no Auditorio Municipal de Ourense; Talía Teatro, con Vida de cans, o día 22 no Pazo da Cultura de Narón; e Producións Teatrais Excéntricas con Carpe Diem, o día 27 no Teatro Principal de Santiago.
A RGTA acollerá tamén a primeira representación doutra montaxe de danza: Alma (non é hippie), que o Colectivo Verticalia –integrado por Traspediente e Duelirium– escenificará o 1 de marzo no Teatro Rosalía da Coruña. Neste mesmo escenario, Os Náufragos estreará Karelu o 13 de abril, mentres que no Principal de Santiago comezará o percorrido de Redrum Producións, con Idiota, e Os Monicreques de Kukas, con Arlequina, os días 6 e 28 de marzo, respectivamente.”
