Arquivo da categoría: Asociación de Escritoras e Escritores en Lingua Galega

Oitenta títulos na primeira selección de obras para os premios Follas Novas do Libro Galego

Publicado o por

Os premios Follas Novas do Libro Galego, organizados conxuntamente pola Asociación de Escritoras e Escritoras en Lingua Galega (AELG), a Asociación Galega de Editoras (AGE) e a Federación de Librarías de Galicia (FLG), finalizou a primeira fase de selección de candidaturas sobre os títulos publicados durante 2022. Os premios resolveranse na gala de entrega que terá lugar no vindeiro mes de abril. En total, oitenta títulos forman parte desta primeira selección, como un espello do bo momento creativo do sector do libro galego.

Nesta primeira fase dos premios, a selección foi realizada polos asociados e asociadas dos tres colectivos organizadores para que, desde agora, un xurado formado con persoas de recoñecido prestixio procedentes do sector do libro escollerá as finalistas e as gañadoras en cada unha das trece candidaturas destes galardóns que repasan a actividade literaria e editorial do ano 2022.

Unha vez finalizada esta primeira fase de selección, a mediados do mes de marzo daranse a coñecer as tres finalistas en cada unha das categorías. O 22 de abril, no Teatro Principal de Santiago de Compostela, terá lugar a gala na que se darán a coñecer as gañadoras desta edición. Estes premios, que valoran e recoñecen o traballo de todos os sectores do mundo do libro, están organizados co patrocinio da Xunta de Galicia, o Concello de Santiago, a Deputación da Coruña e CEDRO (Centro Español de Dereitos Reprográficos).

PREMIO Á OBRA DE ENSAIO E INVESTIGACIÓN
A defunción dos sexos. Disidentes sexuais na Galiza contemporánea. Daniela Ferrández Pérez. Edicións Xerais de Galicia
A música das palabras. Darío Xohán Cabana. Edicións Xerais de Galicia
Maternidades virtuosas. Unha crítica aos modelos profesionais de crianza. María do Cebreiro. Editorial Galaxia
Mulleres imprescindibles, educadoras na vangarda do século XX. VV-AA. Kalandraka Editora
O libro negro da lingua galega. Carlos Callón. Edicións Xerais de Galicia
Querida liberdade. Vida e obra dun precursor do Rexurdimento. Antolín Faraldo. Con biografía de Xurxo Martínez. Alvarellos Editora

PREMIO Á OBRA DE DIVULGACIÓN
A nación dos mil viños. Martiño Santos Canosa / Xosé Gontá Sobrino (autores) e Toño Núñez Amigo-Rivadulla (ilustrador). Editorial Laiovento
Eu son Exeria. Lectura feminista dunha viaxe no século IV. Marisa Vidal Collazo. Editorial Galaxia
Facedores de imaxes. Fotografía e sociedade en Vigo. 1870-1915. Vítor Vaqueiro. Editorial Galaxia
Juana de Vega. A muller que desafiou o seu tempo. Marilar Aleixandre e Emma Pedreira. Editorial Galaxia
O libro negro da lingua galega. Carlos Callón. Edicións Xerais de Galicia
Quen son? Crías de animais. Australia. Tándem Seceda, Ester García. Kalandraka Editora
María Casares. Arancha Estévez. Aira Editorial
María Casares fronte ao espello. Sabela Hermida. Edicións Xerais de Galicia
Memoria diversa. Eva Mejuto. Deputación da Coruña

PREMIO Á OBRA DE NARRATIVA
A culpa. María Solar. Edicións Xerais de Galicia
Días de intemperie. Antón Riveiro Coello. Editorial Galaxia
Non penses nun elefante rosa. Antía Yáñez. Edicións Xerais de Galicia
Os seres queridos. Berta Dávila. Edicións Xerais de Galicia
O tradutor de sombras. Moncha Fuentes. Edicións Xerais de Galicia

PREMIO Á OBRA INFANTIL
Animalario de ler a diario. Eduard Velasco (autor), Nuria Díaz (ilustradora). Edicións Xerais de Galicia
O gran libro da nosa horta. Blanca Millán. Edicións do Cumio
O neno de lume. Ledicia Costas (autora), Iván R. (Ilustrador). Edicións Xerais de Galicia
Soños á beiramar. Rosa Estévez Gantes, Rafa Antón. Kalandraka Editora
Trece avisos. Contos para ler pola noite. Paula Carballeira (autora), Iria Fafián (Ilustradora). Edicións Xerais de Galicia

PREMIO Á OBRA XUVENIL
A ladroa da biblioteca de Meirás. Eva Mejuto. Edicións Xerais de Galicia
A lebre mecánica. Ledicia Costas. Edicións Xerais de Galicia
Curros & Holmes no misterio d’o kapital. Marcos Calveiro. Editorial Galaxia
No bico do vento. Charo Golmar e Olaya Naveira. Ediciones Bolanda
Que me pare o corazón se te esquezo. Andrea Maceiras. Edicións Xerais de Galicia
Sálice e Sándala. Xoán Babarro. Antela Editorial
Trece avisos. Contos para ler pola noite. Paula Carballeira (autora), Iria Fafián (Ilustradora). Edicións Xerais de Galicia
Un elefante na sala de estar. Berta Dávila. Edicións Xerais de Galicia

PREMIO AO LIBRO ILUSTRADO
Cando leo. Bea Gregores, (autora, Eva Mejuto). Edicións Xerais de Galicia
Criptografías. Pepe Cáccamo e Baldo Ramos. Alvarellos Editora
Os Winkle, máis finos ca un allo. Iván R. Edicións do Cumio
Saínza. A punkiereteira. Cristian F. Caruncho (autora, María Canosa). A Costureira Edicións
Verme Federico Fernández. Germán González. Kalandraka Editora
Violeta Parapluie e outras historias de xente pouco corrente. Ramón D. Veiga (autor), Iván R. (ilustrador) Edicións Embora

PREMIO AO LIBRO DE BANDA DESEÑADA, GRÁFICO E HUMOR
A estrambótica volta ao mundo en 80 días. Pinto & Chinto. Editorial Bululú
Miquits. Paula Cheshire, Alba de Evan e Xabier Domínguez. Antela Editorial
Miñoca e pega. Iván Raña, Ramón D. Veiga. Edicións Xerais de Galicia
Os Escachapedras. Marilar Aleixandre e Fran Bueno. Demo Editorial
Pequena historia de Vigo. Pedro Feijoó, Xosé Tomás. Edicións Embora
Roxín Roxal. A daga do conde. Manel Cráneo e Brais Fierro. Demo Editorial

PREMIO Á INICIATIVA BIBLIOGRÁFICA
Así fala Penélope (Unha antoloxía de xénero). VV. AA. Edición de Marta Dacosta. Chan da Pólvora Editora
Chévere 1987-2022. Trinta e cinco anos de axitación cultural. Chévere. Kalandraka Editora
Colección Rúa do Lagarto. Euseino? Editora
Colección Seica. Edicións Xerais de Galicia
Entre leiras e labores (antoloxía verbo-visual de autoras galegas). VV. AA. (Edición de Inma Doval Porto). Editora Urutau
Tac, tac, tac. Edicións Xerais de Galicia
Verdemar. Contos pola diversidade. VV. AA. Alvarellos Editora

PREMIO Á OBRA TRADUCIDA
A educación sentimental. Gustave Flaubert/ Traducido por Isabel Soto. Hugin e Munin
Carol. Patricia Highsmith / Traducido por María Alonso Seisdedos. Kalandraka Editorial
Conto ao carón do río. Amantegi Oihane/ Traducido por Isaac Xubín. Editorial Rodolfo e Priscila
Despois do diario de Anne Frank. Bas von Benda Beckmann/ Traducido por María Alonso Seisdedos, Antón Vialle. Kalandraka Editora
Diario do ano da peste. Daniel Defoe / Traducido por Xesús Fraga. Editorial Galaxia
Feminismo de peto. Bel Olid / Traducido por María Alonso Seisdedos. Edicións Embora
Léxico familiar. Natalia Ginzburg/ Traducido por María Alonso Seisdedos. Editorial Laiovento
O verán en que miña nai tivo os ollos verdes. Tatiana Țîbuleac / Traducido por Andreea Birsanu. Rinoceronte Editora
Siluetas na area. Isabelle Eberhardt/ Traducido por Fernando Domènech. Rinoceronte Editora

PREMIO AO LIBRO DE POESÍA
Barroco. Antía Otero. Apiario
Criptografías. Pepe Cáccamo e Baldo Ramos. Alvarellos Editora
Ex_céntricas. Anxela Lema, Sara Villar. Edicións e producións Fetiche
Materia. Yolanda Castaño. Edicións Xerais de Galicia
Montaña Ioga. Lupe Gómez. Edicións Espiral Maior
Tríptico Ártabro. Ánxeles Penas. Editorial Laiovento

PREMIO AO LIBRO DE TEATRO
As alumnas. Paula Carballeira. Editorial Galaxia
Chévere (1987-2022).Trinta e cinco anos de axitación cultural. Chévere. Kalandraka Editora
Donas de nós. Ánxela Gracián. Baía Edicións
Ese silencio. Avelina Pérez. Edicións Positivas
Estrela… fugaz? Carlos Labraña. Editorial Galaxia
Pandrama. Afonso Becerra de Becerreá. Edicións Laiovento
Planeta Bugallo. Raquel Castro. Editorial Galaxia

PREMIO AO LIBRO MELLOR EDITADO
A nación dos mil viños. Martiño Santos Canosa / Xosé Gontá Sobrino (autoría) e Toño Núñez Amigo-Rivadulla (ilustracións). Editorial Laiovento
As mulleres que cultivaban néboas. Bea Gregores. Edicións Xerais de Galicia
Até aquí podo contar. A Lingua da Illa de Ons. José Manuel Dopazo Entenza. Chan da Pólvora Editora
Barroco. Antía Otero. Apiario
Chévere (1987-2022), Trinta e cinco anos de axitación cultural. Chévere. Kalandraka Editora
Criptografías. Pepe Cáccamo e Baldo Ramos. Alvarellos Editora
Os cadernos escolares da II República. Miguel Paz Cabo e Víctor M. Santidrián Arias. Alvarellos Editora
Querida liberdade. Vida e obra dun precursor do Rexurdimento. Antolín Faraldo. Edición e estudo de Xurxo Martínez. Alvarellos Editora

PREMIO PROMOCIÓN DA LECTURA
Canle de Youtube de Neeumatiko
Campaña Municipal de animación á lectura do Concello de Santiago de Compostela
Libraría Cartabón
Ramón Rozas
Surfeando libros
Traballadoras das Bibliotecas Municipais da Coruña

A Asociación Galega de Editoras cumpre 40 anos con 45 empresas asociadas e co obxectivo de mellorar o mercado interior do libro galego e a promoción exterior

Publicado o por

Desde a Asociación Galega de Editoras:
“A Asociación Galega de Editoras conmemora os 40 anos desde a súa creación en 1983, coa renovación da súa imaxe corporativa a cargo do deseñador Pepe Barro e con varias accións que se desenvolverán ao longo deste ano, entre elas, un acto especial conmemorativo e unha publicación do libro Cen anos de edición moderna en Galicia, que recollerá as intervencións no último Simposio do Libro da Lectura, celebrado en Compostela en novembro de 2022.

OBXECTIVOS PARA 2023
Integrada actualmente por 45 empresas, dous obxectivos presidirán a actuación da AGE os vindeiros meses: no mercado interior, sumar forzas co resto de colectivos que integran a cadea do libro galego (principalmente a Federación de Librarías de Galicia e a Asociación de Escritoras e Escritores en Lingua Galega) co fin de superar a preocupante situación na que se atopa a lingua galega e incrementar ese 17% de cota actual de mercado de libro galego en Galicia. O segundo obxectivo é acadar os apoios necesarios, e útiles, para a proxección exterior da nosa edición, tan necesitada de traspasar fronteiras, unha reclamación xa histórica que a Asociación demanda da Xunta de Galicia e que, a inicios deste 2023, aínda segue pendente.

UN ESPAZO PROPIO NAS FEIRAS INTERNACIONAIS
As feiras internacionais do libro Boloña, LIBER (Madrid), Frankfurt e FIL Guadalaxara (México) centrarán a axenda exterior da Asociación Galega de Editoras, coa contratación e xestión dun espazo propio.
O pasado mes de febreiro a AGE decidiu asumir a xestión do stand nas feiras internacionais do libro para desenvolver as accións comerciais do mesmo xeito que o fan os gremios de editores que participan nestas feiras profesionais. Sen resposta, polo momento, á proposta de participación presentada á Consellería de Cultura da Xunta de Galicia, a Asociación Galega de Editoras volverá participar con espazo propio nas feiras internacionais do libro con apoio de CEDRO e retomando a presenza en Boloña (Italia), do 6 ao 9 de marzo; LIBER, do 10 ao 12 de outubro, en Madrid; Frankfurt, do 18 ao 22 de outubro; e FIL Guadalaxara (México), do 25 de novembro ao 3 de decembro.

PRIMEIRA CITA, EN MARZO, EN BOLOÑA
A feira de Boloña marcará o inicio da presenza exterior da AGE en 2023, na que o gremio de editoriais de Galicia terá presenza na feira dentro do stand da Federación de Gremios de Editores de España (FGEE), como xa o fixera na pasada edición da feira internacional do libro de Frankfurt. O espazo, xestionado pola AGE, contará coa colaboración de CEDRO e acollerá ás editoriais asociadas que confirmaron a súa presenza na feira profesional, considerada como o encontro internacional de maior relevancia no mundo literario infantil e xuvenil, na que se reúnen editoriais, autoría, ilustradoras/es, axentes literarios, empresas de produción de cine e televisión, distribución, imprentas e librarías, que acoden a Boloña para comprar e vender dereitos, establecer novos contactos ou consolidar relacións profesionais, explorar e desenvolver novas oportunidades de negocio e observar as últimas tendencias no libro infantil e xuvenil.

FORMACIÓN E SERVIZOS GRATUÍTOS PARA ASOCIADAS
A Asociación Galega de Editoras volverá ofrecer ás súas asociadas unha oferta formativa especializada no sector e o servizo gratuíto de asesoramento en contratación de dereitos e negociación e internacionalización de proxectos empresariais para resolver casuísticas puntuais sobre o funcionamento internacional de compra e venta de dereitos de explotación de libros, consulta sobre materiais, catálogos e web enfocados na internacionalización dos contidos, consultas sobre cláusulas concretas dun contrato nacional ou internacional, sobre o funcionamento da contratación no estranxeiro, ou sobre os conceptos de contratación (formatos, explotación, cesións…)”

Escritora Galega Universal 2023: Lydia Cacho

Publicado o por

(Lydia Cacho (autoría da fotografía: Eneas MX, Wikipedia). A Asociación de Escritoras e Escritores en Lingua Galega aprobou o nomeamento de Lydia Cacho, xornalista mexicana, con raíces galegas, activista feminista e defensora dos dereitos humanos, como Escritora Galega Universal en 2023, desde o profundo respecto e afecto á súa persoa e a valoración da altísima calidade da súa obra.

Durante a década de 1990 e principios dos 2000, a autora informou amplamente sobre o feminicidio en Ciudad Juárez. En 2000 cofundou o Centro de Atención Integral á Muller, un centro especializado na atención a mulleres, nenos e nenas vítimas de violencia doméstica e de violencia sexual.
En 2005 foi detida en Cancún, Quintana Roo, por axentes da policía xudicial de Puebla, por causas derivadas da publicación do seu libro Os demos do Edén, unha investigación que recolle os relatos testemuñais de sobreviventes dunha rede de prostitución infantil, dirixida por políticos e empresarios. O Comité de Dereitos Humanos da Organización das Nacións Unidas recoñeceu este suceso como unha vulneración dos dereitos humanos, especialmente das mulleres, no sistema de xustiza, ao tempo que solicitou ao Estado mexicano a reparación do delito de difamación causado á xornalista.
Forma parte da Rede Internacional de Xornalistas con Visión de Xénero.

Lydia Cacho ten escrito máis dunha ducia de 14 libros derivados dos seus coñecementos e experiencias, desde a poesía até a ficción, un manual para previr o maltrato infantil, ensaios sobre temas de amor e xénero con gran repercusión internacional sobre tráfico sexual, escravitude e pornografía infantil. A súa obra foi traducida xa a diferentes idiomas: francés, inglés, alemán, portugués, italiano, holandés, croata, sueco e turco, tendo sido publicados en México, Estados Unidos, Estado Español e países centroamericanos. Ten conseguido unha gran cantidade de premios e recoñecementos por todo o seu traballo.

Nas anteriores edicións recibiron este nomeamento as escritoras e escritores Mahmud Darwix, Pepetela, Nancy Morejón, Elena Poniatowska, Juan Gelman, Antonio Gamoneda, José Luis Sampedro, Lídia Jorge, Bernardo Atxaga, Luiz Ruffato, Pere Gimferrer, Hélia Correia, Isabel-Clara Simó, María Teresa Horta, Mariasun Landa, José Luandino Vieira e Ana Luísa Amaral.

A autora recollerá o seu Premio honorífico como Escritora Galega Universal, no marco da Gala dos Premios Follas Novas do Libro Galego 2023, que terá lugar o sábado 22 de abril, a partir das 19:00 horas, no Teatro Principal de Santiago de Compostela.

Previamente, o propio sábado 22 de abril, a partir das 12:15 horas, na Libraría Lila de Lilith de Santiago de Compostela (Rúa Travesa, 7, baixo), terá lugar un coloquio coa presenza de Lydia Cacho, acompañada por Cesáreo Sánchez Iglesias, presidente da AELG, e Margarita Ledo Andión, escritora e membro da Real Academia Galega. O acto será de entrada libre até completar capacidade.

XIII Concurso de relatos de inspiración científica Inspiraciencia

Publicado o por

O XIII Concurso de relatos de inspiración científica Inspiraciencia conta coa colaboración da AELG.

Inspiraciencia é un concurso de relatos de inspiración científica. É unha iniciativa que relaciona ciencia e escritura dun xeito lúdico, un espazo aberto para pensar e imaxinar a ciencia desde a ficción. O seu obxectivo é fomentar un achegamento ao pensamento científico, de forma libre e persoal, a través da creación literaria, e explorar realidades antes non imaxinadas.

As bases do concurso poden descargarse nesta ligazón.

1. Obxecto
Inspiraciencia é un concurso de relatos de inspiración científica. É unha iniciativa que relaciona ciencia e escritura de xeito lúdico, un espazo aberto para pensar e imaxinar a ciencia desde a ficción. O seu obxectivo é fomentar o achegamento ao pensamento científico, dunha maneira libre e persoal, a través da creación literaria, e explorar realidades antes non imaxinadas.
Pode participar calquera persoa que presente un relato orixinal, en calquera das linguas do concurso (catalán, castelán, éuscaro e galego), inspirado nunha temática científica.

2. Modalidade e categorías
Para participar no concurso, débese presentar un relato de temática científica cunha extensión máxima de 800 palabras.

Existen tres posibles modalidades de participación:
a. Temática libre, coa cal se pode optar ao premio institucional e ao premio do público.
b. Temática especial, variable en cada edición, cun premio especial. Concretarase oportunamente na web de Inspiraciencia.
c. «De ciencias e de letras», dirixido ao profesorado que promovese a participación do alumnado con polo menos un relato na categoría Mozo do concurso e co cal se poderá aspirar ao premio «De ciencias e de letras».

Pódese participar nunha das categorías seguintes:

a. Adulto (a partir de 18 anos: os participantes son maiores de idade ao finalizar o prazo de presentación dos relatos).
b. Mozo (de 12 a 17 anos: os participantes teñen menos de 18 anos ao finalizar o prazo de presentación dos relatos).

Os idiomas de participación son castelán, catalán, galego e éuscaro.

3. Presentación dos relatos
Os participantes deben rexistrarse en inspiraciencia.es para presentar os orixinais. A data de nacemento estabelece a categoría (Mozo ou Adulto) en que se participa.
Os participantes poden acceder á súa conta cun nome de usuario e un contrasinal. O pseudónimo é o nome co cal asinarán os relatos. A identidade real do concursante non se fará pública a menos que resulte gañador ou finalista. Durante o proceso de moderación e de avaliación dos relatos, o único nome visible do participante será o seu pseudónimo para manter o seu anonimato.
Os participantes deberán seleccionar a modalidade á cal optan no formulario de envío de relatos.
Unha vez que se envíe o relato, non será posible editalo. O relato pasa automaticamente a moderación. Cando se modere, e sempre que cumpra cos requisitos especificados no punto 5 das bases, publicarase na web.

Para optar ao premio «De ciencias e de letras», o profesorado deberá explicar o proceso seguido na aula para a preparación de relatos co alumnado e a participación no concurso. Os profesores deberán entregar a seguinte documentación nos formatos requiridos:
a. Un resumo do proceso seguido na aula (Word, máximo 150 palabras).
b. Unha desagregación do proceso seguido na aula de maneira visual (PDF, máximo catro páxinas).
c. Un vídeo curto (MP4, máximo dous minutos). Neste formato, os profesores poden contar o que consideren necesario. O vídeo poderá compartirse mediante unha ligazón a YouTube ou Vimeo. Os arquivos deben enviarse a través do formulario habilitado na web.

O prazo de presentación dos relatos publicarase na web da edición correspondente (do 21 de marzo ao 4 de xuño de 2023).

4. Condicións de participación
Os relatos presentados deben ser inéditos e non ter sido premiados noutra convocatoria, certame ou premio literario, nin publicados en ningún medio ou blog.
Cada participante pode presentar un único relato por cada lingua, cun máximo de catro relatos diferentes en linguas distintas. Todos os relatos dun participante deben ser orixinais e non se pode presentar un mesmo relato en diferentes linguas.
Os gañadores dunha edición anterior, nunha categoría e lingua, non poderán presentarse á mesma categoría e lingua nas dúas edicións seguintes.

5. Premios e acto de entrega dos premios
O acto de entrega dos premios é itinerante e consiste nunha cerimonia na cal se desvelarán e darán a coñecer publicamente os finalistas e gañadores de Inspiraciencia. A data e o lugar anunciaranse con antelación a través da nosa web e canles de difusión. As persoas candidatas a ser finalistas ou gañadoras serán contactadas previamente a través do enderezo de correo electrónico indicado no formulario de rexistro.

Os tipos de premios son os seguintes:
a. Un premio institucional por cada unha das categorías (Mozo e Adulto) e por cada unha das linguas oficiais do concurso (catalán, castelán, éuscaro e galego). Resultan, en total, oito premios institucionais.
b. Un premio do público por categoría (Mozo e Adulto). Resultan, en total, dous premios do público.
c. Un único premio «De ciencias e de letras» ao profesorado que participase cos alumnos no concurso.
d. Un premio especial para os relatos centrados nunha temática concreta, en cada categoría (Mozo e Adulto) e lingua (catalán, castelán, éuscaro e galego). Resultan, en total, oito premios especiais.

O contido dos premios especificarase nun apartado da web de Inspiraciencia.
Os candidatos a premio poderán optar a unha bolsa de viaxe para compensar os gastos ocasionados pola súa asistencia ao acto de entrega, sempre que este acto se realice fóra da súa provincia de residencia. As condicións e os importes comunicaranse convenientemente aos candidatos.
A organización resérvase o dereito de declarar desertos un ou máis premios se considera que as obras presentadas non acadan a calidade mínima requirida.

6. Xurado e criterios de valoración
Todos os relatos enviados avalíanse mediante un sistema de dobre moderación. Tras este proceso, os textos que cumpran os criterios definidos neste mesmo apartado publicaranse na web de Inspiraciencia. Ademais, a partir destas valoracións, a comisión organizadora encargarase de levar a preselección de relatos ao xurado segundo a puntuación obtida.
A comisión organizadora designa un xurado para valorar as contribucións e propor as obras gañadoras. O xurado estará formado por persoas do ámbito da ciencia, a literatura, a arte e a divulgación. Os membros que o compoñen anunciaranse previamente a través da web de Inspiraciencia.

Premio institucional e premio especial
Para valorar os relatos do premio institucional e do premio especial, tanto o equipo de moderadores coma o xurado terán en conta os criterios seguintes:
1. A adecuación á temática do concurso.
2. A calidade literaria e o estilo.
3. A orixinalidade, creatividade e imaxinación.
4. A estrutura e a coherencia da narración.

Premio «De ciencias e de letras»
Terase en conta o seguinte:
1. A calidade do proceso de creación e selección de relatos na aula.
2. O grao de interdisciplinariedade e de motivación do alumnado.

Premio do público
Outórgase por votación popular, que se realizará sobre os relatos que seleccionase a comisión organizadora para a súa valoración polo xurado. Prémiase o relato máis votado de cada categoría, independentemente da lingua en que se presentase. Cada persoa que se rexistrase previamente na web do concurso poderá votar mediante o formulario habilitado.

7. Participación
A participación neste concurso presupón a aceptación das bases.
Os relatos gañadores poderán publicarse en medios físicos e dixitais, sempre mencionando a autoría.

Para conmemorar Sant Jordi, desde Inspiraciencia, proxecto coordinado pola Delegación do CSIC en Cataluña e financiado pola FECYT, ofrécese este obradoiro de escritura creativa científica gratuíto en liña.
A profesora será Estíbaliz Espinosa, escritora galega de poesía, ensaio e tradución, cantante, comunicadora de ciencia e astrónoma amadora. A actividade realizarase grazas á colaboración da Asociación de Escritoras e Escritores en Lingua Galega.
O obradoiro repetirase en dúas sesións diferentes. As prazas son limitadas!

NARRATIVAS DO CARBONO. OBRADOIRO PARA HUMANOS SOBRE LITERATURA E CIENCIA

Formato: en liña – Zoom. A ligazón enviarase o día da sesión
Prazas: 10 por sesión
Data sesión A: martes 25 de abril | 18:30-20:30
Data sesión B: mércores 26 de abril | 18:30-20:30
Inscrición sesión A (25/4/23): https://www.eventbrite.com/e/617010413757
Inscrición sesión B (26/4/23): https://www.eventbrite.com/e/617013904197

Podes atopar máis información sobre os obradoiros nesta noticia.
Contacto: info@inspiraciencia.es / ana.yeste@dicat.csic.es

As Asociacións de Escritoras/es de todo o estado fan públicas catro grandes demandas de carácter urxente ás administracións

Publicado o por

Asociacións de todo o Estado, nas que se integran máis de 7.000 autoras e autores, reuníronse no seu VII Encontro Estatal. As autoras e autores coincidiron na urxente necesidade de que, tanto o Goberno do estado como o resto de grupos parlamentarios do Congreso dos Deputados, dean unha resposta inmediata ás demandas incluídas no Estatuto do/a Artista. Son petición cruciais que levan pendentes e sometidas a negociación ou a trámite parlamentario desde 2018. As asociacións consideran inexplicábel e lesivo para os dereitos de autoría de escritoras/es e xornalistas, o estado de parálise parlamentaria da transposición da Directiva 790/2019 do Parlamento Europeo “sobre dereitos de autoría no mercado único dixital”, fixado no marco do Real Decreto Lei 24/2021. Este dereito introduce a necesidade de garantir que autoras/es e xornalistas reciban “a parte axeitada dos ingresos” que perciban as/os editoras/es das plataformas dixitais da sociedade da Información. Os procesos de implementación das directivas europeas están feitos para conseguir resultados prácticos e axudar á parte máis feble da creación, ou sexa: ás autoras e autores, tal como confirman diferentes sentenzas do Tribunal de Xustiza da Unión Europea.

Transcorreron catro anos desde a histórica aprobación por unanimidade nas Cortes do Estatuto da/o Artista, mais as asociacións autorais consideran que os avances son moi limitados e nalgúns aspectos parecen bloqueados ou con concrecións claramente insatisfactorias nos seguintes aspectos fundamentais:

1. DEREITOS DE AUTORÍA NO MERCADO ÚNICO DIXITAL. As Asociacións de Escritoras/es esixen, ao Ministerio de Cultura e Deporte e ao resto dos Grupos Parlamentarios, o desbloqueo da transposición do texto e o desenvolvemento dunha negociación efectiva que leve consigo unha concreción da Directiva europea en cuestións tan básicas como: a determinación no texto legal do procedemento de cálculo da remuneración ás autoras e autores, o procedemento de resolución de conflitos entre as partes, ea fixación da “parte axeitada dos ingresos que perciban as/os editoras/es das plataformas” que corresponda ás/aos xornalistas, escritoras/es e resto de autoras/es; en semellanza aos avances que se están a producir no resto de estados da UE.

2. A COMPATIBILIDADE PENSIÓNS-INGRESOS DERIVADOS DA PROPIEDADE INTELECTUAL, para que sexa unha realidade oprincipio “seguir creando”, tal e como se estabelecía no Estatuto da/o Artista. É preciso incluír as/os pensionistas con Incapacidade laboral permanente, ás/aos perceptoras/es das pensións non contributivas, e dar unha solución ás/aos escritoras/es pensionistas que perciben complemento a mínimos.

3. ADAPTACIÓN DO DECRETO QUE REGULA A COMPATIBILIDADE ásituación real das creadoras/es xubiladas/os, incorporando esa modalidade de compatibilidade aos sistemas informáticos da Seguridade Social. Teñen que se adaptar os procesos administrativos a esa norma e formar o funcionariado para a súa implementación. As asociacións detectaron un nivel de descoñecemento elevado que dificulta e por veces fai imposíbel a súa aplicación.

4. REPRESENTACIÓN EN FACENDA. As/Os autoras/es demandan a creación do grupo de ESCRITORAS/ES entre os colectivos contemplados no Imposto de Actividades Económicas. Na actualidade están integradas/os, sen denominación específica, no grupo “Pintores/as, escultores/as, ceramistas, artesáns/ás, grabadoras/es e artistas similares”. Tamén se require a incorporación aos formularios de Declaración da Renda dunha casa de “Rendementos da Propiedade Intelectual” na declaración do IRPF.

Sen autoras/es non hai cultura

En Alcalá de Henares, a 12 de decembro de 2022

ASOCIACIÓNS ASINANTES: Asociación Colegial de Escritores de España (ACE), Associació d’Escriptors en Llengua Catalana (AELC), Asociación Colegial de Escritores de Cataluña (ACEC), Euskadiko Idazleen Elkartea/Asociación de Escritores de Euskadi (AEE/EIE), Asociación Aragonesa de Escritores (AAE), Asociación Valenciana de Escritores y Críticos Literarios (CLAVE), Asociación de Escritores Extremeños (AEEX), Asociación de Escritoras e Escritores en Lingua Galega (AELG), Asociación Navarra de Escritores y Escritoras (ANE/NIE), Asociación de Escritores y Escritoras de Asturias (AEA), Sociedad Cántabra de Escritores, Nueva Asociación Canaria de Escritores (NACE), Asociación de Escritores de Castilla-La Mancha (AECLM), Asociación Riojana de Escritores (ARE).

Roteiro pola vila de Porto do Son. Da metáfora ao oxímoro, con Patricia Torrado Queiruga, o 17 de decembro

Publicado o por

O Roteiro pola vila de Porto do Son. Da metáfora ao oxímoro, guiado por Patricia Torrado Queiruga, é unha iniciativa da AELG desenvolvida co apoio da Deputación da Coruña e a colaboración do Concello de Porto do Son.
Con esta actividade a AELG que pretende dar a coñecer as cidades e vilas do país da man das nosas escritoras e escritores, que exercen de guías tomando como base obras propias ou alleas vinculadas a eses espazos. Deste xeito, posibilítase que a cidadanía goce persoalmente dos espazos físicos na súa relación coa memoria literaria. O texto deste roteiro será publicado para a súa descarga libre na propia páxina web da AELG.

O roteiro terá lugar o sábado 17 de decembro, a partir das 11:00 horas, tendo como punto de saída o peirao de Porto do Son, baixo a estacada. Será gratuíto para todas as persoas interesadas, ás que animamos a inscribirse previamente enviando un correo electrónico co seu nome e apelidos a oficina@aelg.org, dado que as prazas son limitadas.

Información sobre protección de datos
A/O responsábel do tratamento é a Asociación de Escritoras e Escritores en Lingua Galega. A finalidade do tratamento é a prestación do servizo que se detalla na solicitude ou actividade organizada. A base legal do tratamento é o cumprimento dunha obriga contractual na prestación dun servizo. Os seus datos conservaranse unicamente durante os prazos de prescrición legalmente aplicábeis. Pódense comunicar os seus datos a terceiras/os organizadoras/es ou colaboradoras/es da actividade. No caso de solicitar certificado de asistencia, os seus datos comunicaranse ao/á impartidor/a da actividade. Pode acceder, rectificar, suprimir os seus datos e nos casos determinados opoñerse ao tratamento, limitar o seu uso ou portar a outra/o responsábel. Tamén pode solicitar a tutela da Axencia Española de Protección de Datos ou presentar unha reclamación ante a mesma.

O que é o raio, nin maldita idea foi a obra seleccionada no V Festival Pezas dun Teatro do Porvir para a súa estrea nalgún dos espazos teatrais da Coruña en 2023

Publicado o por


No marco da VII Xornada da Sección de Literatura Dramática. Os retos das artes escénicas en tempos difíciles, organizada pola Sección de Literatura Dramática da AELG, co apoio do Concello da Coruña, Deputación Provincial da Coruña e CEDRO, e a complicidade do Centro Cultural Português Camões de Vigo, tivo lugar o V Festival Pezas dun Teatro do Porvir, Galiza + Portugal, que intentou servir como viveiro e estímulo para as creadoras e creadores que, nestes momentos, estivesen a escribir ou a bosquexar algún tipo de peza para os palcos. Nesta quinta edición do festival acolléronse 7 proxectos (galegos e portugueses), que foron amosados e compartidos en público.

Desa selección, logo das presentacións no V Festival, Afonso Becerra de Becerreá, por parte da AELG, xunto a Xosé Paulo Rodríguez, director do Teatro Rosalía de Castro da Coruña, e Célia Guido Mendes, directora do Centro Cultural Português Camões de Vigo, premiaron un proxecto coa posibilidade da súa estrea nalgún dos espazos teatrais da Coruña. A peza escollida foi O que é o raio, nin maldita idea, de Souvenir (David R. Alonso e María de las Llanderas). Ao tempo, manifestaron a súa alta valoración de todas as propostas chegadas, tanto galegas como portuguesas.

A Coruña: VII Xornada da Sección de Literatura Dramática. Os retos das artes escénicas en tempos difíciles, o 26 de novembro

Publicado o por

Chega a VII Xornada da Sección de Literatura Dramática. Os retos das artes escénicas en tempos difíciles, organizada pola Sección de Literatura Dramática da AELG, co apoio do Concello da Coruña, Deputación Provincial da Coruña e CEDRO, e a complicidade do Centro Cultural Português Camões de Vigo.

As Xornadas da Sección de Literatura Dramática da AELG naceron con vocación de poñer en foco unha das manifestacións artísticas máis senlleiras e estratéxicas dun sistema literario e dunha cultura de seu.
Desde sempre, as artes vivas, especialmente o teatro e tamén a danza, utilizan o movemento, a emoción e, en moitos casos, a acción verbal, a palabra, para contestar, reivindicar, apuntar ou interrogar á comunidade que congregan sobre aspectos fundamentais da actualidade.
Para a VII Xornada da Sección de Literatura Dramática da AELG queremos tomarlle o pulso á creación escénica contemporánea e aos retos fronte a esta época, marcada pola pos-pandemia e a crise derivada, á que se suma a guerra en Ucraína.
A maneira de abordar isto vai ser a través do V FESTIVAL PEZAS DUN TEATRO DO PORVIR, GALIZA + PORTUGAL 2022, que procura presentar, analizar e debater propostas escénicas que se están a ensaiar e a crear neste momento. Trátase, por tanto, dun festival único en Galiza para impulsar e analizar pezas que están en proceso de creación e que buscan abrir e compartir ese proceso con outras persoas, cun público, e con especialistas en artes escénicas.
Ademais imos ofrecer unha masterclass sobre os retos das artes escénicas nestes tempos tan complexos e difíciles. Para iso imos convidar ao director artístico do Centro Cultural Vilaflor de Guimarães, Portugal, Rui Torrinha, responsable da dirección e programación de varios espazos fundamentais e de renome internacional.

V FESTIVAL PEZAS DUN TEATRO DO PORVIR, GALIZA + PORTUGAL 2022
Este é o centro da VII Xornada, que intenta servir como viveiro e estímulo para as creadoras e creadores que, nestes momentos, están a escribir ou a bosquexar algún tipo de peza para os palcos. Cómpre facilitar, visibilizar, abrir espazos de encontro para compartir eses procesos de creación e para encontrar unha complicidade e un diálogo que poida potenciar esas pezas en construción. Ademais, queremos  procurar o diálogo coas inquedanzas que, neste ámbito, podemos compartir coas dramaturgas e dramaturgos de Portugal, reforzando os lazos de irmandade que se remontan á orixe común da nosa lingua.
Nesta quinta edición do festival propoñémonos acoller 7 proxectos (galegos e portugueses), que serán amosados e compartidos en público.
Desa selección, logo das presentacións no V Festival Pezas dun Teatro do Porvir, Galiza + Portugal, a comisión organizadora da AELG, xunto a Xosé Paulo Rodríguez, director do Teatro Rosalía de Castro da Coruña, e Célia Guido Mendes, directora do Centro Cultural Português Camões de Vigo, premiarán un proxecto coa posibilidade da súa estrea nalgún dos espazos teatrais da Coruña. Non obstante, este premio podería quedar deserto, se o xurado así o considera.

Terá lugar o 26 de novembro de 2022 no Centro Ágora da Coruña (Lugar da Gramela, 17).

PROGRAMA

SÁBADO 26 DE NOVEMBRO
No Centro Ágora da Coruña (Salas 8 e 9).
O acceso é libre e gratuíto para todas as persoas que queiran estar presentes, até completar a capacidade das Salas.

– 10:30 h. Sala 9. Apertura da V Xornada. A cargo de Cesáreo Sánchez Iglesias, presidente da AELG, e representantes das institucións colaboradoras.

V Festival Pezas dun teatro do porvir, Galiza + Portugal. Procesos abertos de escrita dramática (mañá).
– 11:00 h. Sala 8. Primeira proposta escénica. Miña pequena, de Constance Hurlé.
– 11:35 h. Sala 9. Segunda proposta escénica. Menú-do-dia, de ChamizoBelloVila.
– 12:10 h. Sala 8. Terceira proposta escénica. Domitila, de Amparo Martínez Paz.

– 12:45 h. Sala 9. Aula maxistral a cargo de Rui Torrinha. Director artístico do Centro Cultural Vilaflor de Guimarães (Portugal).

V Festival Pezas dun teatro do porvir, Galiza + Portugal. Procesos abertos de escrita dramática (tarde).
– 16:30 h. Sala 8. Cuarta proposta escénica. Anarquiteturas do saber, de Pablo Alvez Artinprocess.
– 17:05 h. Sala 9. Quinta proposta escénica. Primavera, de Ana Abad de Larriva.
– 17:40 h. Sala 8. Sexta proposta escénica. Lista das Coisas Infinitas que Nunca Farei, de Rita Pinheiro.
– 18:15 h. Sala 9. Sétima proposta escénica. O que é o raio, nin maldita idea, de Souvenir (David Alonso e María de las Llanderas).

– 18:50 h. Deliberación, por parte do Comité de Selección do Festival, presidido por Xosé Paulo Rodríguez, Director do Teatro Rosalía Castro da Coruña e Membro da Xunta Directiva de La Red do Estado español.
– 19:25 h. Sala 9. Comunicación da resolución do Premio do V Festival Pezas dun Teatro do Porvir, Galiza + Portugal 2022.

V Festival Pezas dun Teatro do Porvir. Galiza + Portugal
O xurado do V Festival Pezas dun teatro do porvir, Galiza + Portugal. Procesos abertos de escrita dramática 2022, formado por Afonso Becerra de Becerreá, en representación da AELG; Xosé Paulo Rodríguez, director do Teatro Rosalía Castro da Coruña e Membro da Xunta Directiva de La Red do Estado español; e Célia Maria Guido Mendes, responsábel do Camões-Centro Cultural Português em Vigo, decidiron que as pezas escollidas para esta nova edición do Festival sexan as seguintes (esta listaxe é a definitiva, tras confirmaren a súa dispoñibilidade para poderen participar no Festival o 26 de novembro, debido a que unha das propostas chegadas de Portugal, por problemas sobrevidos, non pode estar presente persoalmente ese día, polo que foi substituída pola quinta proposta galega máis valorada previamente polo xurado).

Propostas galegas:
1.     Menú-do-dia, de ChamizoBelloVila.
2.     Miña pequena, de Constance Hurlé.
3.     Domitila, de Amparo Martínez Paz.
4.     Primavera, de Ana Abad de Larriva.
5.     O que é o raio, nin maldita idea, de Souvenir (David Alonso e María de las Llanderas).

Propostas portuguesas:
1.     Anarquiteturas do saber, de Pablo Alvez Artinprocess.
2.     Lista das Coisas Infinitas que Nunca Farei, de Rita Pinheiro.

O xurado tamén quere manifestar a súa alta valoración de todas as propostas chegadas, tanto galegas como portuguesas.

Polafía en Cee. Atrás da balea, o 26 de novembro

Publicado o por

A Polafía de Cee. Atrás da balea é unha actividade organizada pola Sección de Literatura de Tradición Oral co apoio da Área de Cultura da Deputación da Coruña e o Centro Español de Dereitos Reprográficos (CEDRO), e a colaboración do Concello do Cee, que terá lugar no Auditorio Baldomero Cores da Casa da Cultura de Cee (Paseo Alcalde Pepe Sánchez, 9), o sábado 26 de novembro a partir das 18:00 h. A entrada é libre até completar capacidade.

Contará coas intervencións de: Xosé Iglesias, Manuel Caamaño Martínez, Manuel Trillo Fidalgo, Victorio Caamaño Vázquez e Jesús Manuel Blanco Costa.

Coordina: Lois Pérez (Coordinador da Sección de Literatura de Tradición Oral da AELG).

Crónica fotográfica do Roteiro pola Coruña no centenario de María Casares, por Arancha Estévez

Publicado o por

Estas son algunhas das fotografías do Roteiro pola Coruña no centenario de María Casares con Arancha Estévez, celebrado o pasado 29 de outubro. A crónica fotográfica completa (obra de Beatriz Maceda Abeleira) pode verse aquí.