Arquivo da categoría: Premios poesía: ditames

Acta do xurado do I Concurso de Poesía Centro Recreativo de Artes

Publicado o por

“Cando son as 18 horas do día 3 de xuño de 2014, reúnese no Centro Recreativo de Artes o xurado do I Concurso de Poesía Centro Recreativo de Artes, formado por: don Manuel Cartea Gómez, dona Alicia Padín Otero e don Antonio Piñeiro Fernández, actuando como secretario don José Antonio Otero Sobrido coa única intención de emitir o veredicto deste concurso, e deciden de común acordo os seguintes puntos.

1º- O xurado valorou a cantidade e diversidade de obras presentadas, con estilos diferentes nas diversas categorías contempladas nas bases do concurso e agradece a participación de todos os autores e autoras, así como a organización deste concurso, xa que contribúe a dinamizar e potenciar a literatura e a lingua galega.

2º- Logo de lidas todas as obras presentadas neste concurso, co necesario consenso do xurado, as obras que se determinan premiadas son as seguintes nas distintas categorías:
– 1ª Categoría: autores de 9 a 11 anos.
Primeiro Premio: A noite.
Segundo Premio: A miña vida.
Terceiro Premio: A cegoña.
Abertas as plicas o nome dos autores resultou ser:
1º: Abel Sanlés Rivas.
2º: Miriam Pérez Pérez.
3º: Lucía Oujo Santos.
– 2ª Categoría: autores de 12 a 14 anos.
Primeiro Premio: Verbas sen son.
Segundo Premio: Cando chega a primavera.
Terceiro Premio: A liberdade esquecida.
Abertas as plicas o nome dos autores resultou ser:
1º: Pablo Pardavila Romero.
2º: Noelia Santiago Durán.
3º: Clara Romano Vilar.
– 3ª Categoría: autores de 15 a 17 anos.
Primeiro Premio: Oposicións para poeta.
Segundo Premio: Deserto.
Terceiro Premio: Deserto.
Abertas as plicas o nome dos autores resultou ser:
1º: Sabela Rodríguez Reino.
2º:
3º:
– 4ª Categoría: autores de 18 anos en diante.
Primeiro Premio: O pracer.
Segundo Premio: Diario de fotogramas.
Terceiro Premio: Inventario do devezo.
Abertas as plicas o nome dos autores resultou ser:
1º: Gonzalo Hermo González.
2º: Eli Ríos.
3º: Alicia Fernández Rodríguez.

3º- O principal criterio polo que foron seleccionadas as obras citadas é o seu alto nivel literario, o que contribuíu a un intenso debate ata decidir as gañadoras.
O xurado quere valorar expresamente na 1ª e 2ª categorías a alta participación do Colexio Bayón e a boa calidade da expresión dos seus participantes.
Na 3ª categoría o xurado considera que se trata dunha obra de gran calidade, e confía en que esta escritora, aínda nova, continúe o seu traballo para poder seguir lendo a súa poesía ao longo dos anos.
En canto ás obras da 4ª categoría quere o xurado facer constar as seguintes razón para premialas:
3º Premio: Inventario do devezo.
Pola orixinalidade da proposta, conectada con tendencias poéticas que o autor coñece e deixa acaer. Engade unha innovadora riqueza poética co emprego dos sons, imaxes fonéticas e mesmo o uso de termos estranxeiros, formais e non formais, ofrecendo unha sensación de conversa entre culturas a través dun diálogo entre corpos.
2º Premio: Diario de fotogramas.
Pola entoación do ser (o poético e o persoal) no seu contorno. Pola delicadeza descritiva á vez que autoafirmativa, que se acompaña en ocasións dunha intencionalidade comprensiva, máis propiamente celebradora.. Achega un punto de chamada ás raíces, aos berces paisaxísticos, aos protagonismos transcorridos e aos desexos de que perduren.
1º Premio: O pracer.
Polo dominio do oficio en todos os seus aspectos, pola súa fluidez poética. Ofrece unha lectura alén do tema (a sensualidade no cotián). Polo contido sutilmente insinuante clásico poético. Achega unha sensación de frescura que o xurado quere distinguir das outras dúas obras premiadas tras un intenso e argumentado debate.

4º- A decisión do xurado comunicarase no día de mañá, se é posible, aos autores e ás autoras galardoados solicitándolles que garden o segredo ata o momento de facelo público.

5º- A entrega pública do premio ás persoas galardoadas terá lugar o vindeiro sábado 28 de xuño no Centro Recreativo de Artes. Neste mesmo acto daránselles a coñecer aos medios de comunicación e á cidadanía os título das obras e autores premiados.

Sen máis asuntos que tratar, asinan cada un dos membros que forman o Xurado do 1 Concurso de Poesía Centro Recreativo de Artes, estendéndose a presente acta da que eu, como secretario certifico.

Asdo. Manuel Cartea Gómez

Asdo. Alicia Padín Otero

Asdo. Antonio Piñeiro Fernández

O Secretario
Asdo. José Antonio Otero Sobrido”

Carlos Penela gaña o XVII Premio de Poesía Miguel González Garcés, sendo designado Baldo Ramos como finalista

Publicado o por

Carlos Penela, vigués do ano 1975, é o gañador da XVII edición do Premio de poesía Miguel González Garcés que convoca a Deputación da Coruña.
Así o decidiu o xurado, reunido o xoves 19 de xuño na sede da institución provincial, tras valorar “o rigor na elobración do conxunto, a súa capacidade de reflexión metapoética e de aprehensión do mundo pola linguaxe, con moi suxestivas referencias culturais da tradición europea”.
O gañador, que se presentou ao certame cun poemario titulado Arte de fuga, é licenciado en Filoloxía portuguesa pola USC e actualmente vive en Viena. Ademais de escribir, dedícase tamén á tradución e á docencia.
Entre o seu currículo destacan o Premio Espiral Maior de Poesía en 1997, o Premio Eusebio Lorenzo Baleirón no ano 2000 ou o accésit do Premio Esquío de poesía no 2004. Ademais, no ano 2007 gañou o Premio de poesía Caixanova coa obra Sombras, rosas, sombras.
Agora, como gañador do Miguel González Garcés, recibirá 6.500 euros e a edición da obra.

Os membros do xurado decidiron tamén designar como finalista ao poeta e artista plástico de Celanova Baldomero Fernández Ramos, coñecido como Baldo Ramos, pola obra Amado estranxeiro. Este último será recoñecido coa edición dunha obra que, segundo reflexa a acta de concesión do premio, destaca “pola súa capacidade de sorpresa no uso da imaxe, pola perspectiva equilibradamente visionaria e o seu sentido rítimico”.
O xurado do premio de poesía que convoca a Deputación estivo presidido por Mariel Padín, vicepresidenta primeira da institución e responsable da área de Cultura, e comisariado por Xavier Seoane. Tomaron parte tamén nas deliberacións Xosé María Álvarez Cáccamo, Ramón Neto, Henrique Rabuñal, Manuel Forcadela e Alexandre Nerium.

Xavier Rodríguez Baixeras, Premio Cidade de Ourense con A luz extinta

Publicado o por

Desde Sermos Galiza:
“A luz extinta é o título do libro que lle valeu ao escritor Xavier Rodríguez Baixeras a trixésima edición do Premio de Poesía Cidade de Ourense. Un xurado composto por Amadeu Baptista, Irene Veiga Durán, Miguel A. Fernán Vello e Millán Picouto destacou a “precisión formal na construción do poema” que mantén unha “tensión elexíaca” e leva a “lingua a unha decantación extrema”. Rodríguez Baixeras constrúe un novo libro arredor da memoria e a experiencia vital, “un discurso lírico que procura en todo momento a emoción do lector”, dixo. (…)”

Fallo do II Certame de Poesía en Lingua Galega Manuel María

Publicado o por

“Hoxe, 24 de maio, na Casa Galicia en Gipuzkoa fíxose público o fallo do II Certame de poesía en lingua galega Manuel María. O xurado composto por Xosé Estévez, Paulo Lema, Rocío Dourado e Miriam López como secretaria sen voz nen voto acordaron que os premiados foran os seguintes:

1º premio: Cruz Martínez Vilas (Vigo). Obra: O lánguido ocaso dunha dalia.
2º premio: Pura Tejelo (A Coruña). Obra: Éramos deuses entre a herba seca de agosto.
3º premio: Tito Pérez Pérez (A Coruña). Obra: Despece.

Eli Ríos gaña o XVIII Certame Francisco Añón de poesía

Publicado o por

Oriana Méndez gaña o XVII Certame de Poesía Concello de Carral

Publicado o por

“Oriana Méndez, coa súa obra O que precede a caída é branco resultou gañadora do XVII Certame de Poesía Concello de Carral.
O xurado escolleu esta obra pola unidade de contido e forma, na qua se detecta que foi concibida como un todo, tendendo fíos entre a macroestrutura e os versos. O libro conta cunha linguaxe moi coidada e suxestiva prestando especial atención ao feche dos poemas. A autora crea un espazo lírico cheo de luz e establece numerosos xogos metaliterarios con diferentes escollas plásticas e artísticas. Así mesmo debemos destacar o traballo de tensión-distensión poética e o ritmo.
O xurado estivo formado por Dores Tembrás, Olga Patiño Nogueira e Eli Ríos, baixo a presidencia da Concelleira de Cultura, Isabel López Pérez, e asistidos en calidade de secretario, polo técnico municipal de Cultura e coordinador do premio, Carlos Lorenzo Pérez. Ao certame presentáronse un total de 36 libros. O premio de Carral está dotado con 2000 euros e a publicación da obra.
O acto de entrega do premio terá lugar o 30 de maio, na Casa da Cultura de Carral, dentro da programación de Letras Galegas 2014. O mesmo acto servirá para a presentación do poemario que gañou na pasada edición, Cronoloxía da urxencia, de Dores Tembrás. Para a publicación do libro o Concello de Carral contou coa colaboración económica da Secretaría Xeral de Política Lingüística e da Secretaría Xeral de Cultura da Xunta de Galicia.”

Marcos Abalde gaña o XIV Premio de Poesía Fiz Vergara Vilariño, con Oenach

Publicado o por

“En Sarria a 10 de maio de 2014.
Reuniuse o xuri do XIV Premio de Poesía Fiz Vergara Vilariño, composto por Cristina Ferreiro, Xavier Rodríguez Baixeras e Miguel Mato Fondo, actuando con voz e sen voto como Presidente o Concelleiro de Cultura de Sarria, Francisco Pérez e como Secretaria a Presidenta de Ergueitos, María Casar.
Logo dunha intensa deliberación motivada pola cantidade e calidade dos poemarios presentados, o ditame final realizouse sobre dúas obras. A que acordamos por unanimidade é a gañadora desta edición do Fiz Vergara Vilariño, presentada baixo o lema Oenach e seudónimo Humus é a presentada baixo o lema Chegaron os xinetes das primeiras xeadas, da que aconsellamos a súa publicación.
Na obra gañadora, Oenach, destacamos a súa boa construción e alento poético, as recurrencias míticas e a denuncia da ignominia: Ceuta, Lampedusa, Tijuana, Guernika, San Simón… Hai neste libro unha feliz adaptación dun mito clásico á realidade histórica e social galega. Hai poesía e hai terra.
Aberta a plica en acto público ás 13:30 horas a obra presentada baixo o lema Oenach resultou ser da autoría de Marcos Abalde Covelo.”

Carmen Caramés gaña o XVII Premio de Poesía Johán Carballeira

Publicado o por

Desde o Concello de Bueu:
“O sábado 3 de maio de 2014, ás 11:30 horas, reúnese o xurado do XVII Premio de Poesía Johán Carballeira, constituído por Marta Dacosta Alonso, Miriam Ferradáns Ferradás e Alberte Momán Noval. Tras o pertinente debate resolveu declarar gañador por unanimidade o traballo Dos días escuros de Mª Carmen Caramés Gorgal.
O xurado destacou a capacidade para retratar unha situación tan difícil como a dos malos tratos e que isto se faga cunha linguaxe poética tan acertada, mediante a utilización de imaxes moi potentes e un ton que engancha á lectora e ao lector e fai devecer pola lectura da páxina seguinte. Cabe destacar tamén a unidade do conxunto e a capacidade de secuenciación creando un itinerario que vai adquirindo intensidade até acadar o punto final que nos conduce directamente á realidade.”

Cesáreo Sánchez Iglesias e Antón Cortizas, premios Losada Diéguez

Publicado o por

Desde Sermos Galiza:
“Por unanimidade, Caderno do Nilo (Xerais), de Cesáreo Sánchez Iglesias, resultou gañador da XXIX edición do premio Antón Losada Diéguez na categoría de Creación Literaria que recoñece unha obra publicada no ano anterior. A viaxe literaria de Cesáreo Sánchez no territorio do Nilo foi valorada por un xurado que destacou a súa madurez e as novas achegas no ámbito estilístico e de revisión das propias experiencias, cunha voz singular que goza xa dunha sólida traxectoria no ámbito da poesía. (…)
“Só é posíbel escribir este libro e entrar con nudez e humildade noutra cultura se un percorreu xa a propia, se ten os alicerces fondamente chantados na propia cultura. Só así se abrirá o camiño para ir tamén á propia soidade. Finalmente, é aí onde conduce toda viaxe, ao centro da propia soidade”, explica Cesáreo Sánchez Iglesias no seu libro. Para Sánchez Iglesias a poesía é a súa forma de comunicarse “co mundo, unha forma de coñecemento. Pola poesía podes chegar á alma das cousas, ás capas máis fondas do que ves e sentes. Para min é a maneira de entrar no profundo do ser humano. A comunicación que se establece cos que len dáse nun territorio interior.” (…)
Na modalidade de Investigación e Ensaio, a obra gañadora foi Tastarabás. Enciclopedia de brinquedos tradicionais, un catálogo explicativo dos xoguetes que constitúen un patrimonio único herdado de xeración en xeracións que elaborou o escritor Antón Cortizas despois de anos de traballo e estudo. O xurado, composto por membros da Universidade da Coruña e Vigo, do Consello da Cultura Galega, do Museo do Pobo Galego e da Deputación de Ourense destacou a rigurosidade e o traballo polo miúdo na recompilación, reconstrución e conservación dun patrimonio cultural único de grande valor para as xeracións vindeiras.
Tastarabás recolle arredor de mil brinquedos recompilados ao longo de dez anos que deron nunha obra monumental na que se atesoura o patrimonio da infancia doutros tempos. O autor, Antón Cortizas, define o libro como unha grande ludoteca tradicional ou mesmo un museo de brinquedos, boa parte deles reconstruídos por el mesmo. Cortizas defende o seu libro como un proxecto colectivo no que recoñece o labor de centos de informantes que contribuíron a súa elaboración e tamén de escritores e escritoras que manifestan “señardade pola infancia e son, a súa maneira, tamén fontes de información”. (…)
Os premios, que foron creados en 1985, entregaranse o 14 de xuño no Pazo de Moldes, en Boborás e, alén do recoñecemento, están dotados con 6.000 euros por categoría.”

Anxos Sumai e Berta Dávila, Premios da Crítica en narrativa e poesía

Publicado o por

Desde Sermos Galiza:
“Os Premios da Crítica, que cada ano outorgan a Asociación Española de Críticos Literarios veñen de recoñecer os nomes de autores e autoras gañadoras da nova edición que, no caso da lingua galega recaeron en dúas mulleres, Berta Dávila e Anxos Sumai.
Co Premio da Crítica, Berta Dávila súmalle ao seu libro de poesía Raíz de fenda un novo galardón, despois de ter recibido xa o Johán Carballeira. A autora que o pasado ano publicou tamén a novela O derradeiro libro de Emma Olsen (Galaxia) e o álbum infantil A fuxida (Biblos) recibiu tamén o premio á mellor autora do ano nos Ánxel Casal da Asociación Galega de Editores. Raíz de fenda é tamén candidata a mellor libro de poesía nos premios da Asociación de Escritores e Escritoras en Lingua Galega. O libro de Dávila conseguiu ademais a singular marca de ter esgotado a primeira edición en só un mes. “Non sei se mudei ou se o libro me mudou a min porque se deu tamén un cambio na maneira de afrontar a escrita. Que trate temas importantes para min como perdas ou ausencias fixo que desbotase máscaras, trampas ou artificios que usaba para escribir. Tratei de escribir este libro quitando en lugar de poñendo, limpando o que sobraba, o que estaba de máis, esas ferramentas da que se bota man polo seu efecto e non pola súa pertinencia. Estimaba que tiña que facer un texto honesto, directo e limpo. Ese escribir non coma quen lanza unha pedra senón coma quen a lima é o intento que fixen e nese sentido supón unha grande mudanza”, ten explicado do seu libro.
Pola súa parte, a Anxos Sumai, a novela A lúa da colleita déralle xa a alegría do premio García Barros ao que agora se engade o da Crítica como mellor obra de narrativa galega que se deu a coñecer en Logroño. A novela de Sumai é tamén finalista aos premios da AELG que se entregarán o vindeiro 3 de maio. No seu novo título, a escritora situouse, como xa ten feito en repetidas ocasións na súa traxectoria literaria, na fronteira. “No inicio foi nos límites da realidade e a ficción, logo na propia familia e agora na percepción, cando o propio corpo crea limitacións ou aperturas á vida. Aí está o xogo, a evolución, explorando no mesmo territorio” sinalou Anxos Sumai cando recibiu a noticia do García Barros, á maneira de presentación da novela, unha obra na que autora afronta unha “forma de narrar máis descritiva, máis pausada e reflexiva, recreándose nos detalles e na importancia da literatura como evocación”.”

Reproducimos aquí o texto de Olivia Rodríguez:

“A AECL, da que fai parte a Sección de Crítica Literaria da AELG, deu a coñecer os Premios da Crítica 2014, resultando gañadoras as autoras:

Narrativa
A lúa da colleita, de Anxos Sumai, Galaxia, Vigo, Editorial Galaxia, 2013.
Trátase dunha novela curta, de personaxes, na que os espazos -un horroroso edificio de apartamentos ao bordo dun cantil desde o que se abre a Ría de Arousa, e un estudo de pintor nos arrabaldes de Madrid- personifícanse e cobran significados simbólicos. A protagonista volve a un lugar do seu pasado de adolescente nos anos 70, para separarse de si mesma e refacerse xuntando os anacos rotos, vinte anos despois. O lector vai descubrindo aos poucos, a través de episodios sinistros e soños enigmáticos, que o tema da novela é o da tolemia, diseccionada artisticamente na súa dobre vertente de sufrimento e dereito a vivir á marxe da lóxica. A narración deixa un rastro poderoso de sensacións físicas: o olor, a luz, o movemento dos paxaros e o mar; á vez que acrecenta un inesgotábel buraco negro, do que xorden todos os medos.

Poesía
Raíz da fenda, de Berta Dávila, Edicións Xerais de Galicia, Vigo, 2013.
Poemario que dota dunha renovada linguaxe temas recorrentes na poesía galega actual, como a orixe, a casa, a identidade. Con aparente sinxeleza exprésanse a través da corporeización experiencias de dor psíquica representadas por gretas ou fisuras: a familia non escollida, a morte de quen amamos, o desamor e a reconstrución do eu… A creación poética nace do desexo de pechar esas fisuras. A autora ten habilidade para ir en busca da “palabra xusta”, e sorprender cos seus mil significados, en capas superpostas, profundando nelas.”