A
Consellería de Cultura, Educación e Ordenación Universitaria celebra no Gaiás o Día das Letras Galegas cun recital poético-musical organizado polo Centro PEN Galicia para homenaxear ao poeta lucense Xosé María Díaz Castro no ano no que se conmemora o centenario do seu nacemento.
O evento Díaz Castro, perdido no traxecto e salvado por un anxo, terá lugar na Biblioteca de Galicia na véspera do Día das Letras, o venres 16 de maio, a partir das 19:00 horas. O escritor Armando Requeixo será o encargado de introducirnos na figura do autor de Nimbos, na súa obsesión pola perfección e a súa preocupación por Galicia e polos problemas do ser humano: a vida, a morte, o tempo. Tras el, Alba Cid, Luís González Tosar e Salvador García-Bodaño celebrarán a Díaz Castro a través dun recital poético. Marta Quintana e Cuchús Pimentel porán a nota musical do acto.
Arquivos da etiqueta: Alba Cid
Vigo: Homenaxe a Xela Arias, o martes 11 de marzo
Á procura dos trazos que nos describan
Con 
este verso de Xela Arias nomeamos a homenaxe que a AELG lle quere render á autora en marzo deste ano 2014. Un verso que na súa expresión sintetiza toda unha declaración de intencións, pois é o noso cometido -como organización que representa as escritoras e os escritores galegos- recoller, profundar e transmitir os trazos que nos describen. Trazos ou a obra das escritoras e os escritores que constrúen esta casa de noso que é a literatura galega.
Homenaxear a Xela Arias é testemuñar que se tratou dunha autora singular para o seu tempo. É render homenaxe a unha voz única e a unha muller para quen a literatura foi un modo de vida. Unha muller que sentía e amaba a súa lingua, a terra e o pobo que creou esa lingua.
É o momento de lembrar a Xela, unha década despois do seu pasamento, na cidade en que viviu, nas voces que darán a dimensión extensa da súa personalidade, activa e curiosa, polifacética, que sumou poesía e música e plástica e creou arte. Xela poeta, tradutora, editora, docente… Xela comprometida alzando a súa voz contra a catástrofe do Prestige ou describindo a dor das desherdadas ou o amor das nais.
É o momento de facer memoria, lembrar os seus versos e transmitir ese herdo inmenso que é a súa obra. Sumando trazos que nos describen.
No acto poético-musical participarán:
– Manuel Bragado e Fran Alonso, director e subdirector de Edicións Xerais.
– María Xesús Nogueira, editora da obra de Xela Arias.
– Antía Otero e Marta Dacosta, poetas.
– Pilar Carro, promotora do certame poético Xela Arias do IES A Sangriña.
– Alba Cid, poeta premiada no certame Xela Arias.
– Virginia Barros, Directora do IES Álvaro Cunqueiro.
– Eduardo Estévez, tradutor de Xela para o español.
– Avelino González, actor.
– Ana Iglesias, escritora.
– Mercedes Queixas, en nome da AELG.
Darase lectura tamén ao texto escollido pola escritora María do Carme Kruckenberg.
A parte musical estará a cargo de:
– O grupo Xardín desordenado.
– O clarinetista Fernando Abreu acompañado da voz de Iolanda Zúñiga.
Contaremos tamén coa presenza da familia de Xela Arias, representada por Darío, fillo, e Xoán Arias, irmán.
A AELG convida a todas e todos a acudir a este acto de memoria.
Compostela: recital no marco do obradoiro de creación literaria a cargo da escritora Alicia Fernández
O
sábado 23 de novembro, ás 12:00 horas, na Sala de Didáctica da Fundación-Museo Eugenio Granell de Santiago de Compostela, terá lugar un recital poético aberto ao público, no marco do obradoiro Da memoria ao poema, organizado pola Asociación de Escritoras e Escritores en Lingua Galega, co patrocinio da Concellaría de Normalización Lingüística do Concello de Santiago de Compostela, impartido por Alicia Fernández, e no que xa contou coa visita do escritor Antón Lopo.
Neste recital aberto ao público, participarán alumnos do obradoiro de creación literaria. Intervirán tamén neste recital: Antía Otero, Xiana Arias, Mario Regueira, O Leo i Arremecághona, Gonzalo Hermo, Berta Dávila, Alba Cid, Agustín Delicias, Ismael Ramos, Jesús Castro, Naïr García Abelleira e Xesús Estalote.
Gañadores dos Premios Xuventude Crea 2013
A
Consellería de Traballo e Benestar, a través da Dirección Xeral de Xuventude e Voluntariado deu a coñecer as persoas premiadas nos Premios Xuventude Crea 2013.
POESÍA:
1º premio (compartido)
– Alba Cid Fernández, coa obra O corpo e as bestas.
– Olalla Tuñas Martínez, coa obra Cidade libre.
2º premio (compartido)
– Tito Pérez Pérez, coa obra Cardiograma de silencios opacos.
– Brais Lamela Gómez, coa obra Casa tomada.
3º premio (compartido)
– Rafael Lobelle González, coa obra Deus Fratesque Gallaecia. Tríptico aberto.
– Mónica Sánchez Rodríguez, coa obra Alimento poeta branco.
RELATO:
1º premio
– Esther Gómez López, coa obra Area na boca.
2º premio (compartido)
– Elena Dopico López, coa obra Incontable.
– Nerea Pallares Vilar, coa obra Cork e as burbullas.
3º premio (compartido)
– Iago Fernández Pérez, coa obra 1100 quilómetros (por expreso desexo do gañador, renuncia ao premio).
– Francisco Lorenzo Parada, coa obra A muller dos meus soños.
Mencións de honra
– Ana María Rodríguez González, coa obra Vinca.
– Tito Pérez Pérez, coa obra No contorno da sombra.
TEATRO:
1º premio
– Asociación Cultural A Panadaría, coa obra Bang, bang, bang.
2º premio
– Asociación Cultural Pinchacarneiro Teatro, coa obra Proxecto 45.
3º premio
– Asociación Cultural Tolemia Teatro, coa obra Soños dun sedutor.
Os xurados dos premios estiveron formados por:
POESÍA
Presidenta: Yolanda Otero Balsa.
Vogais: Guadalupe Gómez Arto, Xosé Luna Sanmartín; Luis González Tosar; Víctor Manuel Furelos Guillén.
Secretaria: Pilar Tamerón Montesinos.
RELATOS
Presidenta: Yolanda Otero Balsa.
Vogais: Henrique Alvarellos Casas, Anxos Sumai, Francisco Castro Veloso, Mario Caneiro Ameneiros.
Secretaria: Ana Martínez González.
TEATRO
Presidenta: Yolanda Otero Balsa.
Vogais: Manuel Guede Oliva, Inma López Silva, María Mera Constenla, Camilo Franco Iglesias, Artur Trillo Sendón.
Secretaria: Ángela Fernández Rey.
Santiago: recital colectivo Ollando fóra
A Casa das Crechas (Vía Sacra, 3), en Santiago de Compostela, organiza dúas sesións de recitais Ollando fóra. Poesía galega para galeg*s de adopción, a partir das 20:00 horas.
– O martes 9 de xullo participan Branca Novoneyra, Olalla Cociña, Antía Otero, Lorena Souto, Mario Regueira, Ismael Ramos, Estevo Creus e Lucía Novas.
– O mércores 10 de xullo participan, na segunda sesión, Naír García Abelleira, Chus Pato, Francisco Cortegoso, Antón Lopo, Agustín Delicias, Alicia Fernández, María do Cebreiro, Alba Cid e Andrea Nunes.
Carballo: festival Vitaminas para o galego, con entrega do Premio a artigos xornalísticos normalizadores a Carlos Callón
O 
mércores 16 de maio, ás 21:00 horas, no Pazo da Cultura de Carballo, dentro da programación do Mes das Letras do Concello de Carballo, terá lugar o festival Vitaminas para o galego. A entrada é libre e gratuíta e o acto tamén serve de marco para entregar o Premio a artigos xornalísticos normalizadores, que recaeu en Carlos Callón por Fai o teu galego e que tamén supuxo un accésit para Alba Cid. A cita será presentada pola actriz, escritora e contacontos, Xograresa de Outono, Paula Carballeira; e contará coa actuación en acústico de Sés, grupo formado por María Xosé Silvar e o guitarrista Tito Calviño.
Ourense: recital poético do PEN Clube polo Día Mundial da Poesía
O mércores 21 de marzo, ás 19:00 horas, no Centro Cultural da Deputación de Ourense, terá lugar a tradicional celebración do Día Mundial da Poesía que organiza o Pen Clube de Galicia. No acto intervirán o Conselleiro de Cultura e Educación, Jesús Vázquez Abad, o Presidente da Deputación de Ourense, José Manuel Baltar, o presidente da Real Academia Galega, Xosé Luís Méndez Ferrín e Luís González Tosar, o presidente do Centro PEN Galicia. O acto contará coa lectura de poemas de Alba Cid e Celia Parra coa actuación musical de Miriam Figueiras e Marco Foxo.
